PR Preokupa Covid19 Rezulusaun Gov Taka Estranjeiru Tama Tl Vigor Ona

PR Preokupa Covid19 Rezulusaun Gov Taka Estranjeiru Tama Tl Vigor Ona

- in Notisias Online, Politics
195
0
maxresdefault(1)

DILI– Prezidente da Republika Francisco Guterres Lu Olo preokupa ho moras corona virus neebe mak oras nee sai preokupasaun ba iha mundu tomak.
Prezidente Republika hatoo kestaun nee liu husi komunikadu imprensa iha palasiu Prezidente Bairru Pite Sesta 20/03.

Hau mai ohin koalia ba maluk sira hotu, nuudar Prezidente Republika no mos nuudar sidadaun ida neebe preokupa ho ita-nia Povu, ita-nia Pais no mos ho komunidade sira, iha mundu tomak. Hau hahu koalia kona-ba ameasa husi Moras Corona Virus (COVID-19). Ita hotu-hotu rona ona kona-ba virus foun nee, moras aat neebe daet ba mai no lalais tebes, iha mundu tomak. Halo mundu tomak preokupa, Pais hotu-hotu prepara oinsa hases husi moras nee. Balun halo hela kombate no balun konsege ona hetan susesu. Maibe balun seidauk, katak Prezidente republika Francisco Guterres Lu Olo.

Prezidente Republika hatutan Moras nee sei afeta Timor-Leste ka lae, se afeita Saída mak Governu halo ona atu prevene moras foun nee tama iha Timor-Leste Se moras nee tama, sa medida mak governu foti.

Xefe Estadu dehan Organizasaun Mundial Saude, OMS, mak entidade responsavel neebe fo apoiu ba governu hotu-hotu kona-ba saude iha mundu tomak. Pais barak, inklui mos pais vizinu besik, Australia no Indonezia, implementa ona medidas atu prevene no kombate moras aat ida nee.

Liu husi Rezulusaun Governu ikus liu, aprova iha 16 marsu 2020, no sei publika ohin, iha Jornal Republika, Governu Timor-Leste foti tan medidas importantes oin-oin, ho karakter temporariu no estraordinariu, no balun mak nee, sidadaun estranjeiru neebe iha semana haat nia laran liu ba, hela ka liu husi pais afetadu ho corona virus, tuir OMS fo-hatene, labele tama lai iha Timor-Leste. Primeiru-Ministru bele autoriza balun tama tuir kriteriu iha Rezolusaun nee, Konaba hatama merkadoria liu husi portu ka aeroportu, sidadaun estranjeiru sira sei hela iha Zona Internasional, tuir Lei kona-ba Migrasaun no Azilu. Sei asegura posibilidade halo evakuasaun medika urjente no aviaun hodi hatama ai-moruk no material hospitalar mai fo tulun ba ita, dehan PR.

Aman Nasaun nee dehan Sidadaun nasional no sidadaun estrajeiru neebe, tuir Rezolusaun, bele tama iha Timor-Leste, tenke tama iha kuarentena. Governu sei avalia fila fali medida sira nee fulan-fulan.

Lu Olo dehan Espesialmente agora, ho ameasa husi moras foun nee, ida-idak tenke kolabora ho ekipa interministerial no ho Organizasaun Mundial Saude, neebe makaas-an hela atu prevene moras nee tama no, karik tama, labele husik daet ba beibeik husi ema ba ema.

Ita hotu-hotu, Estadu no sosiedade tomak tenke fo liman ba malu atu prevene no kontrola corona Virus, karik tama iha Timor-Leste. Hanesan hori uluk, ita sempre hasoru hamutuk dezafiu oin-oin ho ulun-malirin, brane no determinasaun ho serteza katak ita bele manán! Ita tenke manán kombate hasoru virus Corona. Ho ida-idak no ita hotu nia esforsu ho matenek, dehan Lu Olo.

Nunee mos Primeiru-Ministru, Taur Matan Ruak hatete, Governu Timor-Leste iha ona Planu prevensaun Corona virus hanesan mos nasaun avansadu sira uza mak hanesan halo distansia sosial maibe ida nee aplika iha Timor Leste bainhira tama iha Estadu Emerjensia.

Primeiru Ministru dehan Iha prevensaun ida neebe bolu dehan, distansiamentu sosial. Katak, bandu ema labele lao ba lao mai, labele halibur malu, hotu-hotu iha uma deit. Ba loja karik, labele. Maibe ida nee liga ba estadu emerjensia.

Nunee mos liu husi Konsellu Ministru (KM) estraordinaria, deside solisita Prezidente Republika (PR), Francisco Guterres Lu Olo hodi dekreta Estadu Emerjensia relasiona ho evolusaun no preokupasaun ba situasaun epidemiolojika ba kazu rejistadu husi Corona virus ka COVID-19 iha eskala global. *

Reportaje : Emerenciana Pinto

Komentariu

Facebook Comments

Leave a Reply

Your email address will not be published. Required fields are marked *