Servisu Laos Buka Titulu

Servisu Laos Buka Titulu

- in Nasional, Top News
217
0
image002

Editora: Carme Ximenes

DILIServisu iha Ministeriu Publiku, laos atu buka  titulu, maibe hatudu profesionalismu no responsabilidade, tuir komprimisiu neebe iha.

Prokurador Jeral da Republika, Jose da Costa Ximenes hatete, prokurador tenke halao servisu ho diak, atu hetan rekonesementu mai husi sosiedade, hare husi esforsu no asaun neebe halo iha tribunal, atu reprezenta vitima sira.

Ita iha Ministeriu Publiku laos buka deit titulu hodi ema bolu Doutor, maibe hatudu profesionalismu maka hanesan faze importante ida, atu halao servisu ho responsabilidade,  dehan PJR Jose, iha serimonia tomada posse ba Prokurador Republika nain 5, neebe halao iha  salaun PJR, Sesta (14/2/2020).

Nia dehan, save husi buat sira nee hotu mak halao servisu, ho kompremisiu de ondra, juramentu neebe halo kaer metin.

Husu mos ba prokurador nain lima, iha buat balu neebe sente la los bele halo konsulta ba malu, labele fo orientasaun sala, se la hatene bele koalia ho kolega seluk, PJR Jose hatete.

Nia esplika tan katak,  Konsellu deside ida nee, tanba hare ba volume de servisu neebe ezije liga ho prosesu neebe tama mai. No prokurador nain lima nee, simu husi sentru formasaun sira la dun iha forsa neebe forte.

Maibe Jose dehan, mai iha Prokurador iha programa neebe barak, halo sira mudansa tebes. Nunee sira hamutuk ho Prokurador nain lima neebe foin simu posse, bele dehan Prokurador hamutuk tolu nulu resin ona.

Iha biban nee mos Prokurador Jeral da Republika Jose da Costa Ximenes  agradese ba formador sira, no mos emposadu sira nia familia, neebe durante nee apoiu sira, atu bele susesu iha knar ida nee.

Hau mos hakarak aproveita oportunidade hatoo agradese  ba formador sira, neebe halo esforsu estraordinariu hodi maneja sira nia tempu, hodi akompana prosesu estajiu ida nee. Sem ita boot sira ohin ita la hamrik iha nee, hodi formaliza tomada da posse ba sira nain lima, hodi tama mai iha familia boot ministeriu publiku nian, dehan Jose

Nia hatutan, hatoo mos parabens ba Prokurador nain lima, no sira nia familia neebe akompana iha sira nia kotuk, tanba sira nia didikasaun no akompanamentu, maka ohin loron bele hetan susesu ida nee.

PJR nee, hatoo nia mensajem ba Prokurador foun sira katak, agora dadaun sira halao ona knaar iha Ministeriu Publiku, tama iha kareira neebe proporiu no prekursu liu ona etapa oin oin, hahu husu prosesu rekrutamentu iha sentru formasaun, liu husi faze pratika no teoria too mai iha ohin loron.

Nunee, sira nia formasaun durante tinan rua fulan nee laos tempu ida neebe naton, ema barak halai liu tanba la konsege enfrenta ida nee. Tanba nee hatoo nia konfiansa ba Prokurador nain lima, atu halao knaar ho diak.

Solisita mos ba esforsu neebe sira nain lima halo, agradese mos ba ekipa neebe akompana sira nain lima, no susesu neebe sira hetan, hanesan mos sira nia esforsu no dedikasaun neebe sira halo.

Iha fatin hanesan, Ministru da Justisa Manuel Carceres da Costa dehan, fo parabens ba Prokurador neebe foin simu posse, espera sira sei halao knaar ho diak, hamutuk ho kolega seluk iha familia boot Ministeriu Publiku.

Hakarak fo parabens ba Prokurador neebe foin simu posse, agradese ba sira nia familia ba akompanamentu neebe fo ba sira, ohin loron bele hetan knar nee, dehan Manuel.

Nia hatutan, agora dadaun ita tama iha faze ida neebe presiza empenamentu presiza dedikasaun, atu loron loron hafoun matenek, atu bele hasai duvidas ba kualidade justisa husi sidadaun sira.

Ministru nee esplika tan katak, laos dehan justisa la iha kualidade laos dehan justisa lalos, maibe justisa neebe hamonu husi Prokurador, Juiz, Defensor no Advogadu sira, kria kondisaun deskontente ba sira neebe lakon iha Tribunal.

Fo satisfasaun boot ba sira neebe menan iha Tribunal, nee dezafiu ba sira neebe halao knaar hanesan justisa iha ita nia rain, hatete Ministru nee.

Governante nee haktuir tan katak,iha faze ida neebe sidadaun sira ezije justisa, kuandu sidadaun rasik seidauk iha konsiensia ida mos no klean, kona ba saida mak justisa nia hakarak.

Ministru nee mos rai hela nia apelu ba Prokurador nain lima, atu hafoun nafatin matenek neebe iha, no fahe matenek neebe iha, no fiar ho matenek no esforsu neebe mak iha, bele kontribui no haforsa ministeriu publiku, atu fo justisa neebe sidadaun sira hein no ezije.

Entretantu Prokurador Jeral da Republika neebe akompana husi Ministru da Justisa, fo posse ba iha Prokurador Republika nain lima, ho kategoria terseira klasse.

Empossadu nain lima nee, mai husi kursu formasaun Prokurador Republika ba dala neen, hahu husi loron 01 fulan Fevereiru 2019, komesa haknar an hanesan Prokurador estajiariu iha Prokuradoria Distrital Dili.

Nunee mos termina sira nia estajiu, iha loron 31 fulan Janeru 2020, molok haknar an hanesan Prokurador estajiu, sira nain lima mos tuir formasaun teorika iha sentru formasaun juridiku Caicoli Dili.

Emposadu nain lima nee, hanesan Prokurador Republika Dr. Claudino do Rosario sei halao knaar iha Dili. Prokurador Republika Dr. Nelson Jose Soares Magno, sei halao knaar iha Bobonaro. Prokurador Republika Dr. Rafael Jeronimo Gusmao, sei halao knaar iha Maliana. Prokurador Republika Dr. Juliao da Silva Correa, sei halao knaar iha Viqueque. Prokurador Republika Dr. Simeao Brito Seixas, sei halao knaar iha Ermera.*Reportajen:Terezinha De Deus

 

Komentariu

Facebook Comments

Leave a Reply

Your email address will not be published. Required fields are marked *