Reativa GAM, Haforsa Justisa

Reativa GAM, Haforsa Justisa

- in Politics
395
0
download (1)

Editora:Carme Ximenes

DILI – Governu molok atu reativa Grupu Arte Marsial (GAM) tenke haforsa uluk   intitusaun Justisa, atu nunee bele kondena sira bainhira  komete iha krime.

Akademista UNPAZ, Adolmando Amaral hatete, governu dahuluk hasai rezolusaun atu taka atividade Arte Marsial, maibe  governu da-8 hanoin ona, atu reativa fila fali Arte Marsiais sira neebe liu husi rezolusaun governu haruka taka, ida nee buka atu komprende klean liu tenke governu mak haree.

Bainhira ita reorganiza atividade Arte Marsial, ita tenke  iha sistema, iha rezimentu no lei ida neebe mak forte,para depois   bele regulariza sira nia atividade, tanba ida nee mak hau hanoin governu molok atu reativa GAM, tenke haforsa uluk  intitusaun, entermus seguransa PNTL, F-FDTL no judisiariu  hanaesan iha Tribunal, ita nia Defensor no Juiz sira tenke prontu, dehan Akademista nee ba STL, iha nia knaar fatin Kampus UNPAZ , Segunda (24/02/2020).

Nia dehan, kuandu aban bainrua sira komete krime prosesu sira  nee tenke lao emidiatamente, depois tenke hasai sansaun neebe todan ba  sira, para sira labele lori oraganizasaun nia naran ba halo problema, tanba deit sira nia interese balun.

Ita tenke haree didiak governu mak tenke organizasa diak liu tan, haforsa liu tan parte defeza seguransa , parte legal  sira para bainhira iha problema karaik sira bele prosesa tuir legalidade, dehan nia.

Akademista nee haktuir tan katak, governu mak taka governu mak loke, entaun desizaun politika sira nee se mak iha interese,  ba organziasaun Arte Marsial sira neebe taka tiha, depois loke fila fali

Ita tenke analiza buat sira nee ho didiak, se ida nee uluk sira taka katak, organizasuan sira nee lakontribui ba estabilidade sempre halo prolema iha fatin fatin relasiona ho atividade Arte Marsial sira nee, depois iha tempu neeba governu hasai rezolusaun ida haruka taka tiha, dehan nia.

Tuir nia katak, agora fali governu haree  depois de estabilidade nee lao,  povu nee komesa moris hakmatek  mais governu hakarak reativa fila signifika katak, governu da-8 molok hasai rezolusaun karik sira halo ona estudu ruma, estudu sira nee sai referensia naton ba sira hodi reativa fila fali.

Aleinde ida nee Akadesmita nee mos  konsidera katak, governu reativa GAM ho  situasaun agora, entaun interese ida nee laos joven sira iha organizasaun tolu ne,  maibe ema sira neebe hasai rezolusaun nee interese liu ba rativa organizasaun tolu nee.

Hau bele hatete katak taka loke nee se mak iha interese liu, nee ema politiku sira tanba sira hatene katak organizasaun tolu nee iha masa, entaun para bele aproveita masa husi organizasaun tolu nee,mak sira tenke halo politika ida diak ba sira, para depois aban bainrua sira nia interese nee bele hetan responde, nia hatete.

Nia dehan, agora  governu da-8 mak reativa fila fali, haree husi prespetiva politiku nee katak,  falta deit tinan rua ho balun ba fali ona ba Eleisaun Parlamentar, entaun iha momentu neeba  hotu hotu buka masa, hahu halo politika ida neebe bele asegura sira iha kampana Eleitoral tinan 2023, sira bele hetan pontus ruma hodi bele ukun.

Iha sorin seluk  Vise Retor Asuntu Akademiku UNDIL, Hugo Lourenco da Costa katak, governu iha hanoin ona,  atu reativa Arte Marsial tenke hadia uluk lei  nunee bele kesi metin oknum sira, neebe envolve aan iha Arte Marsial nee bele  lao tuir lei no regulamentu.

Ba hau laos Arte Marsial sala so ema sira neebe tama iha organziasaun Arte Marsial nee, mak uza sala tiha organizasaun arête marsial nee. Needuni atu reativa nee la iha buat ida maibe tenke hadia uluk lai lei  karik oknum Arte Marsial ida mak halo sala lei nee tenke forte, dehan nia.

Nia dehan, needuni atu dehan mos organizasaun sira katak, tenke  kontrola nia membru sira katak laos formasaun fizika deit, maibe tenke fo formasaun mos ba siraa nia karakter mental no moral nee tenke iha.

Etretantu   governu da-8 liu husi enkontru Konsellu Ministru aprova proposta rezolusaun governu numeru 16/2013 10 Jullu bandu atividade Grupu Arte Mmarsiais. Maibe tenke tuir lei numeru 5/2017 kona ba atividade Arte Marsial no arma branka. Lei nee mai hodi kriminaliza pratika no ilisitu Arte Marsil no pratika ritual sira iha kontestu GAM.

Presiza Tuir Lei

Prezidente Republika Francisco Guterres Lú Olo hatete, governu reativa Arte Marsial, tanba nee Membru GAM presiza tuir lei neebe mak iha.

Hau hakarak hatete, deit ba joven sira neebe mak involve iha GAM tenke lao tuir nafatin lei, neebe governu  husik hela ona ba ita boot sira,ida nee hanesan desportu, nudar Timor oan no organizasaun desportiva Timor nian, Dehan PR Lú Olo ba Jornalista sira, bainhira halo abertura ba Konferensia Nasional Komisaun Anti Korupsaun (KAK), iha Salaun Ministeriu Finansas, Aitarak Laran, Dili.

PR dehan, governu reativa Arte Marsial hanesan desportu ida atu nunee membru sira bele lao tuir, tanba nee mak membru sira presiza kumpre lei neebe mak iha.

Reativa Arte Marsial liu husi lei neebe mak iha, lei numeru 5/2017 ita hakarak haree arte marseais sira nee hanesan organizasaun desportiva, prontu lao tuir dalan lei nian, atu bele partisipa iha desportu, dehan Xefe Estadu.

Aman Nasaun nee haktuir tan katak, kona ba atu reativa Arte Marsial nee, antes nee Xefe Estadu mos husu atu bele reativa tanba ida nee hanesan komprimisiu Politiku iha tempu kampana.

Uluk kedas hau hatete katak, halo lei ida para reativa Arte Marsial liu husi komprimisiu politiku, neebe husi partidu politiku hotu, neebe mak koalia durante iha kampana eleitoral, hatete Aman Nasaun nee.

Nia dehan, lei nee iha tiha ona, lori fali rezulusaun ida taka tiha fali lei, rezulusaun laiha forsa tuir lei, tanba nee mak governu agora loke fali dalan ida nee ba lei nee atu nunee bele Arte Marsial reativa fali.

Iha fatin hanesan Diretor Luta Hamutuk Jose Alves Da Costa hatutan, reativa Arte Marsial nee hanesan komprimisiu politiku, neebe mak halao husi partidu politiku sira iha tempu kampana, uja Arte Marsial hanesan lina frontal ba iha kampana, tanba nee mak hakarak ka lakoi tenke tuir komprimisiu neebe mak iha.

Diak liu reativa fila fali, atu nunee bele organiza ho diak oinsa mak bele garantia situasaun pas no establidade, se kuandu kontinua la fo espasu ba sira, maibe ema treinu kontinua lao nafatin iha nakukun laran hau hanoin diak liu reativa fila fali organizasaun sira nee, ami nia sujestaun mak oinsa organizasaun Arte Marsial labele nakfilak ba partidu politiku ida nee ladun diak, tanba nee instituisaun estadu nia, dehan Jose. Rep:LucianaXimenes/ Emerenciana Pinto/ ESTI 02.

Komentariu

Facebook Comments

Leave a Reply

Your email address will not be published. Required fields are marked *