Weleti Preokupa Ponte & Estrada

Weleti Preokupa Ponte & Estrada

- in Distritu
3404
0
Foho Matebian

FATUBERLIU-Komunidade Weleti, Suku Fatukahi, Postu Administrativa Fatuberliu, preokupa tebes ponte no kondisaun estrada. Ponte neebe liga ba sira nia hela fatin, tinan hirak liuba, mota silu tohar tiha. Too agora governu seidauk hadia. Nunee mos kondisaun estrada.  Husi rohan ba rohan kondisaun estrada ladiak.

Preokupasaun nee hatoo husi komunidade Weleti, Amaro Sarmento ba STL iha Fatuberliu, Tersa (17/10/2017). Tama tempo udan hanesan oras nee dadaun, dehan Amaro, bainhira udan boot, komunidade lao ba-mai ponte laiha atu fasilita sira husi mota boot. Kondisaun estrada, kada tinan kontinua aat ba bebeik. Udan boot tuun, inundasaun mosu fatin hot-hotu, sobu estraga estrada nia isin lolon. Tanba nee, komunidade Weleti preokupa tebes ba kestaun refere.

Area Weleti desde tempo Indonesia, rekoinese nudar area neebe potensia tebes ba natar. Area natar iha neba, luan tebes. Maibe kondisaun dalan ba area Weleti lapermiti, tanba nee mak iha tempu Indonesia,  governu halo ponte no estrada ba Weleti, sekaligus loke pemukiman transmigrasaun iha Weleti.

Iha tinan 2000, ponte sira iha neba, mota sobu rahun maibe too agora seidauk hadia. Laos deit natar, area Weleti mos potensia ba produtu batar, hudi, aifrina, no aihan sira seluk. Nomos area neebe luan no merese hakiak animal hanesan karau, fahi, bibi, manu no seluktan.

Haree ba preokupasaun hirak nee, Amaro Sarmento husu ba governu atu tau iha planu orsamentu husi hadia ponte no estrada ba area Weleti. Atu nunee komunidade bele asesu transporte hodi tula sira nia produtu ba faan iha merkado sira iha Fatuberlihu, Same, Manatuto, Dili, no fatin sira seluk.

Hatan konfirmasaun konaba preokupasaun refere, Xefi Suku Fatukahi Acacio da Costa rekonese problema neebe komunidade Weleti preokupa. Komunidade Weleti preokupa tebes ponte no estrada. Iha tinan 2000, ponte iha Weleti, Mota Suai sobu tiha, too agora seidauk hadia. Kondisaun estrada mos ladiak.

Alende nee, nia mos husu Ministeriu Agrikultura no Peskas (MAP) tenke halo ona lagoam/kolam ikan iha Weleti. Foin lalais nee, komunidade Weleti halo ona koileta ikan, komunidade balu kontinua loke tan kolam ikan iha area 10 hektares iha Weleti. Lakleur tan komunidade sira bele faan ona sira nia ikan, maibe haree ba infra-estruktura la apoiu.

Kondisaun dalan ladiak, ponte laiha. Preoblema nee defikulta komunidade lori sira nia ikan ba faan iha Merkadu Fatuiberliu, Same, Manatuto, no Dili. Nia husu governu presiza toma atensaun ba problema neebe komunidade Weleti preokupa. Augusto da Costa

Facebook Comments

Leave a Reply

Your email address will not be published. Required fields are marked *