Presiza Reabilita Pre Eskolar Buras Kadalak, Moru Eskola

Presiza Reabilita Pre Eskolar Buras Kadalak, Moru Eskola

- in Edukasaun
6198
0
Edukasaun

DILI-Ministeriu  Edukasaun  e  Kultura (MEK), liu husi edukasaun pre  eskolar Munisipiu Dili, sei esforsu atu bele halo reablitasaun ba kondisaun pre eskolar Buras Kadalak, neebe mak too agora kondisaun seidauk diak.

Tuir responsavel edukasaun pre eskolar, Munisipiu Dili, Miguel dos Santos, haree pre eskolar Buras Kadalak  iha Luru Mata ninia kondisaun sei semi permanente. Tanba nee, iha edukasaun Munisipiu Dili, iha planu atu bele reabilita eskola ida nee, maibe posibilidade husi edukasaun.

Tanba nee, ami hatama tiha ona, maibe seidauk iha prioridade ida neebe mak diak mai iha pre eskolar Buras Kadalak ida nee,”dehan Miguel ba jornalista hafoin partisipa iha seremonia graduasaun ba estudantes pre eskolar Kadalak Luru Mata Dili Tersa (05/12/2017).

Maske nunee, esforsu nafatin hamutuk ho edukasaun Munisipiu Dili nian, sei hatama nafatin ninia planu reabilitasaun ba Ministeriu  Edukasaun, tanba pre eskolar nee, MEK  entrega ona ba autoridade Munisipiu Dili, tanba nee, sei koordena ho autoridade Munisipiu Dili nian, atu nunee tinan oin mai, bele realiza reablitasaun ida nee.

Ita haree pre eskolar publika neebe namkari iha Dili laran, barak mak ninia kondisaun mak sei sufisiente hela, inklui pre eskolar ida nee mos, maibe ami sei esforsu nafatin, atu bele dezenvolve eskola sira nee ho diak liu tan ba oin, ita  iha  pre eskolar  hamutuk  ho  Metinaro, Atauro  ninia  53,”dehan nia.

Tanba nee, sira sei tenta nafatin, atu bele loke pre eskolar iha suku hotu-hotu, hanesan iha Akadiruhun, Maskarinhas, Caicoli, area sira nee seidauk hetan pre eskolar, husi numeru 53 nee, haree ba 70%, balun nia kondisaun diak dadaun ona.

Iha fatin hanesan Koordenadora pre eskolar Buras Kadalak, Santina da Costa, hatete, sala prosesu aprendizajen hamutuk ha’at, konaba fasilidade meza no kadeira, bee mos no saneamentu laiha problema.

Ita haree ba kondisaun pre eskolar iha Buras Kadalak ema hotu hatene katak, ami nian pre eskolar Buras Kadalak ida nee, dehan muturabu barak, maibe ami nian kondisaun mak hanesan nee ona, dala ruma komunidade balun kompriende, no balun mos lakompriende, tanba ohin loron ita hotu haree, ami nian kondisaun eskola mak hanesan nee, maibe nuudar koordenadora hamutuk ho professor sira ami sempre halao nafatin ami nian knar,”dehan nia.

Moru Eskola

Inan aman estudantes husi pre eskolar Buras Kadalak husu ba Ministeriu Edukasaun e Kultura (MEK), atu bele halo moru eskola, atu nunee estudante sira labele halo movimentu iha liur.

Lamentasaun nee hatoo husi, Domingos da  Costa  Gusmao, hanesan reprejentante inan aman graduadu, hatete,  bainhira  iha kreatividades  ruma  mosu, professor  sira atu halao iha eskola ida nee, importante  ida mak moru nee tenke halo duni, neebe oinsa mak parte  husi edukasaun Munisipiu Dili ninia, atu bele rekomenda ba Ministeriu, hodi  bele  haree asuntu ida nee, bainhira moru eskola nee diak ona,  entaun kreatividades professor sira nian nee,  bele lao ho diak liu tan ba oin.

Hau hanoin bainhira moru eskola nee diak ona, hau sente kreatividades professor sira nian nee bele lao iha laran ho diak liu tan, depois ita nian oan sira mos husik iha liur deit, hodi halo movimentu ba mai, nee hau sente ladun diak ba ita nian oan sira, ida nee mak hau nian sujestaun ba ita nian professor sira,” dehan Domingos ba jornalista iha pre eskolar Buras Kadalak Luru mata Dili Tersa (05/12/2017).

Iha  parte  seluk, Direitor  edukasaun  Munisipiu Dili, Duarte  Braganca, hatete, ida nee, pozitiva tebes, tanba iha lei baze de edukasaun hatete iha nee ba katak, gratuita obrigatoriu, maibe ida nee atu bele koalia deit iha kontiudu balun neebe  mak iha limitasaun, signifika katak, ida nee  tipu de kontribuisaun laos propinas.

Se tipu de kontribuisaun, responsabilidade edukasaun nee laos deit iha parte eskola ninia, maibe ema hotu-hotu presiza toma responsabilidade, tantu governu, inan aman nomos parte husi eskola nee rasik,”dehan nia.

Nunee mos Direitora  EBC  Farol, Irene Silvina C. S. Morato, hatete, iha oportunidade nee mos, husu ba inan aman  estudante sira nian, atu bele fo kontribuisaun, atu nunee bele hadia moru eskola EBC Farol ninia.

“Iha oportunidade ida nee, hau  hakarak  husu ba inan aman estudante sira nian, atu bele fo kontribuisaun ruma, atu nunee bele hadia moru eskola ida nee, hodi nunee  ami bele kontrola  ita boot sira nian oan iha eskola ida nee, tanba nee, hau husu kedas ba parte edukasaun ninia neebe mak marka mos prezensa iha enkontru ida nee,”dehan nia. Jacinta Sequeira

 

Facebook Comments

Leave a Reply

Your email address will not be published. Required fields are marked *