Programa Lima Iha OJE 2020

Programa Lima Iha OJE 2020

- in Politics
49
0
image002

Editora: Carme Ximenes

DILI– Governu da-8 tau prioridade programa importante lima, iha Orsamentu Jeral Estadu (OJE) 2020, neebe ho montante biliaun $1,668.

Dehan Primeiru Ministru Taur Matan Ruak, liu husi nia interevensaun, iha debate jeneralidade OJE 2020 loron dahuluk, iha Parlamentu Nasional, Dili, Kuarta (15/01/2020)

Prioridade Governu ba 2020 liu husi proposta Orsamentu Jeral Estadu, atu finansia programa Governu da-8, iha tinan fiskal 2020, neebe iha setor lima mak define ona nuudar prioridade prinsipal, dehan PM Taur.

Xefe Governu dehan, prioridade lima (5) nee mak hanesan Kapital Sosial, Dezenvolvimentu Ekonomiku, Hadia Konetividade Nasional, Konsolidasaun no Hametin Seguransa no Relasaun Esterna no Konsolidasaun no Hametin Justisa, Demokrasia no Direitu Umanu.

Enkuantu total %28,4 husi proposta orsamentu 2020 sei aloka ba ministeriu no instituisaun sira iha setor Kapital Sosial, ho nia distribuisaun %9,5 ba edukasaun, %13 ba protesaun sosial no %7,3 ba saude.

Programa no medida foun sira husi Kapital Sosial inklu halo uma ba veteranu, investimentu iha bee no saneamentu, konstrusaun sentru no postu saude, konstrusaun torre tranzmisaun ba televizaun, sosa ambulansia, konstrusaun eskola no sala aula no kontribuisaun ba seguransa sosial.

Programa daruak mak dezenvolvimentu ekonomiku, investe iha ekonomia no finansa publika iha setor ida-nee maka atu fasilita investimentu setor privadu, kriasaun kampu serbisu no suporta setor agrikultura, expo Dubai, subsidiu ba grupu kooperativa no subsidiu grupu feto iha area rural.

Programa datoluk maka hadia Konetividade Nasional mak hanesan infraestrutura no lojistika, sosa ro Nakroman II no provizaun serbisu foun ba aviasaun sivil.

Programa dahaat mak konsolidasaun no hametin defeza, seguransa, no relasaun esterna mak hanesan suporta polisia komunitaria, suporta polisia fronteira, sosa ro patrollamentu hodi proteje fronteira maritima Timor‐Leste nian.

Programa dalima mak konsolidasaun no hametin justisa, demokrasia no direitu umanu iha Timor Leste.

Governu nia politika bazeia ba Planu Estratejiku Dezenvolvimentu Nasional (PEDN) neebe implementa liu husi Orsamentu Jeral Estadu (OJE) kada tinan, dehan nia

Eis Prezidente Republika atual Primeiru Ministru iha governu da-8 nee hatete,politika hirak nee nia objetivu ba tempu naruk mak  atu halo Timor Leste sai nasaun ho rendimentu mediu altu iha 2030 atu atinje objetivu ida nee, Governu halo investimentu iha infraestrutura no setor importante sira inklui setor saude, edukasaun no agrikultura.

Proposta anterior ho montante biliaun $1,950 tun ba billaun $1,668. Redus millaun $228.

Proposta foun ho  montante biliaun $1,668 kompostu husi Salariu no Vensimentu millaun $235,610, Bens no Serbisu millaun $582,300, Transferensia Publika millaun $329,706, Kapital Menor millaun $31,548 no Kapital Dezenvolvimentu millaun $488,837

Nunee mos, orsamentu atual ba Kapital Dezenvolvimentu ho montante millaun $488,837 (esklui emprestimu) kompostu husi fundu infraestrutura millaun $238,3, neebe destinadu ba sentru formasaun eselensia, Autoridade RAEOA-ZEESM millaun $100,559, destinadu ba projetu oin-oin, ba konstrusaun postu saude no klinika millaun $61 no orsamentu millaun $9,4 ba autoridade no administrasaun munisipal sira neebe destinadu ba projetu oin-oin.

Total orsamentu biliaun $1,668 nee mai husi transferensia fundu petroliferu millaun $996,5, reseita naun-petrolifera millaun $336,8, saldu RAEOA-ZEESM millaun $126,3, doasaun millaun $7,5, emprestimu millaun $73 no saldu husi konta tezouru millaun $254,3.

Debate loron dahuluk jeneralidade, Primeiru Ministru, Taur Matan Ruak, akompana membru governu hanesan Ministru Estadu no Prezidensia Konsellu Ministru, Hermenegildo Augusto Cabral Pereira, Ministru Reforma Lejizlativa no Asuntu Parlamentár, Fidelis Manuel Leite Magalhães, Ministra Finansa en Ezersisiu, Sara Lobo Brites no Ministru Negosiu Estranjeiru no Kooperasaun, Dionisio da Costa Babo Soares. Luciana Ximenes

Komentariu

Facebook Comments

Leave a Reply

Your email address will not be published. Required fields are marked *