Rekrutamentu F-FDTL, Ba Timor Oan

Rekrutamentu F-FDTL, Ba Timor Oan

- in Politics
174
0
CI_2511

DILI-Tuir planu rekrumentu ba membru foun F-FDTL, sei hahu iha loron 25 fulan nee, rekrutamentu nee sei tau prioridade ba timor oan hotu, laos veteranu nia oan deit.

Tuir Kordenador Media Observador Nasional Eleisaun Timor Leste RONETIL, Laurentino Alves, rekrutamentu ba membru foun Falintil-Forsa Defeza Timor Leste sai preokupasaun publiku, tanba prioridade deit  ba veteranus nia oan.

Hau hanoin importante liu tau prioridade hanesan ba ema hotu,  joven hotu iha oportunidade hanesan, iha kestaun tekniku  oinsa mak asegura interese komum,dehan Laurentino ba STL liu husi via telemovel, iha Dili, Kuarta (19/11/2019).

Nia hatutan jerasaun veteranus no jerasaun libertador  nasaun buat ketak ida, importante mak defini rekezitus ba prosesu rekrutamentu tenke klaru katak nia vantajen nee ba ema hotu.

Koordenador Media Ronatil sujere diak liu governu liu husi ministeriu defeza  no instituisaun F-FDTL fo importansia liu husi rekezitus neebe iha, nunee  joven sira hanesan jerasaun futuru nasaun asegura seguransa no defeza.  Nuudar   lutu nasaun membru F-FDTL sira tenke  iha integridade, kapasidade  asegura dezenvolvimentu nasional.

Iha parte seluk tuir Diretur Ezekutivu Fundasaun Mahein, Joao Almeida dehan, rezime rekrutamentu ba membru foun F-FDTL agora iha ona lei estatutu militar nian koalia kona ba rekrutamentu  nian. Tan nee rekizitus sira sai baze ba iha rekrutamentu neebe hatur klaru iha estatutu.

Nia hatutan prosesu rekrutamentu nee importante maka  komprimenta ba rekezitus sira neebe iha nunee rekrutadu neebe tama iha F-FDTL komprimenta ba regras neebe iha no haree husi aspetu saude no konesimentu  fiziku.

Iha lei la temi katak fo deit prioridade ba veteranus nia oan, maibe iha lei nee hatete katak sidadaun Timor oan ho nasionalidade Timor Leste mak iha direitu bele tama iha instituisaun F-FDTL,dehan Joao.

Nia relata iha estatutu rekrutamentu  la koalia kona  prioridade ba grupu A ou grupu B hanesan saida maka Xefe Estadu Maior Jeneral  F-FDTL, Major Jeneral Lere Anan Timur dehan atu prioritiza veteranu nia oan, maibe iha lei nee hatete katak sidadaun Timor oan neebe tuir hahu husi ida neebe tama iha kriteria bele iha direitu atu bele iha forsa armada, naran katak prense rekezitus neebe iha.

Nunee mos  portavos Rekrutamentu F-FDTL 2020, Tanente Coronel, Costantino Moreira, liu husi konferensia imprensa dehan, komisaun rekrutamentu konjuntu husi Ministeriu Defeza, no Falintil-Forsa Defeza Timor-Leste divulga preparasaun rekrutamentu  F-FDTL ba povu Timor oan tomak, feto no mane iha oin 2020.

Maibe iha kriteria nee too deit idade 30, mais komu orientasaun komandu no Ministru Defeza idade husi 18 too 35 nee hanesan informasaun audisional para hakarak fo hatene ba publiku,tenik Costancio.

Liga  ba idade katak Costancio, komisaun prontu atu bele fo informasaun detallu ba publiku wainhira halo distribuisaun dokumentus durante iha sentru divulgasaun sira neebe estabelese iha nasional.

Nunee mos tenke iha sertidaun afiliasaun arte marsiais honestidade importante, tenke iha bom komportamentu husi PNTL, tenke iha foto kloridu medida 3×4 tahan rua, no mos tenke tau iha mapa kor modok ba mane, no mean ba feto. Kriteria  sira nee obrigatoriu aplikante tenke priense.

Enkuantu mekanismu distribuisaun formulariu, tuir Costancio komisaun sei halo ho maneira proposionalidade, joven sira neebe iha interese la presiza mai hadau malu formulariu iha Dili, maibe hein deit iha suku tanba ekipa husi komisaun organizadora sei lori formulariu ba direitamentu too iha suku teritoriu nasional. Katak suku sei hetan  formulariu  25.

Komisaun katak Costancio sei halo prosesu selesaun neebe rigorozu tanba nee mak wainhira responde perguntas iha formulariu tenke ho didiák labele halo foer ka priense sala iha formulariu, tanbá vaga neebe instituisaun loke hamutuk atus neen (600), tan nee, tenke lee didiák perguntas molok responde.

Karik iha difikuldade atu priense formulariu bele liga direita numeru kontaktu 77053692, nunee bele solusiona aplikante sira nia duvidas, tan nee, tenke maksimiza oportunidade neebe iha nunee bele iha idea oinsa responde perguntas neebe iha formulariu laran.

Tempu atu priense formulariu  fulan ida ho balun hahu husi data neebe foti formulariu too loron 3 fulan Janeiru 2020, alen   nee komisaun sei tun direitamente iha suku hodi rekolla formulariu sira hahu hosi  6 fulan Janeiru 2020, karik formulariu iha suku balun la too, bele foti direitamente iha sentru resensiamentu Kuartel Jeral F-FDTL no Ministeriu Defeza Fatuhada-Dili.

Formalariu neebe foti husi resensiamentu Kuartel Jeral F-FDTL tenke hatama fali iha aplikante sira nia suku original, no wainhira atu mai foti formulariu tenke lori ho kartaun eleitoral.

Komisaun rekurtamentu  la permite atu aplikante halo foto kopi formulariu neebe distribui, maibe wainhira iha verifikasaun maka deteta aplikante neebe hatama formulariu foto kopi, komisaun sei elemina,  aplikante sira neebe dokumentu la kompletu sei elemina, nunee halo foer formulariu.

Costancio xamada ba publiku liu liu joven feto no mane neebe iha interese atu aplika iha instiuisaun F-FDTL, labele falsifika dokumentus hanesan iha tempu pasadu, tan nee nuudar Timoroan tenke mai ho dukementus lolos.

Nunee mos Xefe Estadu Maior F-FDTL Coronel Coliati dehan rekrutamentu membru foun  F-FDTL,  maske antes nee xefe Estadu Major Lere deklara katak prioridade ba veteranus nian oan, maibe la taka dalan ba sidadaun hotu no rekrutamentu nee ba sidadaun hotu neebe  prense kriteria.

Prezidente Komisaun ba rekrutamentu Xefe Estadu Maior Coronel Coliati ba jornalista sira bainhira remata hasoru malu ho Prezidente Republika Olo iha Palasiu Prezidente Bairru Pite Dili Kuarta (20/11).

Maior Coronel Coliati hatutan atu fahe formulariu ba joven sira sei hahu iha 25 Novembru, formulariu neebe sei fahe too iha suku liu husi distritu ba iha Sub Distritu, joven sir abele hola parte.

Iha biban nee nia informa situasaun jeral iha teritoriu Timor laran tomak lao hakmatek no kontroladu, polisia iha responsabilidade atu haree konaba kestaun seguransa Interna, liu liu kazu oho malu iha rai laran.

Forsa Armadas suporta polisia bainhira polisia husu, kuandu Polisia iha terenu mak infrenta difikuldade, husu apoiu,  polisia military suporta,tenik Coliati

Iha fatin hanesan Xefe Estadu Maior Jeneral Falintil-FDTL Major Jeneral Lere Anan Timur dehan, soru-mutu neebe halao ho PR atu relata serbisu F-FDTL nian no asuntu  prioritariu sira seluk liu liu rekrutamentu ba F-FDTL  2020.

Hau dalaruma ladun domina tanba nee mak hau konfia sira ba halao deit, tanba nee mak hau fo tempu ba hau nia vise atu informa assuntu rekrutamentu nia, horisehik ami nia ekipa halo ona konferensia Imprensa, agora xefe estadu maior nuudar Prezidente komisaun reforsa tan,  joven feto no mane iha timor laran bele akompana hatene konaba tama vida militar, relata  Lere. Emerenciana Pinto-ESTI 01

 

Komentariu

Facebook Comments

Leave a Reply

Your email address will not be published. Required fields are marked *