Sei Aumenta Formulariu Rekrutamentu

Sei Aumenta Formulariu Rekrutamentu

- in Nasional
38
0
Lere1

DILI-Komisaun Organizadora ba rekrutamentu membru Falintil-FDTL foun, sei aumenta tan formulariu ba iha munisipiu sira atu joven sira bele konkore ba vaga neebe iha.

Tuir Xefe Estadu Maior Jeneral Falintil-FDTL, Major Jeneral Lere Anan Timur, distribuisaun formularia dadaun sai polemika, tanba joven barak mak la asesu.

Rekrutamentu neebe mak ami halao nee imi mos hatene ohin loron iha polemika boot ba iha nivel nasional, tanba saida mak formulariu 25 deit mak ba suku, se suku ida iha juventude  rihun 10, no balun rihun  20. Tan nee hau sei aumenta formulariu ba suku sira nee iha munisipiu,” dehan Lere Anan Timur ba Jornalista sira iha Palasiu Prezidente Bairru Pite, Kuarta (04/12/2019).

Xefe estadu nee informa espsial iha Dili sei la aumenta formulariu, tanba joven sira presiza bele ba foti deit iha Kuartel Jeral F-FDTL, soke konfuzaun boot iha Dili, tanba nee sei avizu atu nunee joven sira bele simu.

Komandante das Falintil nee  dehan antes joven sira ba simu formulariu, balu lakon ona tanba ho tato iha isin no balun neebe koko hamos maibe sei husu razaun tanba sa mutin.

Formulariu 25 kada suku, dalaruma Xefe Suku sira  tauk tanba joven barak liu, tan  nee halo sira tauk atu Fahe. Husi Dili mak mosu problema barak, foho ladun problema tanba arte marsiais nia baze iha Dili, komisaun prepara ona bainhira formulariu latoo.

Lere husu joven sira tenke hanoin povu no nia rai doben Timor Leste no hanoin ba Dezenvolvimentu ba povu nia diak. Tan nee atu aumenta formulariu masimu joven rihun 20,  karik anivel nasional balun ho idade 16 no 17,  seidauk tama criteria, so idade 18 anos ba leten, nunee  kalkula minimu rihun 20 no masimu 40 too  50.

Hau la fiar timor ho idade 18 anos nee rihun  200, nee hau lafiar, Xefe Suku balun mak inventa katak hau nia suku joven sem mill, nee hau dehan o bosok ona, tenik Lere.

Komandante nee informa vaga neebe mak atu rekruta nee 600 deit, maibe formulariu  neebe distribui kauze rihun 10 too rihun 15. Ida nee lakon tempu no lakon surat tahan no osan maibe ida nee mos laos kestaun, maibe joven sira koko sorte deit.

Estimasaun Lere joven barak mak sei lakon ou laliu iha momentu foti Formulariu, tanba atu foti Formulariu komisaun sei haruka hasai ropa, kuandu isin nakonu ho tato, diak liu labele lakon tempu, nunee mos balun neebe mak ain kadik,  nee mos ladiak, nunee mos selesaun dokumentus, foer deit ida, nee mos lakon, nunee mos inan aman dokumentus lakompletu ida nee mos lakon hotu, no idade liu ona ida nee mos lakon hotu ona.

Lere enkoraza joven sira katak konkore deit hodi buka sorte, se liu agradese labele buka mak lanu no halo krime tun sae, diak liu koko konkore hodi buka sorte deit.

Konaba Sertidaun inan aman sei hare iha timor ka indonezia, biar iha indonezia maibe kuandu o nian domin iha o nia rai iha ka laiha.Tanba rai ida nee tanba domin mak ita fakar ita nia ran, se domin laiha hau mos lakohi fakar hau nia ran ba rai ida nee, komenta Lere.

Lider  masimu F-FDTL nee hatutan atu sai membru forsa armadas laos kualker ema, laos hanesan funsionariu atu dasa rai iha neeba, ou tuur ministeriu ida neebe kualker ema, maibe forsa nee lutu ba nasaun, responsabilidade ba nasaun no vida povu nian no asegura estabilidade no Defeza.

Bainhira tau forsa armadas tenke konfia  nunee bainhira veteranus sira too tempu reforma, sente laran metin.

Ami mak harii Instituisaun ida nee ami mak uma nain, kuandu ami katuas ona ami labele halo ona serbisu uma laran nia, ami entrega ba ita nia oan sira,  ita tenke konfia ba ita nia oan, se tau fali ema badiu ida mak hein fali hau nia uma, nee problema boot, uma nee hau harii kolen, maibe nia mai keta sunu fali hau nia uma, nee karik ita hanoin hotu buat sira nee laos diskrimina malu,” argumenta Lere.

Nunee mos Vise Xefe Estadu Maior Jeneral Falintil-Forsa Defeza Timor Leste, Brigadeiru Jeneral Falur Rate Laek, rekonese akontese problema iha prosesu distribuisaun formulariu ba rekrutamentu membru F-FDTL foun, tanba nee nia parte tuur hamutuk ho Xefe Estadu Maior Jeneral F-FDTL, Major Jeneral Lere Anan Timur hodi fo solusaun.

Nunee mos Ministru Defeza No Interior Interino  Filomeno da Paixao de Jesus antes nee dehan rekrutamentu  Forsa Armadas Libertasaun Nasional Timor Leste foun,  oras nee iha prosesu fahe formulariu ba joven, mas laiha polemika. Karik iha falla ruma, komisaun Organizadora parte tekniko nian seidauk fo informasaun. Emerenciana Pinto     

Komentariu

Facebook Comments

Leave a Reply

Your email address will not be published. Required fields are marked *