Xanana:  Labele Diskrimina Komunidade Afetadu

Xanana:  Labele Diskrimina Komunidade Afetadu

- in Nasional, Politics
231
0
image002

Editora:Carme Ximenes

DILI – Eis Primeiru Ministru iha governu da-4, Kay Rala Xanana Gusmão husu ba komunidade, atu labele diskrimina  Timor ona sira, neebe mai husi nasaun afetadu virus Corona (COVID-19), neebe izola hela iha karantina.

 Dehan Xanana ba jornalista sira, iha Otel Audian, Dili, Segunda (23/03/2020).

Hau ho Ministeiru Saude nomos Tekniku Saude ba haree fatin-fatin sira no husu ba populasaun sira labele paniku, labele halo fali asaun neebe diskrimina hodi mai tuda fali Otel sira no hakilra tun sae, tanba iha nee mesak Timor oan hotu, dehan Xanana.

Tanba nee laos Xanana dehan laos Otel nia nain mak sala ou laos komunidade Timor oan sira neebe hela nee nia sala.

 Maibe tuir normas neebe agora iha mundu tomak sira halo ba ema hotu, atu rai nain ka ema estranjeiru tama tenke, iha karantina durante loron 14 hodi evita.

Ita Timor haree ona no ita kontrola malu la susar atu mate, ita nia situasaun ladun diak kompara ho Italia, Fransa, Espania, Inglatera neebe mate loron-lorn deit no Portugal foin dadauk maka tama no ema mate, nia hatete.

Nia dehan, atu halo prevensaun laos sira nia sala hanesan Timor oan hela iha karantina, halo prevensaun ba moras ida nee atu labele daet.

Tanba nee tenke hanoin didiak medidas neebe hasai nee para evita ba ema hotu.Preparasaun neebe MS halao labarak no la boot.

Ita nia kondisaun neebe haree ba fatin iha Otel Audian, Otel Novo Horizon no Tibar fatin la too, karik ita nia ema hakarak fila, ita labele impede no labele halo moras nee daet tun sae, tenik nia.

Entaun nia husu ba Otel balun katak, nee ba saude publika kuandu buat hotu lao diak imi hatama ema imi menan osan. Maibe ema hotu-hotu moras no mate, imi mos moras no imi nia Otel sei taka.

Hau husu favor ida ba Otel nain sira katak, iha Otel rua nee nakonu ona no iha Tibar Oituan deit, loron ruma mai tan Timor ona ita labele dehan katak labele, Xanana hatete.

Tanba nee Xanana husu ba Xefe suku no xefe aldeia sira, atu haree joven sira.Karik joven  mak tuda Polisia kaer,kaer  halo karantina ketak ba sira.

Hau husu komunidade tomak lalika paniku, tanba ita buka kontrola hela no ita sei iha deit ida pozitivu COVID-19, tenik Xanana.

Nia hatutan, iha uma reja nafatin husu ba maromak atu ajuda  hodi moras nee labele daet, no sira nee karantina lai too loron mak sira fila.

Hau rona familia balun mos hirus fali sira, nee familia la komprende, ita nia familia mak hirus malu fali tuir regras neebe mak ita hatur nee, sira mai iha nee maka hirus malu fali, hatutan Xanana

Eis Primeiru Ministru iha governu da-4 nee husu familia sira labele mai vizita no sira mos, sei labele sai too sira nia loron laiha buat ida. Ohin haree ona iha Novo Horizon sira sei halo kontrolu nafatin ba sira nia kondisaun, too tempu mak laiha buat id a bele fila fali ba idak idak nia uma.

Maibe haree fatin sei la too tanba, nee hau la temi naran maibe husu favor ba Otel sira, tanba saude publiku no saude populasaun nian iha Timor nee importante liu imi nia hotel sira nee,bainhira fatin nee hakonu ona mak hau sei ba baku imi nia odamatan, hodi bele ajuda malu, Eis Primeiru Ministru iha governu da-4 nee.

Aleinde nee mos, Xanana hatoo agradese ba Governu Australia neebe ajuda TL iha Vera Cruz no  sira mos iha ninia kbiit ba ida nee.

 Neebe iha hela kontaktu para sira haruka ai-moruk, nomos karik presiza no sente todan demais ona medikus sira mos sira sei ajuda mai TL.

Tanba agora sei iha pozitivu ida, entaun husu uluk komprendesaun populaaun nian, atu labele halo sira hanesan inimigu fali.

Iha fatin hanesan, komunidade neebe izola iha fatin karantina Otel Audian neebe lakoi temi nia naran hatete, iha familia balun hirus sira no ameasa katak, atu sunu sira ho fatin neebe agora dadaun sira hela.

Tuir observasaun Jornalista STL katak, komunidade neebe mai husi nasaun afetadu neebe agora hela iha Otel Audian hatoo preokupasaun ka problema neebe sira infrenta ho matan been, tanba Iha Otel rua nee laos ema boot deit, maibe ho labarik kiik mos iha neeba hotu.

Prepara Karantina Obrigatoriu

Entretantu Diretora Jeral Prestasaun Saude MS, Odete Viegas, governu atraves husi Ministeiru Saude, agora dadaun prepara fatin ba karantina.

Neebe fatin nee utiliza ba karantina, no hahu ohin ba oin  iha ona karantina obrigatoriu ida neebe mai husi perbatasan ka mai husi areoportu bele utiliza fatin ida nee.

Ema sira neebe tama karantina ema hirak neebe mai husi nasaun afetadu, no sira laiha sintomas, dehan nia ba jornalista sira iha Tibar, Segunda (23/03/2020).

Nia dehan, maibe iha fatin karantina, karik iha ona sintomas muda kedan ba fatin izolamentu, neebe agora dadaun iha Vera Cruz.

Hau atu dehan fatin karantina tau ema sira neebe mai husi nasaun afetadu, hodi ita halo observasaun ba sira durante loron 14. No izolamentu nee ema neebe iha sintomas ona mak tau ba iha fatin nee, tenik nia.

Nia hakarak apela mos ba iha komunidade tenke kopera, tanba TL agora iha kazu pozitivu ona. Entaun husu ema hotu-hotu tenke alerta no ema hotu mos tenke kopera.

Iha fatin seluk Ministra Saude Interina, Elia dos Reis Amaral, katak laos nasaun TL mak halo karantina obrigatoriu.

 Maibe mundu tomak aplika katak, oinsa mak ita bele iha fatin neebe pasazeiru mai husi nasaun afetadu. La signifika katak, sira neebe agora iha karantina nee iha moras, lae maibe ita atu halo observasaun durante loron 14 depois maka sira nia kondisaun diak bele fila fali ba uma, dehan Nia.

Nia dehan, husu ba komunidade tuir matenek nain sira hatete, kada loron husi oras tuku 7 too tuku 9 tenke habai aan iha loron matan durante minitu 5 ou minutu 10 nia laran.

Atu nunee ita nia vitamina D neebe mak produsaun husi ita nia isin lolon aumenta tan ho antimikrova, iha loron manas nee bele aumenta tan ita nia stamina ba isin lolon nian, dehan Nia.

Nia dehan, ai-moruk neebe atu mai husi Cuba no sei mai mos husi Xina.Agora dadaun ai-moruk neebe iha atu apoiu nee tuir matenek nain katak, ai-moruk klorokuina.

Agora ita nia estok iha tanba, durante nee malaria hemu ai-moruk nee entaun ita nia estok ba ai-moruk nee sei iha, Nia dehan.

Governante nee afirma tan katak, ai-moruk neebe atu apoiu mai, MS fo ona pedidu hein katak Xina ho Cuba hatan ona atu ajuda TL, liu-liu nasaun Xina iha tempu badak ai-moruk nee bele too iha fatin.

Nunee mos  akademista Universidade Dili (UNDIL), Hugo Lourenso hatete, Virus Corona akontese ona iha fulan Dezembru liu ba maibe iha Timor Leste, lideransa nasaun nia ladun preokupa ho Covid-19,tanba sira prekupa liu ba iha interese politika hanesan impase politika neebe dadaune iha Timor Leste.

Nia mos husu ba governu, tenke foti medida  prevensaun hanesan halo sosializasaun no  fahe masker ba iha komunidade sira nunee bele prevene an husi moras ida nee maibe iha Timor Leste  ida nee la akontese, hatudu katak governu la hatene ezekuta nia serbisu, tanba sira seidauk hatene didiak sira nia knar nee atu halo ida, ida nee mak sai problema ba Timor Leste.

Nia hatutan, dadun nee iha Timor Leste ekipammentu la iha no laboratotiu ba teste ba COVID-19   nee la iha, tanba wainhira halo teste ruma sei haruka ba iha Australia no mediku sira nia konesimentu mos sei minimu.

Maibe ida nee governu ladun preokupa ho ida nee sira preokupa liu, mak ho impase politika neebe dadaun nee iha Timor Leste.

Ita espera katak moras COVID-19 nee labele daet ba ita, tan nee komunidade ka familia ida nia laran  mak tenki iha konsensia oinsa mak ita  bele izola ita nia an, no goveru mos tenki fo sai ona anunsiu nunee aktividade saida deit mak iha tenki para, dehan Nia.

Nia mos akresenta liu tan katak, komunidade sira tenki kumpri karik wainhira governu fo sai rezolusaun katak ema hotu-hotu tenki halo izolamentu ba nia an nunee bele minimize interasaun entre ema ho ema nunee bele  prevene an husi COVID-19.

“Ita depende deit ba governu liu-liu Ministeriu Saude neebe mak la iha asaun konkreta ita sei hasoru susar,”nia dehan.

Reportajen: Domingas Soares/Alberto Menezes

Komentariu

Facebook Comments

Leave a Reply

Your email address will not be published. Required fields are marked *