Presiza Konjuntura Politika  Foun

Presiza Konjuntura Politika  Foun

- in Politics
409
0
images

Editor: Godinho Barros

DILI – Atu hakotu impase politika, presiza konjuntura politika entre partidu politiku (Parpol) 7 neebe hetan asentu parlamentar, antes hakat ba Eleisaun Antisipada (EA).

Prezidente Parlamentu Nasional Arão Noe hatete, ho opsaun neebe Prezidente Republika ho lider istoriku sira foti, entrega ba bankada parlamentar tuir kompetensia bankada ida-idak liu husi partidu bele halo dialogu depois informa bainhira hetan ona konjuntura politika foun, bele garantia formasaun governu foun.

Maibe nee kabe ba kompetensia partidu ida-idak nian no bankada sira, tanba atu bele iha formasaun governu foun tenke iha garantia maioria parlamentar para sustenta se lae mak akontese hanesan 2017 VII governu, neebe atu labele akontese ida nee, tenke iha duni maioria parlamentar para hodi sustenta governu, dehan Arao.

Nia hatutan partidu neebe hetan asentu parlamentar bainhira la hetan konjutura politika ida atu bele sustenta governu, formasaun governu foun, opsaun seluk mak halai ba Eleisaun Antisipada.

Prezidente PN  informa,  movimentu bankada sira iha PN nia parte lakohi tama ba politika partidu ida-idak nian, mezmu hatene maibe labele mete, se lae ema bele dehan PN meta fali asuntu lanetral.

Tuir informasaun katak CNRT, PD, KHUNTO, UDT/FM no PUDD forma governu foun ida nee nia seidauk iha informasaun, bele iha ou laiha, nia parte lahatene, tanba nee nia labele fo komentariu.

Atu hetan konjuntura politika ka lae kabe ba desizaun partidu politika sira neebe hetan asentu parlamentar iha Eleisaun Antisipada povu fo fiar iha 2018 iha partidu 7 mak hetan asentu parlamentar, neebe desizaun nee kabe ba partidu 7 iha parlamentu atu bele halo dialogu hodi hetan konjuntura politiku foun, afirma  PPN.

Nia laos nee deit maibe atu mantein governu anterior hanesan AMP ka ba forma governu foun, ka ba EA nee opsaun sira nee nakloke hotu.

Arao akresenta posivel bele mantein AMP anterior hodi kontinua, bele mos iha konjuntura foun hodi substitui governu, maibe lakonsege, dalan ikus halai ba EA. Eskenariu 3 nee mak agora dadaun nia parte fiar katak husi partidu 7 nee sei iha  konsensus iha PN tanba liga ba interese nasional.

Enkuantu kona ba deklarasaun balu dehan AMP laiha ona, maibe PM kontinua asume nia knaar, ida nee mos problema, maibe nia parte lakohi fo komentariu.

Nunee mos Xefe Bankada PD Antonio da Conceicão hatete, desizaun PR nee mak dehan desizaun matenek hodi dehan katak EA nee opsaun neebe maka sei iha Timor nia oin hotu, maibe laos opsaun primeiru atu hola kedas.

Lao ba mak laiha intendementu nee mak dehan EA nee para hodi konsulta fali povu. tanba konfiansa neebe povu fo ona nee laiha kapasidade no intendementu atu jere. Tanba nee nia hanoin desizaun PR nian bele dehan katak EA nee ultimu rekursu, maibe ladehan katak lae, esplika Antonio.

Laos nee deit husu partidu politiku sira atu halo movimentu politiku hodi koalia ba malu, nee signifika PR fo komfiansa ba partidu sira atu koalia ba malu.  agora fila fali ba partidu sira nia kapasidade atu bele interpreta liafuan sira nee hodi bele halao asaun ruma.

 Tur nia, karik prosesu lao Partidu laiha kapasidade atu interpreta saida mak PR fo nee mak ida-idak tuur iha nia fatin depois halo komentariu, ida nee ladun diak.

Nia relata katak buat importante ba nasaun mak Parpol hotu laos deit atu konkista poder nee, maibe tenke dehan katak iha dever atu halo buat ruma ba nasaun nee. I dever nee iha situasaun agora  presiza konkretiza nee mak PD nia hanoin i PR nia apelu nee hanesan mos saida mak PD nia hanoin.

Ami hatene katak sira seluk mos han malu hela ho sira nia hanoin, i sira lakohi espresa maibe PD nudar partidu kiik nafatin espresa hanoin, komenta Antonio.

Tuir nia, atu ba EA nee ultimu rekursu maibe agora andamentu nee lao hela hein 60 dias, neebe atu bele koalia ba malu, i prosesu nee sei lao hela, sira mos labele dehan antisipa kedas katak ba EA, maibe EA nee opsaun rekursu, maibe ultima solusaun atu nunee bele valida saida mak ema hotu hakarak.

Entretantu observasaun jornalista haree katak oras nee dadaun  bankada 7 neebe hetan asentu parlamentar  liu husi Eleisaun Antisipada iha tinan 2018, oras nee movimentu lao hela iha Parlamntu Nasional.

Liu husi movimentu neebe lao dadauk iha informasaun liu husi media Sosial mos katak, atu forma governu foun nee sei mai husi partidu CNRT, PD, KHUNTO, UDT/FM no PUUD, enkuantu bankada Fretilin ho PLP sei sai hanesan opozisaun iha Parlamentu Nasional. Rep: Guilhermina Franco / Jeniche da Costa

 

Komentariu

Facebook Comments

Leave a Reply

Your email address will not be published. Required fields are marked *