TEMPU ONA LIDERA TIMOR-LESTE HO INTEGRIDADE  

TEMPU ONA LIDERA TIMOR-LESTE HO INTEGRIDADE  

- in Opini
436
0
image002

Husi : Rosário Salsinha Araújo

Mundu ne’e hahu klo’ot ba daudaun, nuné ita ema nia moris hahu muda ba nafatin, mezmu oportunidade lahanesan  tamba konsekuensia husi moris ne’ebé diferente, mundu né ema dehan katuas ba daudauk, no ita ema nia idade aumenta lalais iha minutu ba oras, ita sente mundu né sai kiik  tamba teknologia komunikasaun moderna sira ne’ebé agora trand iha mundu oras né sai instrumentu ida hodi fasilita no transforma informasaun sira sai simples e mais baratu, ita  ema nia pensamentu muda tuir evolusaun teknologia hirak né, nuné hanesan humana ita sente laiha buat ida mak difisil ba moris ida né,  biban né  hakarak lori leitores sira hodi buka hatene saida mak Timor-Leste nia hakarak liga ba asuntu dezenvolvimentu  integridade ne’ebé oras né daudaun sai ona ikon iha mundu liu-liu kabe ba asuntu sira prevensaun korrupsaun nian,  dala wain ita koalia ho liafuan sira oi-oin hodi demostra deit  ita nia kapasidade atu bele konvense no muda ema seluk nia hanoin, tuir saida mak ita kunsidera lo’os iha ita nia hanoin sira, maibe ita  ladauk konfirma lolos katak hanoin hirak né iha nia moral integridade ou lae?.

Nudar ema ita nia moris né sei tó ba  objetivu  tuir saida mak  ida-idak mehi, wainhira hakarak preserva integridade nudar simblu karakteristika moris nian, mezmu implementasaun integridade iha prátika moris laos simples hanesan fila liman iha bazar, tamba hasoru konsekuensia oi-oin ne’ebé sei  mosu mai hodi hamihis integridade né rasik,  wainhira ita hakarak  atu defende buat hotu ne’ebé justu mak ita mos prontu hasoru laloran tasi no anin boot, ita nia integridade sai ameazadu tamba material, osan mutin no mean, riku soin no tentasaun sira oi-oin mai nafatin tenta hodi hamihis no harahun  prinsipiu ne’ebé lo’os, tamba né  wainhira nudar sidadaun no emar Timor-oan, karik simu oportunidade hodi ezerse kna’ar hanesan lider ka governantes, tenke tau kedas iha hanoin no prinsipiu katak ba integridade laiha opsaun atu hili, mezmu iha dalan sira seluk no oi-oin maibe responsabilidade sira tenke hatudu nafatin integridade,  nuné sei asegura katak lider diak né mak lider ida hatene tau an, hatene moris simples laos euvoria hodi buka kontente ba an rasik no haluha tiha objetivu estadu nian hodi fó moris ba nasaun no povu.

Servente no ukun nain sira nia lideransa sai ameazadu tamba hasoru potensia sira oi-oin enrelasaun ho asuntu integridade, iha parte ida hakarak defende prinsipiu diak sira atu ukun ho integridade maibe iha  lidun seluk tentasaun sira hakbesik mai nafatin iha minute ba oras husi  loron ba loron, kuaze tempu tomak nakonu ho tentasaun  osan, materia, no seluk tan, iha biban hanesan né nasaun koko ita nia lealdade no boa fé hodi defende integridade ou simu oportunidade sira, ita nia direitu hodi hili opsaun iha ita nia lideransa tomak nudar jerente estadu iha ita nia liman rasik, laiha ema ruma mak sei intervein no impede ita boot nia dezisaun hotu tamba poder iha ita nia liman rasik.

Ita boot  tenke prontu  jere nafatin substansia sira atu asegura ita nia lideransa,  ita nia integridade tomak nudar lider, povu no nasaun sei louva, wainhira defende an nafatin hodi la monu ba asineiras no manobras sira tó  ita nia mandatu remata, ita nia dedikasaun tomak sei hetan prestasaun husi povu hodi avalia no fó valor positivu tuir saida mak ita boot presta  ona, lider nasaun barak monu iha sira nia kareira polítiku tamba lakon sira nia pasiensia hodi defende integridade diak iha povu nia matan, tamba sira sai fali korruptores no manipuladores ba sira nia povu hodi hatun integridade estadu rasik, nuné sosiedade lakon sira nia konfiansa total, sira lakon sira nia futuru nasaun nian tamba hahalok at korruptores ne’ebé hanoin nia an liu duke hanoin ema barak nian, nasaun nia ekonomia monu, mukit no kiak hakbesik ba povu kbiit laek sira, dezenvolvimentu edukasaun lakon nia objetivu hodi forma no transforma nasaun sai avanzu, povu nia mehi lakon iha dalan ninin laiha serteza atu hetan moris dignu nudar ema iha nia nasaun rasik, korrupsaun moris no buras ba nafatin bebeik no bebeik nuné ema oitoan sai kontente no hamnasa ba nafatin husi riku soin ema barak nian “ Beato Papa São Paulo II “ laiha sentimentu nudar humana ba sofrimentu naruk ne’ebé povu sakrifika iha sira nia moris, tó momentu ida ema soe lia ba malu dehan funsaun estadu né tó iha ne’ebé ona, polítiku nain sira iha neon ba povu né  ka lae?.

Konsekuensia husi hahalok hirak né afeta tebes moris sosiedade nian, tamba né iha nasaun terseira mundu sira monu ba krize polítiku no ekonomia iha sira nia nasaun, mezmu  nasaun iha osan naton hodi trata no sutenta sira nia estadu  sai diak maibe sira lakon  integridade nudar jerente estadu tamba dala wain koalia mak barak liu duke sira nia prátika sira, sira prefere koalia iha kampaña públiku  sira, iha midia oi-oin sira, ho meius no retorika mak as teb-tebes, maibe prátika kuaze menus, husi né hatudu momos katak nasaun infrenta desafius liu-liu oinsa bele fó resposta diak ba ben estar povu nian.

Karik iha Timor-Leste ita hahu infrenta esperiensia hanesan ho saida mak akuntese iha nasaun sira seluk ne’eba maibe iha parte ida lider sira buka dalan oinsa bele atua lalais problema hirak né, mezmu nuné tenke hatudu duni atuasaun ida mak sériu ba situasaun hirak né atu bele ivita problema seluk ne’ebé bele mosu, tamba problema hotu presiza rezolve ho seriedade hodi buka tuir nia hun no abut iha ne’ebé, nuné fó nia resposta imediata tuir kedas problema né, labele husik kleur selae sei aumenta ba nafatin, asuntu sosiais, ekonomia, edukasaun, saude sai prioritário, tuir fali ida né tenke mos hatoman atu haforte lei ba sidadaun sira mak iha estadu ida, asuntu korrupsaun, krime oi-oin sira tenke rezolve ho lei, ivita atu perdua malu ou fasilita malu tamba interese sira, lei tenke nafatin lei atu asegura integridade estadu nian iha povu nia matan.

Estadu Timor-Leste dignifika  povu   nia  integridade nudar simblu ba identidade tuir nia kultura rasik, valorizasaun né  institusionaliza iha lei inan,  tamba né integridade tenke sai abut iha soberania ukun nain sira  nia lalaok atu konkretiza liu husi asaun realístiku sira hanesan hatene haraik an, obidensia, respeitu mutua, respeitu difersensia  opinioins sira, terus ho povu, hatene prioridade sira mak nasaun presiza, anti suborno, dezisaun ida deit, firmeza nafatin iha difikuldade sira, la fasil monu ba tentasaun, valoriza kultura sira, moris simples, lahatene loko-an, la foti an, hatene tau an iha situasaun riskante sira, hatene rezolve problema povu nian, hatene deskobre difikuldade sira mak nasaun infrenta, laiha interese ba an rasik, interese povu no nasaun tau iha nivel as, la familiarista, laiha partidarismu no seluk tan, nuné integridade sai maduru iha povu nia matan tamba lider sira hatudu  uluk ezemplu, tau iha prátika ne’ebé lolos nudar aman no mestre ba nasaun, laos koalia deit maibe tenke ilustra ho ezemplu no hahalok, povu hare e sente kedas ukun nain sira nia humildade, tan né  sira sei orgulho ho domin lider sira nian, hahu husi ne’eba integridade lider sira nian  fó nia fuan hodi sai aihan no bokai ba sosiedade. Ema nia konfiansa hahu moris no buras ba nafatin mezmu nasaun infrenta  difikuldade boot sira iha sira nia dezenvolvimentu, tambá povu nia sentimentu ba lider sira nia pasiensia sai motivasaun no espíritu boot atu  banati tuir saida mak lider sira hanoin, halo no prátika tuir dalan ne’ebé lolos.

   Leitores, karik korrupsaun invade ita hodi sobu no hatun dignidade no integridade povu no estadu Timor-Leste, entaun korrupsaun inimigu povu no estadu nian. Se mentalidade korruptu moris ona iha servidores estadu nian, fila-liman-nain sira ruma, ka se deit, entaun tenki iha medidas ruma ba sira. Ne’e duni estadu iha razaun no obrigasaun atu hamoris instrumentu legál fórmal hodi fóti medidas ba  sidadaun ruma ne’ebé tau-an sala iha prosesu konstrusaun Estadu no dezenvolvimentu ba povu nia moris diak.

Guvernu kria formas oi-oin hodi desenvolve no fó moris ba sosiadade sira iha nasaun foun ida né, maibe problema korrupsaun sai desafiu bot hodi halakon no hamonu integridade nasaun nian, tamba dala barak fó risku ba desenvolvimentu nasionál. Korrupsaun hahalok ida nebé mosu iha sosiedade nia le’et no belit kedas ba sosiedade nia moris lor-loron,  iha ema lubuk ida ka grupu balu kaer kbi’it boot ka besik ba sira ne’ebé kaer kbi’it no iha emar baibain, problema korrupsaun moris no buras nafatin iha ema kbiit-nain ho sira nia parente no belun sira de’it,  né realidade ida, tanba sira kaer kbiit no besik liu kedas ba riku-soi Estadu nian nebé iha potensia hodi hetan tentasaun boot ba sira atu monu. Maibe laos sira hotu iha hanoin no hahalok at hanesan, iha mos ema diak ho hahalok diak iha neba. Timor oan nebé hetan biban ba kaer ukun ka hetan kbiit ruma iha Estadu Timor-Leste mos mai husi emar baibain no kesi-an iha lisan Timor nian no lisan asimiladu (lisan ne’ebé ita simu husi rai seluk) balu. Lisan né namkari  iha sosiedade tomak no sosiedade ida né mak hahoris no hamoris duni nia oan sira atu ba kaer ukun ka kaer knaar Estadu nian. Sosiedade né rasik mak tenki prepara no hamoris nia oan sira atu sai ema diak hodi lori Rai né ba oin, no livre husi korrupsaun, sidadaun sira prezisa iha kuñesimentu kona ba integridade diak iha instituisaun Estadu, iha organizasaun sira, no grupu sira atu asegura nafatin  prátika diak sira iha boa governasaun diak hodi hakru’uk no obedeze ba lei no ordem sira nudar hun no abut ba demokrásia ida maka forte.

Nudar sidadaun diak ne’ebé responsável no prekupa ho nasaun nia moris diak agora no futuru  tenki tau hanoin konstrutivu wanhira ita nia ukun- nain ka servidor Estadu sirak halo korrupsaun hodi hatun integridade estadu no hatete mos ba instituisaun Estadu nian/hirak ne’ebé kaer knaar atu prevene no kombate korrupsaun; hanesan né ita bele sita autor, dozente no produtor filme dokumentáriu Amérika nian, G. Edward Griffin nebe hateten “Kontra korrupsaun iha governasaun (ida) nia laran mak dever patriotizmu ne’ebé a’as liu.” Esperiênsia iha rai barak hatudu katak prevene no kombate korrupsaun la tula ba instituisaun ida ka rua nia kabaas de’it, maibe, sosiedade tomak mos iha knár ka papel atu halo buat ruma iha tinan 2020 ba oin ho kompromisu ida deit mak defende integridade no kombate Korrupsaun.***Lelosae,10/02/20

 

Opiniaun rasik  no pesoal : Hakerek nain servisu iha CAC,Karik iha hanoin ruma bele kontaktu ba Hp:+ 670  7732 6592

Email:rlelosae@yahoo.com

Komentariu

Facebook Comments

Leave a Reply

Your email address will not be published. Required fields are marked *