Tebe Fen, Laen Hatan Tribunal

Tebe Fen, Laen Hatan Tribunal

- in Krime
114
0
Deskonfia

DILI- Tribunal Distrital Dili julga arguidu ho inisial GG, tanba komete krime maus tratus, konjuga ho forma violensia domestika hasoru nia fen.

Tuir akuzasaun husi Ministeriu Publiku, neebe tribunal lee sai katak, iha loron 19 fulan Outubru 2015, oras tuku 21:00 iha lezada no arguidu nia uma kost iha Aldeia Terra Santa, Rai kotu, Comoro Dili.

Problema akontese tanba iha momentu neeba lezada ba eskola UNTL fila ba uma iha tuku 19:00 kalan. Iha okaziaun nee arguidu mak tula lezada fila ba uma.

Bainhira too iha uma, lezada komesa tein depois ba haris tiha no sira tur halimar. Iha momentu nee arguidu dehan ba lezada katak, nia isin kolen loos tanba fila husi Liquisa mai. Maibe lezada hatan ba arguidu se nunee, o ba hela iha Liquisa motorizada rai iha nee hodi labarik sira tula hau ba kuliah.

Arguidu la simu lezada hateten nunee, no diretamente tebe kedan iha lezada nia kelen parte karuk, nunee halo lezada monu tun husi kadeira neebe mak lezada tur ba.

Arguidu mos tuku tan dala ida no basa dala ida iha lezada nia hasan parte loos, buti iha lezada nia kakorok halo lezada hakilar nunee, lezada nia alin sira too ba mak arguidu husik lezada.

Iha kalan nee kedan, lezada halai ba iha post F-FDTL Tasi Tolu nian hodi husu ajuda, nunee membru F-FDTL komunika fali ba polisia maibe, polisia hatan katak sira labele ba fatin akontesementu tanba la iha transporte. Tanba nee membru F-FDTL haruka lezada fila fali ba uma.

Iha loron 21 Outubru 2015, foin lezada ba hatoo keiza iha polisia depois kontinua lori ba iha uma hakmatek iha Bidau.

Konsekuensia husi arguidu nia hahalok refere, halo lezada sofre moras iha nia isin sira neebe mak arguidu tebe no basa kona, nunee lezada moras durante loron 3 hodi sosa aimoruk iha apotik konsumu too rekopera.

Arguidu ho lezada hola malu hanesan fen ho laen iha tinan 2010, iha oan nain tua durante sira moris hamutuk hanesan fen no laen, arguidu baku lezada dala fila fila no lezada pasiensia deit la halo denunsia.

Mesmu durante nee arguidu halo agresaun fizika hasoru lezada, dala barak maibe, lezada foin mak keiza ba akontesementu ida nee tanba, nia sente arguidu nia hahalok nee demais liu no sente labele ona.

Depois de problema nee akontese, arguidu ho lezada la hela hamutuk ona, arguidu mos la haruka osan hodi sustenta lezada ho nia oan sira, maibe husik no abandona lezada ho nia oan sura komesa husi inisiu tinan foun 2016.

Ministeriu publiku akuza arguidu hanesan autor material ho forma konsumadu iha krime maus tratus ba konjuje ho forma violensia domestika neebe previstu no punidu tuir artigu 154 husi lei kontra violensia domestika no 7/2010.

Hatan ba akuzasaun nee arguidu deklara katak, faktus nee balu loos no balu la loos. Nia baku lezada dala ida deit laos bebeik, no antes nee mos nia la baku.

Hau baku nia pas momentu nee deit, mas antes nee hau seidauk baku nia, no laos baku bebeik hela deit nian, deklara arguidu iha Sala Audensia Tribunal Distrital Dili, Kuarta, (11/10/2017).

Rona tiha deklarasaun husi arguidu, tribunal adia fali julgamentu ba 16 Outubru tuku 9:00 dader hodi rona deklarasaun husi lezada.

Audensia julgamentu nee, prezide husi Juiz kolektivu Fransisca Cabral, Maria Solana, Jose Maria de Araujo. Ministeriu publiku reprezenta husi Prokurador Bartolomeo De Arauju, arguidu hetan asistensia legal husi Defensor Publiku Sergio Dias Quintas. Terezinha de Deus

Facebook Comments

Leave a Reply

Your email address will not be published. Required fields are marked *