Propoin CNRT-FRETILIN Forma Governu

Propoin CNRT-FRETILIN Forma Governu

- in Politics
149
0
images

Editora: Carme Ximenes

DILI – Lideransa Partidu Demokratiku (PD) propoin CNRT ho FERTILIN hamutuk forma governu grande inkluzaun, atu nunee bele solusiona impase politika iha rai laran.

Xefe Bankada PD Antonio da Conceicão hatete, oras nee Prezidente fo fali ba partidu politika sira atu buka dalan ba solusaun impase, dalan nee tenke hahu kontaktu entre parpol sira, maibe too agora Prezidente PD sei kaer ba PD koalia ho PR kakat presiza hanoin problema nasionais nian neebe afeta ba governasaun tomak.

Tanba tuir nia katak, governasaun neebe atu hamosu nee, tenke governasaun ida neebe, bele asegura sustentabilidade ba futuru, liu-liu atu solusiona impase politika hanesan diferensa politika durante nee eziste too agora.

Deputadu nee haktuir tan katak, PD halo ona reuniaun horsehik lokraik. Ohin hahu haruka karta ba FRETILIN ho CNRT, atu nunee bele hanoin forma governu grande inkluzaun hodi bolu partidu kiik sira.

Proposta nee ami husu katak se bele tenke iha governu foun grande inkluzaun, neebe ami koalia liu ba partidu boot 2, FRETILIN ho CNRT grande, inkluzaun nee hatama ami kiik sira iha laran. Ami deside tanba hakarak atu kontribui ba solusaun simu ka lasimu, maibe hakarak atu kontribui ba solusaun, hatete Antonio ba jornalista, iha PN, Dili, Kuarta (12/2/2020).

Nia esplika, nee mak sira nia pensamentu neebe realistiku, hakarak aprezenta ba sira ho hanoin dehan katak, governasaun unidade nasional mos hamate ezistensia demokrasia iha PN, maibe koalia ba governasaun inkluzaun ezistensia partidu iha nafatin maibe bele inklui membru husi partidu sira.

FRETILIN ho CNRT forma governu inkluzaun, hodi inklui husi partidu seluk sempre posibel, atu hakotu impase politika. Tanba nee mak PD buka atu partidu boot rua nee hamutuk, tenik Antonio.

Kestaun nee sira halo tanba esperensia uluk iha governunasaun mudansa husi V no VI nian, FRETILIN deklara katak sira latama iha governasaun, maibe nia ema membru sira tama hanesan PM Rui Maria de Araujo no Ministru sira seluk.

Esperensia iha ona, agora bale halo fila fali, uluk bele tanba sa mak agora labele, Xefe Bankada PD nee hatete.

Nunee mos Xefe Bankada CNRT Duarte Nunes hatete, sira fiar katak PR hatene ona dalan neebe maioria komunga hola posizaun, hola desizasaun tuir maioria nee hakarak neebe, fiar PR sei bele buka solusaun neebe justu no demokratiku ba rai ida nee.

Nia esplika, CNRT prontu ba opozisaun, kestaun  lainvolve CNRT iha governu bele hakotu impase kalae, ida nee karik partidu sira seluk sente sira iha forsa atu kaer ukun nusa labele fiar sira, nasaun nee demokrasia mak hanesan nee.

Entretantu jornalista koko konfirma ho deputadu sira husi Bankada FRETILIN, maibe liu husi media office Bankada nian hatete katak, sira seidauk bele fo komentariu tanba nee hein tempu seluk.* Reportajen : Guilhermina Franco / Jeniche da Costa

 

Komentariu

Facebook Comments

Leave a Reply

Your email address will not be published. Required fields are marked *