Uza Osan Estadu, Alvaro Ameasa Tama Prizaun Tinan 2

Uza Osan Estadu, Alvaro Ameasa Tama Prizaun Tinan 2

- in Notisias Online
584
0
Kadeia

DILI-Ministeriu Publiku akuza arguidu Arguidu Alvaro de Deus Lopes tama prizaun tinan rua (2) no suspende ba tinan hat (4) tanba uza osan estadu $ 2.655.

Tuir official justisa neebe kaer prosesu nee hatete, liu husi alegasaun final ministeriu publiku akuza arguidu ho pena prizaun tinan rua no suspende ba tinan hat. No arguidu mos selu indimizasaun $2.655 ba estadu tanba arguidu komete krime peculatu neebe previstu iha artigu 259 kodigu penal TL nian.

Tuir akuzasaun husi Ministeriu Publiku katak iha loron (12/12/2012) arguidu simu orientasaun husi administrador postu administrativu Atsabe hodi halo levantamentu osan ho valor $ 2.655 ba iha suku Lasaun hodi entrega osan refere ba iha xefi suku no konsellu de suku nian. Maibe arguidu la lori osan refere hodi ba iha xefi suku, maibe uza fali osan nee ba nia nesesidade privadu. Ho ida nee ministeriu publiku akuza arguidu ho krime peculatu neebe previstu iha artigu 259 kodigu penal TL nian.

Hatan ba akuzasaun nee arguidu Alvaro de Deus hatete, akuzasaun sira nee los hotu . Iha momentu nee nia hanesan ofisial governu lokal iha postu administrasaun  Atsabe nian. Los duni osan nee momentu nee nia mak ba foti duni, maibe iha momentu nee nia uza tiha. Tanba iha momentu nee nia aman mate iha loron (6/1/2013), neemak nia uza tiha osan nee.

Momentu nee hau uza tiha ba hau nia aman nia mate, hau atu ba kredit hodi selu fali osan nee. Tanba momentu nee hau kredit hela $ 2.250 hodi halo uma. Neebe agora hau laiha osan atu fo fila fali,” dehan nia.

Iha fatin hanesan sasin Agustinho Claudio Martins nudar xefi suku Lasaun hatete, sira iha problema ho arguidu nee. Tanba arguidu nee foti tiha xefi suku, xefi aldeia, konsellu de suku Lasaun sira nia salario durante fulan tolu nia laran, neebe too agora seidauk fo fila. Osan nee hamutuk $2.655, neebe momentu nee nia mak ba foti fodik iha administrasaun hodi mai entrega ba iha suku nee. Maibe too agora la fo fila, maibe osan sira nee nia uza ba joga hotu tiha bola guling.

Audensia nee prezide husi juis kolektivu, Juiza presidenti Jasinta Correia, adjunta juiza Ana Paula Fonseca no juiz Ivan Gonçalves. Prokurador Jasinto Babo no arguidu hetan assistensia legal husi defensor publiku Albino Soares. Informasaun kompletu iha STL Jornal no STL Web, edisaun Kuarta (2/3/2016). Domingas Gomes

 

Komentariu

Facebook Comments

Leave a Reply

Your email address will not be published. Required fields are marked *