Sidade Dili Presiza Master Plan, Eduka Revolusaun Mental

Sidade Dili Presiza Master Plan, Eduka Revolusaun Mental

- in Metro
287
0
rotunda

DILI – Dili nuudar kapital ba nasaun Timor Leste, tan presiza iha Master Plan neebe mak diak no integradu atu bele organiza ordenamentu sidade Dili hodi bele hatudu iha mundu internasional nia matan.

Tuir Jocelino Belmarco nuudar Diretor ba Community Housing Limited, katak Sidade Dili presiza Planu integradu bazeia ba lei ida neebe planu ba tinan 30 ba oin saida mak akontese, maibe buat hotu-hotu tenke ser iha Master Plan.

Master Plan importante tebes iha sidade Dili atu ema la bele harii uma no fatin negosiu arbiru maibe presiza identifika fatin neebe propriu. Laos hari nar-naran deit too hari uma no fatin negosiu iha fatin turismu nian. Tanba nee, konsidera ladun diak no hatudu beleza neebe mak la diak.

Ida nee presiza lei ida ou Master Plan ida nunee area neebe mak governu halo ona Planu ema labele ba halo fali uma iha fatin sira nee,”dehan Jocelino ba STL, iha ninia knar fatin Fatuhada, Tersa (12/9/2017).

Maibe problema agora seidauk iha Master Plan neebe klaru atu organiza Sidade Dili tanba nee ema halo uma tuir nia gostu deit. Kuandu governu la resolve lalais iha tinan lima (5) nia laran, bainhira  governu  hasai Master Plan ba Sidade Dili, nunee atu muda sai Komunidade sira araska teb-tebes nomos muda sai Komunidade sira nee presiza orsamentu neebe boot teb-tebes.

Diretor nee infoma katak, governu foun mai presiza haree situasaun Master Plan sidade Dili laran ho seriadade. Tanba Kapital Dili hanesan odamatan ba ema husi rai liur mai iha Timor Leste. Se lae ema husi rai liur tama Dili laran buat sabraut hela ida nee hatudu imajen la diak ba ema rai liur nomos hatudu ba ema katak Timor mak hanesan nee.

Ema hot-hotu hakarak ita nia rain nee sai diak liu-liu Dili laran, tanba nee komesa agora hanoin ona reorganiza fali sidade Dili,”dehan Jocelino.

Nia reforsa liu tan katak hanesan populasaun, edifisiu governu, eskola, loja, industria no area sira seluk iha neebe, tanba nee kolokasaun nee tenke klaru. Atu nunee governu hatene ona atu halo investimentu nee klaru ona, la presiza ona bongkar pasang neebe hasai orsamentu boot.

Iha fatin ketak tuir Deputadu Demetrio do Amaral de Carvalho bankada PLP, katak “ita nia rejimi juridiku ordenamentu teritoriu iha ona, ita nia esperansa ba Prezidente Autoridade Munisipiu sira bele uza hanesan baze legal hodi jere ou organiza sidade sira liu-liu sidade Dili laran,” nia salienta.

Deputadu foun nee, informa katak lei sira hanesan matadalan ba dezemvolvimentu, tanba koalia kona ba dezemvolvimentu laos Dili deit. Tanba, edifisiu publiku sira laos Prezidente Munisipiu Dili mak kaer, maibe governu sentral nia kompetensia.

Munisipiu Dili iha dezafiu boot atu komunika ho governu sentral kona ba ordenamentu Teritoriu atu refleta Dili nudar Kapital Nasaun Timor Leste,”dehan Deometrio.

Nunee, bele jere ou organiza sidade sira iha Munisipiu diak liu, liu-liu Munisipiu Dili bele sai furak liu tan, tanba Dili sai hanesan Kapital ba Nasaun Timor Leste.

Entretantu, tuir eis Deputadu Cesar Valente de Jesus, governu presiza iha planemaentu ordenamentu teritoriu, oinsa mak bele organiza sidade Dili bele sai furak liu tan iha futuru.

Tinan hirak liu ba iha Kompania ida husi Portugal atu halo levantamentus dadus ordenamentu teritoiu, maibe nia la hatene too agora nia implementasaun too ona iha neebe. Tanba atu organiza sidade Dili nee sai furak planeamentu ordenamentu teritoriu, nunee bele trata sidade nee diak no furak.

Eduka Revolusaun Mental

Dili sai hanesan kapital ba nasaun Timor-Leste maibe lixu kontinua naklekar iha fatin oi-oin hodi prejudika ba beleza sidade Dili. Tanba nee, hakarak kapital Dili sai hanesan sidade sira seluk iha Sudeste Asiatiku presiza sidadaun idak idak atu halo revolusaun metal ba ema ema ida idak nia mental.

Tuir Diretor Ezekutiva HAK Manuel Monteiro katak, agora dadaun sidade Dili la iha ona ninia furak tanba hare ba foer komesa naklekar iha fatin oi-oin. Tanba konsekuensia husi sidadaun neebe maka hela iha Dili la iha konsensia ba soe foer, no ida sai hanesan preokupasaun ba ema hotu nian hanesan sidadaun.

Ita nudar sidadaun presiza halo revolusaun mental ba ita nia an, hakarak sidade Dili sai furak liu iha ema hotu nia matan ita konserteza tenke halo revolusaun mental, husi revolusaun mental maka ita nia sidade Dili sei sai mos,”dehan  Manuel Monteiro ba Jornalista ba STL iha uma fukun Parlamentu Nasional, Tersa  (12/9/2017).

Nia dehan atu hamoris fali beleza sidade Dili, sidadaun tenke iha konsensia ba soe, laos husik foer naklekar iha fatin-fatin kuandu sidadaun maka iha intensaun hanesan nee ida nee sei la resolve problema lixu no ida nee mos sei hamate imajen sidade Dili hanesan kapital nasaun Timor-Leste.

Sidadun hotu tenke iha konsensia ba soe foer hodi nunee bele preserva ita nia biodiversidade ambiental kapital Dili, Dili hanesan kapital nasaun Timor-Leste sidadaun hotu tenke fo kontribuisaun hodi bele sai nasaun neebe maka nia beleza furak hanesan mos nasaun seluk,” tenik Manuel.

Nia hatutan liu tan katak kuandu sidadaun maka la iha konsensia ba soe foer ida difisil sidade Dili sai hanesan sidade sira seluk iha mundu maibe kuandu sidadaun maka iha konsensia liu husi revolusaun mental iha espektativa Dili sei sai sidade neebe maka ho nia imajen diak entre nasaun sira iha sudeste asiatiku.

Iha sorin seluk Sekretariu Munisipal Para Espediente Jeral Munisipiu Dili Jeca Smith hateten sidadaun presiza halo revolusaun mental hodi nunee sidade Dili bele sai hanesan sidade neebe maka iha ninia beleza neebe furak hodi bele atrai sidadaun husi nasaun seluk hodi bele halo sira nia visita mai iha Timor-Leste.

Ita nia komunidade sira tenke iha konsensia hodi soe foer tuir fatin lixu neebe maka governu prepara iha fatin fatin laos soe foer arbiru la tuir ita nia konsensia neebe maka iha, kuandu sidadaun maka hanoin hanesan sei sidade Dili sei ladok husi lixu,” tenik Jeca Smith.

Nia hatutan sidadaun TL presiza duni halo revolusaun mental hodi nunee kapital Dili bele sai kapital nasaun Timor-Leste hodi hatudu ba mundu katak kapital Timor-Leste mos husi problema lixu, kuandu sidaun la halo revolusaum mental ida ne’e difisil sidade Dili labele ses husi problema lixu.

Entertantu komunidade Comoro Jose da Silva katak sidadaun hotu tenke iha konsensia hodi soe foer atu nunee sidade Dili bele sai mos, no bele evita lixu iha fatin fatin hodi bele atrai turista husi rai seluk mai visita iha TL.

Maibe kuandu ita nia komunidade maka la iha konsensia ba soe foer, problema foer sei kontinua no sei difisil muda imajen Dili sai diak liu tanba hare ba fator sidadaun la iha konsensia ba soe foer no ida nee mos bele sai hanesan obstakulu ida ba sidadaun hodi desenvolve sidade Dili,” tenik Jose.

Nia hatutan sidadaun presiza iha konsensia no tenke halo revolusaun mental ba nia an hodi halo mudansa hodi labele soe foer arbiru atu ne’e sidade Dili bele furak liu tan iha futuru. Augusto da Costa/Natalino Costa

Facebook Comments

Leave a Reply

Your email address will not be published. Required fields are marked *