Tan Feto Kiik, Fen-Laen Hurlele Malu

Tan Feto Kiik, Fen-Laen Hurlele Malu

- in Krime
693
0
Kadeia

DILI-Tribunal Distrital Dili julga arguidu AA neebe halo agresaun fisika hasoru ninia fen kaben. Tanba arguidu hola fali feto kiik sira nain rua hurlele malu.

Tuir akuzasaun neebe tribunal lee sai, husi Ministeriu Publiku katak, iha loron 14 fulan Fevereiru haleu oras 5:00 iha uma Maubara, arguidu tuku dala tolu iha lezada nia ulun, no foti tan ai sanak baku dala rua iha lezada nia kakorok sorin los, hodi rezulta moras no metan iha zina antijidu .

Iha loron nee kedas lezada halai ba klinika iha Maubara hodi halo tratamentu mediku no kontinua ba hatoo keiza iha Eskuadra Maubara.

Motivu husi arguidu halo agresaun ba lezada, tanba rona informasaun husi feto ida naran Atina Fatima do Rego katak, arguidu hakarak hola tan feto, nee nudar fen Segunda.

Lezada rona informasaun sira nee husi feto refere, no ba hatoo iha arguidu dehan nia rona katak o atu hola tan feto kiik ida. Rona istoria sira nee arguidu komesa hirus no riba sasan sira hanesan bikan, kanuru, termos, kopu no telefone estraga hotu. Tuir fali iha fulan Maiu tinan 2017 tuku 21:00 dudu tan lezada maibe la konsege monu.

Katak durante sira moris hamutuk hanesan fen ho laen, lezada senti la felis, tanba arguidu sempre halo amante ho feto seluk no too hola feto kiik. Hahalok arguidu nian nee la konsidera lezada nudar nia fen, katak arguidu sempre trata lezada hateten katak la kohi ona lezada. Katak lezada mos simu telefone husi arguidu nia fen kiik iha Dili liu husi telehone nee nia fen kiik hateten ba lezada dehan aat ba lezada.

Husi arguidu nia kompartamentu diskriminativu sira nee halo lezada presaun mental too koko tara nia aan iha kuartu laran maibe, la konsege mate, tanba nia subrina ida naran Carla Boavida mak toman hodi informa ba polisia hodi salva lalais.

Liu tiha problema nee akontese lezada ho arguidu kontinua moris hamutuk nudar fen ho laen. Arguidu AA nia agresaun temi iha leten, kauza lezada hetan moras iha nia ulun ho kakorok rezulta moras bubu metan iha zona atinjidu, arguidu AA bolu hakarak bolu direita hodi tuku no baku lezada nunee hetan moras no bubu.

Tanba arguidu ninia komportamentu diskriminativu halo lezada hetan presaun  mental hodi koko tara nia aan iha kuartu laran, mesmu la akontese mate tanba hetan salvasau husi polisia iha fatin refere.

Motivu husi agregasaun fisika sira nee mosu, tanba arguidu hakarak hola tan feto kiik nunee mak lezada la kohi mak nia halo fisiku hasoru lezada iha fatin Maubara.

Arguidu pratika agregasau hasoru lezada hanesan temi iha leten ho forma neebe livre deliverada vontade rasik no konsientemente hatene katak, baku no tuku iha ema seluk nia isin nudar agregasaun fisika neebe mak halo lezada sofre moras, hateten mos ho hahalok sira nee kontra lei nunee hetan kastigu.

Ho nunee arguidu AA hanesan autor material ho krime konsumadu hodi pratika violensia domestika ka forma ofensa ba integridade fisika simples neebe previstu no punidu iha artigu 145 kodigu penal.

Hatan ba akuzasaun nee, arguidu deklara ba tribunal katak, faktus hirak nee, balun los no balun sala.

Iha momentu neeba nia les no rakut hau, hau defende aan hodi dudu ses nia liman, hodi tuku nia, no lori deit ai sanak baku iha nia ain kabun, ”deklara arguidu iha Sala Audensia Tribunal Distrital Dili, Segunda (23/10/2017).

Arguidu deklara tan, depois de problema nee akontese sira ba rezolve iha autoridade lokal hodi deside sira nain rua fahe malu no arguidu kontinua moris hamutuk ho feen kiik.

Arguidu arepende ba nia hahalok, no nia kompremete ba tribunal katak nia sei la kontinua halo tan hahalok hanesan nee ba ema seluk.

Alende nee lezada mos deklara ba tribunal katak, problema nee akontese tanba arguidu ba hola feto kiik, arguidu ba tama iha feto kiik nia uma, arguidu rasik dehan ba feto nee katak, nia sei klosan tanba nee nudar fen senti laran moras hodi halo problema ho arguidu.

Telefone ba feto nee atu fo hatene katak mane nee nia fen iha maibe, feto nee simu hosoru hodi tolok hau. Hau koalia ba nia mos, nia sempre lori nia nervozu no brani hodi baku rahun sasan,” esplika Lezada.

Nia esplika, arguidu baku duni nia too nia ba sadar aan iha hospital, lezada mos ho fuan neebe boot atu perdua arguidu, nia mos husik arguidu ba halo feto seluk do ke kalan loron nia simu hela deit terus.

Rona tiha husi parte sira nee, tribunal husu ba ministeriu publiku atu submete kedan ba iha alegasaun.

Iha alegasaun ministeriu publiku husu ba tribunal atu aplika pena privativa, pena prizaun tinan tolu, suspende ba tinan ida ho razaun tanba krimi violensia domestika konjuga ho krimi ofensas integridade fizika simples, no ministeriu publiku konsidera aprovadu tanba arguidu halo duni agresaun fizika hasoru lezada.

Ministeriu publiku mos hateten, tuir lolos arguidu hanesan xefi aldeia hatudu ezemplu diak ba nia povu sira, sai hanesan espelu ba ema seluk, laos hanesan lider hatudu fali buat neebe la diak ba nia ema sira.

Alende nee husi parte defeza husu ba tribunal atu aplika pena neebe adekuadu proporsional, pena admoesaun tanba iha kondisaun produsaun provas arguidu ho lezada nia deklarasaun la han malu, no iha autos nia laran la sita mos atestadu mediku husi hospital neebe lezada ba halo tratamentu.

Rona tiha husi ministeriu publiku, no parte defeza nian, tribunal suspende hikas julgamentu nee ba iha loron 7 de Novembru tuku 9:00 Otl  hodi submete ba iha leitura akordaun liu husi tribunal movel iha Munisipiu Liquica.

Audensia Julgamentu nee prezide husi Juiz singular, Duarte Tilman, ministeriu publiku reprezenta husi prokurador Bartolomeu de Araujo, arguidu hetan asistensia legal husi defensor Publiku, Manuel Sarmento. Terezinha de Deus

Facebook Comments

Leave a Reply

Your email address will not be published. Required fields are marked *