PR Sei koalia ho KSDS Koalia konaba Estadu Emerjensia

PR Sei koalia ho KSDS Koalia konaba Estadu Emerjensia

- in Headline, Nasional, Politics
224
0
download (5)

Editor : Crisogono Magalhāes

DILI– Prezidente Republika Francisco Guterres Lu Olo sei Reune Ho KSDS Konsellu Estadu Atu koalia konaba Estadu Emerjensia.

Liu Husi Komunikadu Imprensa neebe mak STL asesu husi Media Prezidente Republika tersa Kalan 23/03 hatete Prezidente Republika Reune Ho KSDS no konsellu estadu atu koalia konaba estadu emerjensia

Haree ba moras foun husi korona virus neebe daet lalais husi ema ba ema iha mundu tomak no halo ema barak moras no mate ona no, tamba simu ohin pedidu husi Governu atu deklara Estadu Emerjensia, Prezidente Republika konvoka, ho karater urjensia, membrus hotu-hotu neebe halo parte Konsellu Superior Defeza no Seguransa no Konsellu Estadu.

Prezidente Republika, Francisco Guterres Lu Olo, mak sei prezide reuniaun Konsellu Superior Defeza no Seguransa no Konsellu Estadu hodi rona membru sira-nia hanoin kona-ba pedidu husi Governu atu deklara Estadu Emerjensia.

Reuniaun Konsellu Superior Defeza no Seguransa nian sei hahu tuku 9 dadersan no Konsellu Estadu, sei hahu tuku 11.

Estadu Emerjensia signifika katak sei iha medidas neebe sei limita ka supende direitu balun liberdade balun no garantia balun neebe Konstituisaun fo ba sidadaun sira. Governu hanoin katak ho medidas sira nee mak ita bele kombate no hamenus moras nee daet husi ema ba ema, iha Timor-Leste. Governu propoin ona períodu fulan ida ba Estadu Emerjensia.

Hafoin rona ona opiniaun husi membrus Konsellu Superior Defeza no Seguransa no Konsellu Estadu no haree katak presiza halo duni Deklarasaun Estadu Emejensia, Prezidente Republika sei husu autorizasaun husi Parlamentu Nasional, liu husi Mensajen ida. Karik Parlamentu Nasional aprova, Prezidente Rebulika sei deklara Estadu Emerjensia liu husi Dekretu Prezidensial.

Ohin, 23 marsu, molok tuku ida, mak Prezidente Republika simu pedidu husi Governu atu halo Deklarasaun Estadu Emerjensia.

Prezidente Republika, iha ninia mensajen ba povu tomak, iha 20 marsu, tuku tolu lokraik, husu ba instituisaun hotu-hotu Estadu nian no sosiedade tomak atu fo liman ba malu atu prevene no kontrola moras husi koronavirus.

Timor-Leste, liu husi Ministra Saude, deklara ona katak iha ema nain-ida neebe hetan ona moras husi koronavirus.

Membru Konsellu Superior Defeza no Seguransa neebe sei partisipa iha reuniaun nee mak: Prezidente Republika Francisco Guterres Lu Olo, Primeiru Ministru Taur Matan Ruak, Ministru Negosiu Estranjeiru no Kooperasaun Dionísio Babo, Ministru Defeza no Seguransa Filomeno Paixão, Ministru Justisa Manuel Carceres, husi Parlamentu Nasional, Aderito Hugo da Costa, David Dias Ximenes, Abel Pires da Silva, Xefe Estadu Maior Jeneral F-FDTL Lere Anan Timur, Komisariu PNTL Faustino da Costa, Diretor Jeral Servisu Intelijensia Manuel Serrano, Jose Manuel Fernandes ‘Nakfilak’, Cristina da Silva no sei konvida Eis Primeiru Ministru no Ministru Saude Rui Araujo no Infectologista Danina Coelho no Diretor Ezekutivu FONGTIL Daniel Santos.

Membru Konsellu Estadu neebe sei partisipa iha reuniaun nee mak Prezidente Republika Francisco Guterres Lu Olo, Primeiru Ministru Taur Matan Ruak, Eis Prezidente Republika sira, Prezidente Parlamentu Nasionál Arão Noe, no membru neebe nomea husi Prezidente Republika: Oscar Lima, Alcino de Araujo Barris, Maria Dadi Soares Magno, Laura Soares Abrantes, Faustino da Costa no nomea husi Parlamentu Nasional: Eduardo de Deus Dusae’, Aurora Ximenes, Jose Cornelio Guterres, Arcangelo de Jesus Gouveia Leite, Jose dos Santos ‘Naimori Bucar’.*

Reportajen : Emerenciana Pinto

Komentariu

Facebook Comments

Leave a Reply

Your email address will not be published. Required fields are marked *