Xanana  Sasin  Kazu  Kareta Prado

Xanana  Sasin  Kazu  Kareta Prado

- in Krime, Nasional
49
0
image002 (1)

DIlI-Lider Karismatik Jose Alexandre Kay Rala Xanana Gusmão, partisipa julgamentu iha Tribunal Distrital Dili, nudar sasin kazu sosa kareta ba deputadu sira iha tinan 2008.

Tribunal Distrital Dili iha loron Kinta, (05/12/2019) maizu menus oras tuku 14:00  kontinua halao julgamentu ba kazu sosa kareta prado ba Parlamentu Nasional iha lejislatura daruak

Iha julgamentu kontinuasaun nee, Tribunal kontinua rona sasin neebe hanesan lider historiku Kay Rala Xanana Gusmão, neebe iha momentu neeba hanesan Primeiru Ministru.

Xanana sai sasin, tanba arola husi defeza arguidu Vicente Guterres, neebe hanesan eis Prezidente Parlamentu Nasional.

Iha sasin nia deklarasaun deklara katak, iha tinan 2008 assume kargu hanesan Primeiru Ministru iha konesmentu kona ba sosa kareta prado ba deputadu sira, tanba situasaun urjente.

Sasin deklara, iha momentu neeba realidade kondisaun ba deputadus liliu karreta laos fasil iha tinan 2007 no  2008, nunee mak deside no asina hodi sosa karreta ba deputadu sira laos hanesan iha tempu agora.

Lider nee deklara, kona ba preparasaun prosesu hotu hodi sosa karreta Governu liu husi Ministeriu Finansa ho Parlamentu mak prepara hotu, maibe kona ba asinatura no foti desizaun nia parte rekonese ida nee.

Xanana mos deklara, konaba alterasaun karreta Prado ba modelu seluk, nia rekonese katak momentu neeba nia parte simu duni karta ida husi matebian Fernando Lasama, nudar Prezidente Parlamentu Nasional.

Advogadu privadu Jose Guterres halo rezumu ba deklarasaun Xanana nian katak, iha sala julgamentu laran sasin koalia sobre situasaun saida mak halo ajustu direita, entaun hanesan situasaun de urjensia, tanba momentu neeba iha atentadu kontra Prezidente Republika Jose Ramos Horta, atentadu kontra nia rasik hanesan Primeru Ministru, situasaun nee lori atu halo ajusta direita.

Nunee mos deputadu sira presiza kareta atu ba iha baze, momentu nee situasaun makas deputadu sira la iha kareta balu ho motor, tanba nee maka iha nesesidade sosa kareta atu halao atividade parlamentu nian.

Advogadu dehan, tanba nee, iha urjensia ida atu bele halo ajusta direita ba akizasaun kareta ba deputadu iha parlamentu, Xanana rasik maka asina kontratu.

Nia esplika tan katak, Xanana mos iha konesementu konaba osan sosa kareta, tanba nia rasik esplika antes nia asina surat ida, ema sira neebe iha relasaun aprovizionamentu akizasaun kareta nian, sempre haruka informasaun ba nia, tanba nee nia tau fiar maka fo desizaun.

Konaba alterasaun sosa kareta prado ba pazero, nee autorizasaun husi Prezidente Parlamentu iha momentu neeba Fernando Lasama, iha dokumentus iha autus neebe nia aseita marka prado ba kareta pazero.

Tuir sasin Manuel Montero neebe iha altura neeba hanesan direktor diresaun nasional tixoro iha Ministeriu Finansa, no aktual Diretor Nasional Administrasaun Finansa iha Ministeriu Edukasaun deklara katak, kona ba sosa vikulu 27 ba deputadu nia sei lembra.

Sasin dekara, diresaun nia papel simu proposta, prosesa CTV. Diresaun simu proposta husi aprovizionamentu, maka halo pagamentu, maibe konaba pedidu pagamentu mai husi neebe, nia parte la iha konesementu.

Nia deklara tan katak, proposta husi aprovizionamentu sira halo inspesaun ba kareta ona, no iha justifikasaun, tanba nee diresaun mos halo pagamentu ikus iha fulan Marco, tanba hare katak kareta tama hotu ona.

Nunee kona ba kontratu neebe asina husi Primeru Ministru iha momentu neeba nia hatene, maibe konaba arguidu seluk nia parte la iha konesementu.

Sasin Marcelino Ximens Magno, iha momentu neeba hanesan Xefe Gabinete Prezidente Fernando Lasama no atual hanesan dosente iha UNTL deklara katak, inisiativa sosa kareta prado ba deputadu sira nee, mai husi matebian rasik.

Tanba nia hare deputadu balu mai ho motor, deputada Bisoi ho deit mikorolet, tanba nee nia bolu direktor iha PN atu buka kareta ba deputadu sira. Maibe matebian koalia verbal deit, laos ho eskrita ida.

Nia iha konesmentu kareta 27 mai duni, no matebian rasik haruka atu fo prioridade ba iha deputadu sira neebe la iha kareta.

Sasin deklara katak, bainhira kazu nee akontese, matebian mos hatene ona haruka atu bolu media sira hodi halo konferensia, maibe sasin rasik dehan ba matebian katak, prosesu tama ona iha tribunal, labele intervene.

No matebian rasik sei dehan ba sasin katak, nia mak inisiativa sosa kare prado, tanba nee ema sira neebe akuzadau ba krime inosente, nia mak responabilidade.

Rona tiha husi sasin sira, Tribunal adia ba iha loron 19 fulan ida nee nia laran, atu tama ba iha alegasaun.

Tuir faktus katak iha 2008, PN iha dotasaun orsamental inisial ida ba akizisaun veikulu/karreta ho montante U$ 910,000.00.

Orsamentu ratifikativu aumenta ba $ 1.400.000.00 (dolar Amerikanu Millaun atus ida-atus hat) nee ba dotasaun orsamental ba karreta hamutuk $ 2,310,000.00 ( osan dolar Amerikanu millaun atus rua, atus tolu sanulu).

Iha tinan 2018 Prezidente Parlamentu Nasional assume mos funsaun hanesan Prezidente Republika interinu, mak arguidu VG nudar Vise Prezidente no ezerse mos funsaun Prezidente Parlamentu Nasionl nian.

Iha loron 3 Marsu 2008 kompania Midori Motors, aprezenta ba diretor nasional PN nian kona-ba proposta akizisaun nian ida ba karreta 65 ho marka Toyota land Cruiser ho valor $ 2.171,000.00. no folin hosi kada karreta $ 33.400.00 (osan dolar amerikanu rihun tolunulu resin tolu, atus haat).

Tuir proposta ida nee pagamentu sei fahe ba prestasaun 2, primeiru prestasaun ho valor $ 910,000.00, tuir prestasaun ho valor $ 1,261,000.00 neebe sei kobra hosi orsamentu ratefikativu tinan 2008.

Iha loron 9 Abril 2018, arguidu VG, fo sai despaisu ho proposta ida nee iha termu sira hanesan, “hafoin analiza proposta barak neebe aprezenta ona, ba prezidensia meza PN nian, aseita proposta ida nee kona-ba produtu ho nia folin, ba sr. diretor nasional atu dilijensia hodi bele hetan ajustamentu direitu,”

Iha loron 10 Abril tinan 2008 arguidu VG ho arguidu JRA asina justifikasaun ida kona-ba ajusta direitu ho komapania Midori Motors, hodi alega katak sira halo tiha ona inspesaun merkadu nian ho kompara folin no karakteristika karreta sira nian, no komapania ida neebe mak aprezenta proposta. Justifikasaun ida nee haruka ba arguidu FB.

Iha loron 11, Abril 2008 PN emite CPV numeru 8PR991154BCD no rekuza saun kompara nian ba akizisaun karreta Toyota Land Cruiser Prado 26, ho valor $ 910.000.00.

Iha loron 5 fulan Maiu 2008 arguidu VG informa ba Ministra Finansas, Emilia Pires, katak desizaun atu ho karreta nee, sira hola tiha ona hosi meza parlamentu nasional nian hafoin konsulta tiha bankada hotu katak pagamentu sei halo iha prestasaun dala rua, primeiru ho valor $ 910.000.00 no segundu $ 1, 261, 00 no sei selu ho verba neebe sei inskreve iha orsamentu suplementar.

Iha loron 3 fulan Juñu 2018 halo hikas fali kontratu foun no numeru 84063 ho Ministeriu Finansas no kompania Midori Motors hodi halo finansiamentu ba karreta ho marka Toyota Land Cruiser Prado 27 ho valor $ 910.000.00, karreta hirak nee tenke entrega iha loron 30 fulan Junu 2008.

No kontratu hirak nee asina iha loron 11 fulan Junu 2008 hosi kompania Midori Motors, Kim Jung Woo, ho Primeiru Ministru, Xanana Gusmao.

Husi data nee depois emite tiha orden sosa nian numeru 84347 hodi Midori Motors nia naran, ba akizisaun karreta marka Toyota Land Cruizer Prado 27 katak iha data nee tenke entrega, maibé ida nee la aprova husi Ministra Finansas.

Enkuantu husi aktu sira nee konsidera hamosu prejuizu boot ba osan estadu nian, katak loos duni artigu 37 hosi dekretu lei numeru 10/2005 loron 21 Novembru, hatete prosedimentu aprovizionamentu nian nee admitadu  impoin mos konkursu publiku obrigatoriu ba akizisaun sira ho valor hanesan ka superior hosi $ 100.000.

Ida nee konsidera katak nein sirkunstansia ida hosi hirak nee arguidu sira laiha kompetensia au aprova osan sira ho valor boot.

Arguidu sira viola prinsipiu transparensia no publisidade nian neebe obriga katak kriteriu adjudikasaun nian tenke define loloos iha momentu interior hosi prosedimentu no sei hetan garantia informasaun ba interesadu sira.

Tanba nee ho arguidu sira nia hahalok arguidu sira pronunsia tiha benefísiu ilejitimu ida ba Midori Motors hosi hamosu prejuizu ba estadu pelumenus $ 400.00 mill kada karreta adkiridu, uma ves que iha data hanesan nova Breeding and Trading Unipesoal fornese karreta hanesan ho folin baratu liu $ 400.00.

Ho nunee Ministeriu Publiku konsidera arguidu VG komete krime Partisipasaun Ekonomia iha negosiu artigu 299 KP, no artigu 2 lei Indonesia nian kontra korrupsaun.

Arguidu JBA, akuza mos ho krime hanesan, no arguidu FB, akuza mos ho krime hosi artigu 299 nian hotu iha kodigu penal Timor Leste nian. Terezinha De Deus

 

Komentariu

Facebook Comments

Leave a Reply

Your email address will not be published. Required fields are marked *