TDD Julga Eis Funsionariu BNU

TDD Julga Eis Funsionariu BNU

- in Krime
56
0
download (14)

DILI-Tribunal Distrital Dili, iha loron Kuarta (11/12/2019) halao julgamentu ba arguidu FP hanesan eis funsionariu BNU, arguidu JB hanesan membru PNTL no arguida LF.

Iha julgamentu nee, juiz prosesu halo tiha identifikasaun ba arguidu nain tolu, depois de lee tiha akuzasaun hotu, tribunal haree katak, arguidu nain tolu iha konflitu de interese.

Tuir lei kuandu iha konflitu de interese, arguidu nain tolu nia defeza labele ida deit, tanba nee tribunal husu atu arguidu FP, bele buka fali nia defeza ida.

Tanba iha sala julgamentu laran, iha defeza ida deit, neebe atu fo asistensia ba iha arguidu nain tolu hotu.

Ho nunee, tribunal deside hodi adia hikas julgamentu nee ba iha loron 09 fulan Janeiro 2020, hodi kontinua julgamentu.

Tuir faktus katak, FP hanesan ema neebe hetan kontratu ho BNU halao nia knar iha area kordenasaun komersial.

Iha loron 28 fulan Outobru 2015, halo kontratu foun ba iha arguidu, tanba nia kontratu antes nee remata ona, tanba nee halo kontratu ba nia iha area rekoperasaun ba servisu.

Arguidu halao nia knar nee, iha fulan Junho too iha fulan Novembro halo transferensia osan barak husi kliente sira nia ba iha konta bankaria nia familia nian, no mos ninian rasik.

Tranferensia osan ba familia maka hanesan nia maun arguidu JB no nia alin arguida LF inklui SF neebe la iha konesementu.

Osan neebe arguidu foti husi levantamentu no halo transferensia husi kliente sira refere nia konta bankaria hamutuk valor USD $ 41.440.

Tuir deklarasaun eskrita neebe arguidu halo iha loron 28/12/2015 arguidu rekonese hahalok neebe nia halo. Arguidu promete atu fo fila ba kaixa jeral BNU osan ho valor USD $ 30.000. iha momentu neeba kedas.

No restu husi USD $ 11.870, nia sei fo iha prestasaun, maibe realidade osan neebe arguidu promete, too agora seidauk fo fila.

Ho nunee arguidu nain tolu hanesan ko autoria ba krime abuju konfiansa agravadu iha artigu 257. No arguidu FP hanesan mos autor ba krime falsifikasaun dokumentus neebe previstu iha artigu 303 husi KP.

Audensia julgamentu nee, prezide husi Juiz Kolektivu Antonio do Carmo, Albertina Neves no Sribuana da Costa. Ministeriu Publiku reprezenta husi Prokurador Hipolito Santa, arguidu hetan asistensia legal husi Defensor Publiku Eustaqui. Terezinha De Deus

Komentariu

Facebook Comments

Leave a Reply

Your email address will not be published. Required fields are marked *