Strutura PR Suku Leohitu Simu Pose

Strutura PR Suku Leohitu Simu Pose

- in Politics
462
0
1604382_1033057823486533_1559829927161377424_n

DILI– Eleisaun Parlamentar (Elpar) besik ona. Partidus Politiku (Parpol) sira hahu hakbesik aan ba povu hodi hato’o sira nia programa dezenvolvimentu iha nasaun Timor Leste. Tantu Parpol Republikanu (PR) neebe lidera husi João Mariano Saldanha, PhD, iha Sabadu (13/5/2017), halao konsolidasaun partidu nian nomos fo tomada de posse ba strutura PR nian iha Suku Leohitu, Postu Administrativu Balibo, Munisipiu Bobonaro.

Vise Sekretariu Jeral PR Asuntu Organizasaun no Legislasaun PR, Vicente Vias da Costa, S.Sos, MM, informa katak objetivu husi konsolidasaun nee atu haforsa no hametin liutan strutura PR nian iha nivel postu administrativu.

Militante no simpatizantes PR nian husi suku lima kompostu husi Balibo Villa,Leolima, Leohitu, Kowa, no Sanirin halibur aan iha Suku Leohitu hodi rona PR nia programa ba festa demokrasia hili reprezentante povu atu tuur iha Parlamentu Nasional, tanba povu nian lian mak Lei as liu (Vox Populi Suprema Lex),” dehan Vicente ba STL iha Sede PR nian iha Vila Verde, Dili,  Kuarta (17/5/2017).

Iha oportunidade ida nee, Vicente hato’o kona ba konvite ba lista kandidatura membru Parlamentu Nasional PR 2017-2022, katak atu responde ba aspirasaun povu Timor Leste, PR konvida publiku atu tuir selesaun ba membru Parlamentu Nasional tuir kriteria hanesan; simu vizaun no misaun PR.

Vizaun mak uma lisan ida ba Timor oan hotu, nasaun ida ho oportunidade nomos misaun mak luta ba moris diak, unidade ho demokrasia. Kandidatura tenke iha kapasidade lideransa, organizasaun ho reprezentasaun, rejistu militante minimu rihun lima (5000) ho kopia eleitoral validu. Laiha involve iha krime, feto iha vantage. Iha koinesementu iha area ida ka rua tuir mai nee lei, edukasaun, ekonomia, agrikultura ho anginaria. PR loke fatin ba nain sanulu.

Tuir Vicente, PR tuir ona eleisaun Parlamentar dala rua ona. Iha eleisaun Parlamentar 30 Junhu 2007, PR  hetan votus 1,06%, maibe lahetan kadeira iha Parlamentu Nasional, tanba total votus lato’o 3%. Iha eleisaun Parlamentar 2012 mos PR partisipa, maibe nafatin lahetan kadeira iha Parlamentu Nasional. “Espera katak eleisaun parlamentar tinan nee, ho servisu makaas husi nasional no suku, PR bele hetan kadeira iha Parlamentu Nasional,” dehan nia.

Tanba nee, katak Vicente, depois konsolidasaun iha Postu Administrativu Balibo, iha tempu badak PR sei halao konsolidasaun iha Oecusse. Husi Oecusse ba Munisipiu Baucau.

Hein deit Prezidenti PR nia tempu. Kuandu Prezidenti PR iha ona tempu, ami ba halao konsolidasaun iha Oecusse,” tenik Vicente.

Entretantu, Koordenador PR Postu Administrativu Balibo Augusto Pires hatete, nia garante katak nia sei esforsu an no servisu hamutuk ho strutura foun atu hakbesik an povu husi aldeia ba suku hodi hato’o programa PR nian ba militante no simpatizantes sira. “Difikuldade ba ami mak Estrada hosi aldeia ida ba aldeia seluk no husi aldeia ba suku seidauk iha, tan nee ami lao ain deit. Maibe, ami esforsu an hodi halao programa PR nian nee,” dehan Augusto Pires.*/mik

Facebook Comments

Leave a Reply

Your email address will not be published. Required fields are marked *