Signi Chandrawati Verdial

Signi Chandrawati Verdial

- in Perfil
250
0
Profik Signi

REZULTADU Eleisaun Parlamentar, 22 Juhlu 2017 neebe Tribunal Rekursu aprova iha loron 1 Agostu 2017 hatudu katak membru deputadu foun (IV Lejislatura) hamutuk ema nain 65 ba periodu 2017-2022.  Reprezentante povu sira nee mai  husi partidu 5 kompostu husi Fretilin 23 kadeira, CNRT 22 kadeira, PLP 8 kadeira, PD 7 kadeira no KHUNTO 5 kadeira.

Lista naran deputadu husi Partidu Libertasaun Popular (PLP) nian neebe Tribunal Rekursu aprova mak hanesan, Taur Matan Ruak, Fidelis Manuel Leite Magalhaes, Rosalina Ximenes, Abrao Jose Freitas, Demetrio do Amaral de Carvalho, Maria Angelina Lopes Sarmento, Abel Pires da Silva no Mericio Juvinal dos Reis.

Bainhira to’o tempu  simu posse iha Parlamentu Nasional, iha Tersa (5/9/2017), deputadu Taur Matan Ruak nuudar mos Prezidente PLP la marka prezensa. Eis Prezidente Republika periodu 2012-2017 nee nia fatin subtitui husi membru PLP ida ho naran kompletu Signi Chandrawati Verdial.

Rubrika profil ohin, fo koñese klean liu tan kona ba figura deputada bankada PLP Signi Chandrawati Verdial. La seluk la leet, Ainaro oan nee moris iha Ainaro Villa, 28 Setembru 1979. Aifuan domin husi Luciano Magno no Arttemizaha Verdial nee nuudar oan primeiru husi bin alin nain rua. Nia alin feto ho naran Alina Verdial.

Deputada Signi Chandrawati Verdial forma uma kain ho Jose Barros Leong (Membru Renetil) neebe akaba husi Universidade Satya Wacana Salatiga, Indonesia. Husi sira nia kazamentu nee rezulta oan mane nain rua.

Signi Chandrawati Verdial, hahu eskola Primaria iha Liceu numeru 1 Dili (1986-1992),  Pre Sekundaria iha SMP 1 Dili Comoro (1992-1995), eskola Sekundariu numeru 2 Balide Dili (1995-1998).

Depois remata husi SMA 2 Balide, iha tinan 1998, Signi Verdial kontinua ninia estudu ensinu superior iha Malang, Indonesia, maibe la-konsege hotu, tanba situasaun politika iha Timor Leste nakfilak depois Timor oan desidi Ukun Rasik Aan. Nunee Signi Verdial kontinua fali nia estudu iha Nova Zelandia. Nia hili area politika.

Iha tinan 2013, Signi Verdial hetan bolsu estudu husi Universidade Nasional Australia (ANU) hodi hakerek peskiza no halo publikasaun Journal iha ANU ho tofiku kona ba partisipasaun feto iha dezemvolvimentu iha Timor Leste. Nunee iha tinan 2017 ba kontinua estudu iha Autralia hasai kursu mastradu iha politika ekonomia iha Universidade numeru 1 Australia (ANU), maibe la konsege kontinua ho razaun tenki fila hikas mai Timor Leste hodi asumi kargu hanesan deputada iha Parlamentu Nasional.

***

ULUK mehi hakarak sai ema politika konsege realiza.  Iha prosesu luta ba liberta patria, nia sempre involve an iha frenti klandestina. Nunee, halo nia hanoin makaas liu atu involve an iha vida politika.

Uluk hau sei kiik sempre akompaña hau nia familia hanesan hau nia ama ho hau nia alin nain rua, Atanazio da Luz no Alina Verdial, neebe involve an iha rede klandestina husi regiaun 1 ponta leste no regiaun 4,” dehan Signi Chandra Verdial ba STL iha Uma Fukun Parlamentu Nasional, Kuarta (4/10/2017).

Nia mos dehan katak uluk sei kiik sempre ajuda nia ama no tiu hodi halot sasan hanesan aimoruk no osan, nunee tiu Atanazio da Luz lori sasan sira nee fo ba Falintil sira neebe subar iha ailaran.

Bainhira tiu Atanazio da Luz ho Eugenio Ribeiro alias Assu Metan husi  regiaun 1 lori Falintil sira mai iha  sira nia uma Macarenhas Dili, maka  Signi nia  servisu maka lao kontrola haleu uma hodi hafuhu tentara sira liu mai uma ka lae, nunee hodi hatoo fali informasaun ba nia ama no tiu Atanazio da Luz.

Alein de nee, ninia servisu seluk maka hanesan ajuda tein no lori hahan ba Falintil sira neebe nia tiu Atanazio da Luz lori mai subar hela iha uma Mascarenhas. Signi nia maun Gil Verdial neebe servisu infermeiru sempre halo tratamentu saude ba Falintil sira neebe subar iha sira nia uma Mascarenhas.

Bainhira intelijen tentara Indonesia nian diskonfia katak sira subar ema ailaran iha sira nia uma, maka Signi Verdial lori dukumentu no foto Falintil sira nian ses husi sira nia uma, tanba rona informasaun katak tentara Indonesia atu ba brongkas ka sobu sira nia uma.

Hau nia involve an makaas liu iha vida politika bainhira hasoru malu ho nia kaben Jose Barros Leong. Hau nia kaben membru RENETIL. Nunee hau nia kaben sempre konta istoria mai hau kona ba ninia involvimentu iha RENETIL iha Salatiga too fila mai Timor Leste iha tinan 1996,” dehan Signi Verdial.

 Iha tempu neeba, hamutuk ho nia kaben sempre fo kontribuisaun ba Falintil sira iha ailaran. Konkretiza sira nia kontribuisaun nee mak fo osan ba Falintil sira liu husi nia tiu Antoninho Martins. Tiu Antoninho Martis mate tiha ona.

Kona ba ninia prestasaun, Signi Verdial dehan, iha tinan 2006 nia servisu iha UNDP hanesan asistensia ezekutivu ba Vice Sekretariu Jeral Nasoens Unidas. Iha tempu neeba nia mos halo analiza politika kona ba Timor Leste nia situasaun iha rai laran haree husi parte kultura no vida moris iha sosidade no oinsa atu prevene konflitus hodi fo informasaun ba ninia xefi boot Nasoens Unidas Sr. Finn Reske- Nilsen.

Hahu iha tinan 2006 hau nia intrese iha politika boot teb-tebes. Hau  hakarak involve an iha vida politika, tanba fatin neebe hau servisu iha relasaun makaas ho asuntu politika. Nunee bazea ba inspirasaun husi istoria luta ba Timor Leste ukun-rasik-an no motivasaun husi servisu rasik, iha tinan 2008 hau diside kontinua eskola iha Nova Zelandia iha area politika public,” tenik Signi Verdial.

Iha tinan 2015, Signi Verdial deside rezigna an husi servisu iha UNDP hanesan jestor ba programa ho intensaun ida katak nia tenki involve an iha partidu politika, tanba regulamentus iha UNDP la permite nia funsionariu atu ativamente involve an iha partidu politika.

Realasiona ho ninia inspirasaun no motivasaun atu involve an iha vida politika, maka hahu  tinan 2015 bainhira PLP mosu, nia deside kedas involve an iha partidu PLP ho objetivu ida katak tempu ona nia bele fo ninia kontribuisaun direitamente ba governu no estadu hodi dezemvolve Timor Leste.

Hau hanoin katak espriensia neebe hau akumula durante tinan 15 servisu ho Nasoens Unidas iha Timor Leste no Afganistaun naton ona mai hau para bele kontribui no dezemvolve Timor Leste ida diak liu iha futuru. Nunee bainhira hau sai husi UNDP, hau nia mensajen ikus ba sira katak Nasoens Unidas la presiza hau nia skills, tanba ema matenek barak, maibe hau nia governu presiza hau nia kontribuisaun. Tanba nee mak tempu duni ona ba hau atu kontribui direitamente ho pensamentu ida nee mak ohin loron lori hau mai too iha uma fukun Parlamentu Nasional,” konta Signi Verdial.

Signi Verdial nia mehi no esperansa durante mandatu tinan 2017-2022, nia sei fo ninia kontribuisaun liu husi hadia lei sira neebe Parlamentu Nasional aprova iha kualidade no ajusta ho kontekstu timor nian no asegura katak lei neebe Parlamentu Nasional aprova iha trenu.

Nunee mos oinsa kria mekanismu ida neebe diak liu, hodi nunee sira bele halao knar fiskalizasaun diak liu no kontinua kolabora ho governu oinsa bele hasae kualidade servisu governu nian ho efetivu no efikas hodi bele ezekuta programa governu nian neebe ho objetivu oinsa atu hamenus kiak iha Timor Leste. Liu-liu tau atensaun ba nesesidade baziku no tenki investe iha setor oin-oin, tanba povu mak sai sentru dezemvolvimentu.

Signi Chandrawati Verdial, informa katak violensia domesti laos asuntu neebe difisil atu prevene direitamente bazea ba lei, maibe bazeia mos ba pratika kultura porexemplu ema moris mai domina ho kultura patriarka. Hanesan iha familia fo valor liu ba oan mane, tanba nee hahalok sira hanesan nee presiza halo mudansa husi uma laran ou husi kiik kedas.

“Violensia akontese, tanba ita nia inan-aman sira hanorin ita sempre uza violensia. Tanba nee atu halakon violensia sei lori tempu, maibe agora komesa iha ona mudansa. Tanba ita iha ona lei violensia domestika. Hau nia esperansa ba oin ema sei respeita malu diak liutan,” katak Signi Verdial. Augusto da Costa

 

Facebook Comments

Leave a Reply

Your email address will not be published. Required fields are marked *