SAUDOZU HORACIO TABES

SAUDOZU HORACIO TABES

- in Perfil
231
0
Profil Horacio Tabes

SERIMONIA funeravel husi matebian saudozu Horasio Tabes neebe mate iha tempu funu hasoru inimigu ba prosesu ukun rasik an halao iha Bairo Paut, Aldeia Oebaha, Suku Bobometo, Postu Administrative Oesilo, Rejiaun Oecusse,  Sabadu  (23/9/2017).

Serimonia nee hetan partisipasaun husi represezentante presidenti RAEOA liu husi membru Autoridade Sekretariu Asuntu Adminstasaun, Francisco Xavier Marques, direktores rejionais xefi departementus, padre paroku subrejiaun Oesilo, Antonio Ato SVD, jestor Subrejiaun Oesilo Arberto Punef Nini, seguransa no forsa husi F-FDTL no PNTL inklui reprezentantes husi lideransa autoridade lokal 18 sukus. Partisipasaun partisipante sira nee atu fo homenajen ba saudozu matebian Horasio Tabes neebe dedika nia an iha funu hasoru okupasun Indonesia ba prosesu ukun rasik an.

Iha serimonia funeravel ba saudozu Horasio Tabes nee hahu ho misa neebe dirije husi Pe. Antonio Ato SVD iha Kapela São João Paulo II,  Bairo Paut, Aldeia Oebaha, Suku Bobometo, Postu Adminstrativu Oesilo Rejiaun Oecusse. Misa hotu kontinua fo bensaun ba martires nia kaisaun, no halao viasakra husi Igreja Kapela Paut mai iha fatin semiterio saudozu nia uma durante 15 minutus.

Serimonia hahu ho kantiku hino nasional patria-patria povo no um minute do silensio neebe dirije husi Reprezentante Presidenti RAEOA no ZEESM TL liu husi sekretariu asuntu adminstrasaun Francisco Xavier Marques. Depois kontinua aprezentasaun biografia saudozu Horasio Tabes neebe dirije husi bei oan husi saudozu nee depois kontinua puisi koba saudozu nia luta durante nia halao nia knar hanesan veteranus ida, kontinua bensaun ba semiteriu fatin deskansa saudozu nian.

Hotu tiha hahu serimonia funeravel saudozu nian neebe nia familia mak foti saudozu nee entrega ba iha veteranus sira depois entrega ba forsa F-FDTL no ho lia dadolin husi lia nain sira no entrega bandera RDTL ba familia saudozu husi F-FDTL. Depois lori ba iha fatin deskansa ikus nian no sunu lilin no karii aifunan no kontinua ho diskursu husi reprezenta familia saudozu nian husi Joao Tabes, reprezentante Veteranus RAEOA neebe diriji husi Martinho Dacunha, reprezentante presidenti RAEOA no ZEESM TL neebe lidera husi Sekretario asuntu administrasaun Francisco Xavier Marques. Liafuan badak husi oan kiak mane boot saudozu nian Antonio Oqui.

Serimonia nee, remata ho koa kek no kontinu jantar hamutuk hodi halakon tristezas durante nee familia senti atu hanoin deit ba oin saida maka halo ba nasaun rai doben ida nee nia futuru.

***

HORACIO Tabes ho naran codegu Taul Tabes” moris iha Pot-ana (saben) Bobometo-Oesilo-Oecusse, 1 de Janeiru de 1952.  Saudozu Horacio Tabes hanesan oan mane daha’at (4) husi maun alin nain sia (9) kompostu husi feto nain ida (1) no mane nain walu (8) ho naran kompletu hanesan tuir mai nee; Mateus Tabes (Taeki Tabes), Madalena Tabes (Ace Tabes), Miguel Tabes (Bobo Tabes), Horacio Tabes (Saudozu Taul Tabes), João Tabes (Alefit Tabes), Jose Tabes (Ili Tabes), Cerilo Tabes, Sebastião Tabes (Neno Kae) no Jorge Oki (Mabe Tabes), husi aifuan domin ANTONIO ACE (matebian) no ISABEL TANEPU NENO (matebian). Maun alin nain sia (9) moris iha POT ANA, Aldeia Saben, Suco Bobometo, Sub Rejiaun Oesilo, Rejiaun Oecusse

Saudozu Horacio Tabes moris mai ho situasaun ida neebe simples tebes tamba mai husi familia nebe’e simples duni iha vida lorn-loron nian. Ho nune’e, durante ki’ik to’o forma uma kain i ate hakotu nia is, Saudozu luta hodi sustenta nia familia tomak liu husi vida agrikultura. Moris nudar agrikultor LA hamihis Saudozu nia espritu konaba oinsa atu dezenvolve knua Oebaha nomos partisipa ativamente iha atividade ba prosesu ukun rasik aan.

Saudozu hahu forma uma kain iha tinan 1973 ho nia kaben mak Aurelia Bobo (matebian). Saudozu nia kaben Moris iha dia, 14 de Setembru de 1957 iha Aldeia Oebaha, no fila hikas ona ba Aman Maromak nia Kadunan Santo iha loron 19 fulan Agostu tinan 1998. Infelizmente, Saudozu Horacio Tabes ho nia kaben Aurelia Bobo, husik hela oan kiak hamutuk nain 7 (mane nain 2 no feto nain 5) mak hanesan tuir mai: Antonio Oqui (Anton Oqui), Bernadeta Oqui (Deta Oqui), Albina Oqui (Bina Oqui), Filomena Oqui (Fila Oqui), Madalena Oqui (Lena Oqui), Maximiano Oqui   (Maxi Oqui) no Rosina Oqui (Rosa Oqui).

Dezde sei klosan to’o hari’i uma kain, Saudozu hanesan Joventude no komuidade babainiha Aldeia Oebaha. Iha Tinan 1990-1995 Saudozu subtitui Sr. Armando Mamo hanesan Kepala Dusun (agora Xefi Aldeia) no iha tinan 1995-1999 eleitu fila fali hanesan kepala dusun hodi lidera komunidade Oebaha.

Komfiansa nebe’e komunidade Oebaha fo ba Saudozu Horacio Tabes hodi sai hanesan Kepala Dusun ho nia durasaun tinan 9 nia laran (hahu tinan 1990 to’o tinan 1999). Iha tempu neeba hanesan tempu nebe’e defisil ba Saudozu atu lidera komunidade tamba sempre hetan intimidasaun no ameasas husi Tentara Indonezia (TNI) no Autoridade sira seluk nebe’e ejiste iha Oesilo maibe, Saudozu ho aten brani nafatin hatudu nia lideransa hodi tane a’as komunidade Oebaha tomak nia vida to’o prosesu Referendum remata i ate Saudozu hakotu nia is iha rai Oebaha duni tamba hetan oho husi Milisia Pro Indonezia.

Involvimentu Saudozu Horacio Tabes iha luta ba ukun rasik an mak tuir mai nee:

Iha tinan 1971, Saudozu mos hetan presaun iha tempu kolonializmu hanesan asu liar. Iha tinan 1975, Saudozu sai hanesan militante FretilinIha tinan 1986, Saudozo hanesan membru ba Organizasaun Clandestina Santo Antonio. Iha tinan 1996 to’o tinan 1999 Saudozu Asume mos Cargu hanesan Seksaun Propoganda Politika iha Celcom Bilu Ban’teta-Oebaha. Iha loron, 31 fulan Agostu tinan 1999, Saudozu Horaco Tabes uza nia kna’ar hanesan kepala dusun servisu hamutuk ho estrutura Celcom hodi organiza no mobiliza ka komanda komunidade Oebaha atu prepaa hodi halo kontra atake hasoru militar no milisia pro otonomia nebee preparadu husi area Oecusse no mos Oesilo atu atake komunidade Oebaha

Iha dia, 30 de Agostu de 1999 hanesan loron ikus ba Timor Leste atu deside nia destinu liu husi prosesu votasaun. Iha loron sesta-feira ho data 30 de Agostu de 1999 dadersan Saudozu Horacio Tabes komunika ho estrutura Celcom Bilu Banteta-Oebaha hodi anunsiu ba povu Oebaha katak “Mate ka Moris hela metin Iha Ita Nia Rai” Katak ukun rasik aan. Ho nune’e ho lian maka’as husu ba Populasaun Aldeia Oebaha tenke hatudu neon & aten barani hodi vota ba CNRT. Populasaun Aldeia Oebaha ho antosiasmu tebes  vota duni 100% ba CNRT.

Iha loron 31 fulan Agostu 1999 dadersan, estrutura celcol bilu banteta-Oebaha ho populasaun halibur an iha Uma Lulik Tkene Ma’as hadi hamulak ba uma lulik atu fo kbiit no forza ba povu hodi defende rai ida ne’e. Derpenti deit rona ema hakilar husi parte bairo Kiukole tamba milisia pro otonomia sira komesa ona halo atakasaun ba komunidade iha bairo refere hodi resulta maluk ida ho naran Batista Beno kondisaun grave tebes tamba hetan baku husi milisia pro otonomia.

Iha minutu hira tuir mai, kareta Hartop metan ida mai husi Oecusse atu liu ba Oesilo maibe grupo komunidade Oebaha para nia hodi ameasa atu oho maibe la konsege no husik nia ba liu Oesilo. Wainhira kareta nee liu derpenti deit informasaun to’o Saudozu Horacio Tabes katak, agora dadauk forsa armado preparado ona atu ataka Aldeia Oebaha. Ho nune’e, mosu deskonfia katak ema nebe mai ho kareta hartop metan ne’e intelenjia Indonezia nian.

Hafoin rona tiha informasaun katak ema atu ataka Oebaha, Saudozu Horacio Tabes Organiza komunidade Oebaha hodi prepara atu halo kontra atake hasoru Grupo Sakunar. Ho nune’e orienta komunidade sai hotu prepara katana, rama ambon, aidona no taka dalan iha area ponte kinloki nia sorin mai ho fatuk no ai hodi nune’e inpede movimentu grupo Sakunar. Aliemde ida ne’e, Saudozu mos haruka manu ain nain 2 mak Sr. Antonio Ta’u no Sr. Jaimen Neno atu ba hasoru grupo Sakunar sira iha area Baki nian nudar meius aprosimasaun ida atu grupo Sakunar sira labele estraga komunidade Oebaha inklui riku soin komunidade nian. Maibe, meius ida ne’e la resulta neebe diak tamba, manu ain nain 2 foin to’o iha ponte kinloki nia sorin Grupo organizadu husi Sakunar nian komesa nadodon mai ona ho kareta.

Iha momentu neba, komunidade Oebaha hetan atakasaun mai husi parte rua mak hanesan: Forsa SAKUNAR ne’ebe kompletu ho armas (kilat) ho kareta husi diresaun dalan postu Oesilo komesa tuun ba Aldeia Oebaha nebe’e lidera husi Hendrikus Ta’i (Koramil Oesilo) no Bonevacio Bobo. Forsa SAKUNAR ne’ebe utiliza kilat ho kareta husi diresaun dalan Pante Makasar komesa sa’e ba Aldeia Oebaha nebe’e lidera husi Laurentinho Soares (Moco) no Belarmino Da Costa.

Iha oras tuku 11.00 grupu SAKUNAR husi liña rua ne’e komesa halo ona atakasaun utiliza kilat ka limpeza jeral/operasi sisir ho durasaun tempu oras haat (4) nia laran komesa husi tuku : 11.00 to’o fali tuku 03.00 WTL no komunidade halo kontra atakasaun ida ne’e hodi tuda malu ho grupo milisia sira.  Maibe, tamba grupu Sakunar mai ho kilat ho nune’e komunidade labele halo kontra atake. Entaun populasaun balun konsege halai ba foho ho naran Taenao no Nametan, no ikus grupu Sakunar fokus halo atake ba Saudozu hodi duni nia hahu husi area kinloki no konsege kaer Saudozu Horacio Tabes iha area faela pana (oebelo) tamba Saudozu hasoru los grupu Sakunar nebee tun mai husi area Oesilo nian.

Maizu menus iha ema nain walu (8) ne’ebe utiliza katana mak duni saudozu hodi tesi Saudozu nia kakorok besik kotu no mate duni fatin refere. Mate isin saudozu Horasio Tabes husik hela iha rai leten bairo Oebelo (faela panan) Aldeia Oebaha durante oras tolu (3) nia laran hahú husi tuku: 3.00 to’o 05.00 WTL, iha tuku 05.05 mak foin Ambulancia tula lori ba Hospital Oecusse kota, durante kalan ida tomak no iha loron Dominggu data, 01 de setembru de 1999 mate isin saudozu komesa tula uza ambulancia lori fali ba semitério Oesilo hodi halot/hakoi mate isin.

Saudozu, mate husik hela oan kiak hamutuk nain 7 nebee moris la ho esperansa tamba Saudozu nia kaben mos mate ona iha tinan 1998. Infelizmente, Saudozu mate la husik hela lia menon ruma ba oan kiak sira maibe nia espritu horik nafatin ho oan kiak sira hodi lao tuir dalan los atu defende sira nia moris loron-loron nian

Depois de Timor Leste hetan nia Indepencia, Governu liu husi Ministeriu Solidaridade estabelese Komisaun Homenajen ho nia kna’ar atu rekoilha dadus konaba sidadaun hotu nebe’e kontribui ba prosesu Ukun Rasik An atu bele hetan valorizasaun.

Iha tinan 2003 liu komisaun Homenajen rejista ona Saudozu Horacio Tabes hanesan Martir no hetan duni nia diretu iha tinan 2009. Governu Timor Leste valoriza Saudozu nia sakrifisiu liu husi fo medalha kondekorasaun no simu pensaun nudar martir ho montante USD$.230 kada fulan

Iha tinan 1999, depois de Saudozu hetan oho husi Milisia pro Otonomia halo’ot duni Saudozu nia mate isin iha Aldeia Usapikolen, Suco Bobometo. Razaun hakoi iha Aldeia Usapikolen tamba iha momentu neba situasaun la premite atu lori fila Saudozu nia mate isin mai Aldeia Oebaha hodi halo cerimonia funeral tuir lisan familia Oqui nian

Iha fulan Dezembru tinan 1999, saudozu nia alin ho naran : Joao Tabes fila hikas husi refujiadu  iha Kutete  no refujiadu internal sira komesa organiza familia husi saudozu  hodi ke’e hikas fali mate ruin saudozu nian husi Oesilo hodi halot/hakoi fali iha Aldeia Oebaha, Suku Bobometo (Oesilo) tuir cultura funeral Atoni Oecusse nian liu-liu Familia Oqui nian

Iha tinan 2016, Familia bo’ot husi Oqui mai vizita Saudozu nia semiteriu hodi sunu lilin no hare konsdisaun semiteriu refere ladun favoravel tamba ne’e, aprovieta mos pensaun nebee Governu oferese kada fulan, entaun familia komesa halo planu hodi hadia Saudozu nia semiteriu mesmu seim kuinsementu husi parte Governu liu-liu komisaun homenajen tamba, Familia Saudozu hetan inspirasaun liafuan husi peritu balun nebe’e hateten katak; La bele husu, Saida mak Nasaun fo ba o maibe tenki husu ba an rasik Saida mak o tenki fo ba o nia Nasaun” liafuan ida ne’e, inspira familia Saudozu hodi hahu hadia semiteriu Saudozu nian. Planu atu hadia semiteiru Saudozu nian hahu kedas iha 2009 wainhira Governu fo ona valorizasaun ba Saudozu maibe, tamba kbiit husi familia lato’o ho nune’e la konsege halo no foin mak hahu konstrusaun semiteriu iha dia, 01 de Julho de 2017 no remata iha dia 14 de Setembru de 2017 ho total orsamentu hamutuk USD$ 15.000 nebe’e organiza rasik husi familia Saudozu nian inklui orsamentu pensaun nesbe simu husi martir.

Renovasaun semitério ida ne’e ho intensaun atu valoriza Saudozu Horacio Tabes ho asuwa’in sira seluk nebe’e aten brani hodi fo an ba mate kontra hasoru inimigu tamba deit Timor Leste atu ukun rasik aan. Abilio Elo Nini   

Facebook Comments

Leave a Reply

Your email address will not be published. Required fields are marked *