PR Husu PN Aprova Lalais Lei KAK

PR Husu PN Aprova Lalais Lei KAK

- in Politics
590
0
image002

DILI– Prezidente Republika Francisco Guterres Lu Olo husu ba deputadu no deputada sira iha uma fukun parlamentu nasional atu aprova lalais Anti korupsaun neebe mak sumba iha Parlamentu Nasional.
Kestaun nee hatoo husi Xefe Estadu Francisco Guterres Lu olo liu husi Diskursu bainhira halo abertura ba Konferensia Nasional Komisaun Anti Korupsaun (KAK), iha salaun Ministeriu Finansas, Aitarak Laran, Dili, Segunda 24/02.

Hau hakarak husu dala ida tan ba deputadu sira atu aprova lalais Lei Anti-Korupsaun. Projeto-Lei Anti-Korupsaun tama fali ona iha Meza Parlamentu, iha 9 Jullu 2018. Liu husi Projetu-lei nee, deputadu sira propoin atu estabelese medidas foun atu halo prevensaun no oinsa kombate korupsaun. Projetu-Lei nee tama datolu ona no ita hotu hein katak Parlamentu Nasional sei aprova iha tempu badak, atu kompleta Kodigu Penal ho medidas espesiais, atu ita bele prevene no kombate korupsaun, dehan Xefe Estadu.

PR dehan Korupsaun ohin loron, laos ona krime ida neebe izoladu no individualizadu. Nível korupsaun iha mundu aas tebes. Globalizasaun, teknolojias foun, dezenvolvimentu aseleradu, fo oportunidade mos ba pratika krime foun ho rekursu ba meius neebe sofistikadu no violentu liu korupsaun mannn dimensaun neebe grave liu no bele iha impaktu neebe boot liu tanba opera ona iha nivel ida neebe transnasional.

Xefe Estadu dehan Korupsaun iha nivel mundial iha mos implikasaun ba seguransa mundial. Situasaun ida nee ezije kooperasaun entre rai sira liu husi monitorizasaun permanente ba risku sira. UNKAK, liu husi artigu 5, hatuur matadalan ba Estadu-parte hotu atu ida-idak dezenvolve ninia Estratejia Nasional ida hodi prevene no kombate korupsaun.

Timor-Leste, nuudar Estadu Parte UNKAK nia, iha obrigasaun atu dezenvolve Politika Nasional Anti-Korupsaun hodi asegura ita-nia Estadu Demokratiku ho kultura ida neebe forte hasoru korupsaun hanesan hatuur ona iha Vizaun KAK nian. Atu hametin kultura forte hasoru korupsaun, ita presiza hatuur ajenda nasional ida hamutuk. Ajenda nasional nee mak Planu Estratejiku Nasional Anti-Korupsaun ida neebe sistematiku no integradu, atu orienta instituisaun hotu lao hamutuk ho vizaun KAK nian, dehan Lu olo.

Aman Nasaun dehan Luta hasoru korupsaun laos fasil. Dala barak la haree ka la sente hahalok aat nee. Tanba nee, ho Estadu Timor-Leste nia naran, nia husu ba sidadaun hotu atu matan-moris, iha ida-idak ninia fatin, no iha momentu neebe deit. Hotu hotu tenke hakaas-an hamutuk atu luta lesuk hasoru inimigu boot ida nee.

Hau fiar katak Timor-Leste bele hiit-an nuudar rai ezemplar ida neebe hatudu dalan ba rai sira neebe nivel dezenvolvimentu lao neineik loos ka kiik tebes tanba nivel korupsaun aas. Ita bele prova katak País kiik bele mos iha governasaun ezemplar. Atu hetan susesu iha ninia misaun, KAK presiza apoiu husi orgaun soberania hotu, liu husi Parlamentu Nasional ho ninia knaar lejislativu no fiskalizador no tribunal sira. Presiza entidade relevante no sidadaun sira-nia apoiu atu tau matan ba area krítika sira neebe iha risku ba pratika korupsaun, hanesan Alfandegas, Aprovizionamentu Publiku, Infraestruturas no Investimentus Publikus, dehan PR

 Lu olo dehan KAK presiza partisipasaun ativa husi sosiedade sivíl, media, no sektor privadu.
Nia dehan Iha evidensia katak país sira neebe la limita liberdade imprensa no direitu sidadaun sira-nian atu espresa-an, mak iha liu susesu iha luta hasoru korupsaun. Povu nia lian importante tebes iha misaun, prevene no kombate korupsaun.

Nia dehan Enkuadramentu legal no institusional deit latoo. Instituisaun sira presiza mos meius, Lei Anti-Korupsaun forte no efisiente no Estratejia Nasional diak ida atu Prevene no Kombate Korupsaun.
Iha fatin hanesan Diretor Ezekutivu Jose Alves Da Costa hatutan Lei sumba iha Parlamentu Nasional tanba nee mak presiza halo ajenda atu nunee bele aselera liu tan prosesu diskusaun ba iha lei kak nia rasik para bele iha kbiit atu halo prevensaun.

Ita espera katak ho ezistensia kak neebe mak iha bele aumenta liu tan atividade estadu nia liu husi kombate anti korupsaun, hanesan prezidente mensiona katak ita nia rai sei boot tanba nee mak sosiedade tomak presiza kopera malu, no presiza hakribi ona anti korupsaun, tanba nee hanesan krime grave nemak neneik sei hamonu ita nia estadu ida nee, dehan Diretor Luta Hamutuk.

Nia mos enkoraza parlamentu nasional atu bele aselera kombate anti korupsaun kuandu laiha kompetensia legais ruma ida nee problema oituan maske tinan 10 ona kak hamrik laiha lei ruma ida nee mos sai hanesan difikuldade

Se kuandu ho lei neebe mak oras nee sumba iha parlamentu nasional mak aselera konsege halo aprovasaun mak kak sei rejolve ho diak, no espera katak ho tinan 10 mai sei bele minimiza korupsaun iha rai laran.

Nunee mos Komisariu Anti Korupsaun Sergio Hornai husu parlamentu nasional atu aselera lei anti korupsaun hodi fo kbiit liu tan ba servisu kak atu kombate korupsaun iha iha timor leste.
Nia mos kontinua husu parlamentu nasional aselera lejislasaun neebe agora sei pendente hela hanesan ezbosu lei anti korupsaun.* (Eme)

 

Komentariu

Facebook Comments

Leave a Reply

Your email address will not be published. Required fields are marked *