Preokupa, Governu Foti Kareta Xanana

Preokupa, Governu Foti Kareta Xanana

- in Politics
170
0
PN

DILI — Deputadu sira iha uma fukun Parlamentu Nasional (PN) preokupa, membru governu sira atu foti kareta estadu neebe Xanana Gusmao uza durante assume pasta hanesan Ministru Planeamentu Estratejiku no investimentu estranjeiru.

Tuir Deputadu Natalino dos Santos husi bankada CNRT, bankada CNRT hetan telefone husi funsionarius eis Ministeriu Planeamentu Investimentu Estratejiku (MPIE) nian atu foti kareta neebe maun boot Xanana uza.

Hau preokupa tebes, nee laos hanesan Prezidente Partidu CNRT, maibe maun boot Xanana nuudar lideransa Nasional neebe tenke hetan respeita ho tratamentu diak iha estadu, nunee mos ba lider istoria sira hanesn Ramos Horta, Lu Olo, Taur, Lere, Alkatiri no seluk tan.  Iha politika bele diferensa ideias, iha demokrasia nia laran, maibe povu hotu hetan respeitu,” katak Deputadu Natalino ba Jornalista Tersa (10/10/2017) iha PN.

Deputadu CNRT nee informa oras nee dadaun maun boot Xanana halao servisu iha rai liur, maibe membru governu sira hakarak atu foti kareta Xanana nian. Funsionariu governu obriga hakarak foti duni, maibe funsionariu MPIE sira mos la fo, hakarak foti tenke karta despaisu governu.

Enkuantu funsionariu governu nee obriga atu foti iha dadersan, lorkraik, maibe too lokraik funsionariu MPIE mos via telefone haruka membru governu nee foti kareta, maibe sira resposta katak membru governu foun sira iha ona kareta, tanba nee la foti ona.

Nia konsidera hahalok ida nee la valoriza lider sira, sa tan maun boot halo hela servisu estadu nian, tanba nee mak hanesan deputadu la aseita, neebe bolu atensaun ba governu atu haree ida nee.

Tuir nia katak, laiha maun boot Xanana mos ohin loron lakoalia demokrasia, tanba nee lasala maun boot bele uza tanba nia   mos eis titulares.

Hatan ba kestaun nee iha Prezidente Parlamentu Nasional Aniceto Guterres hatete, kareta eis Primeiru Ministru ou Eis Prezidente TL maun boot Xanana nia kareta nee deputadu sira foti iha plenaria informasaun nee los ou lae, nia sei buka konfirma diretamente ho Primeiru Ministru, sera iha ema ruma ka iha tentativu husi ema ruma lori governu nia naran atu husu maun bot Xanana nia kareta. “Neebe presiza konfirma lai, hodi bele hatene klaru kona ba informasaun sira nee,” tenik Aniceto. Guilhermina Franco

Facebook Comments

Leave a Reply

Your email address will not be published. Required fields are marked *