PR Apoiu Vítima Insendiu Comoro Agradese

PR Apoiu Vítima Insendiu Comoro Agradese

- in Nasional
172
0
download (1)

ERMERA-Prezidensia Republika oferese sasan nesesidade baziku ba komunidade neebe afetadu Insendiu no dezastre Naturais iha Eis Merkadu Comoro Aldeia 03, Suku Fatuhada.

Xefe Casa Sivil Prezidensia Republika, Francisco Maria de Vasconcelos dehan, Prezidente Republika hanesan Xefe Estadu hakarak espresa solidariedade no domin  ba vítima Insendiu.

Apoiu nee dalaruma kiik liu, tan nee husu atu labele hare ba sasan nia kuantidade,  maibe hare ba Prezidente nia domin no solidariedade  ba sidadaun hotu, dehan Xefe Casa Sivíl Prezidensia Republika nee liu husi diskursu iha Comoro, Domingu (14/12).

Xefe Casa Sivíl mos fiar katak, xefe suku neebe besik liu vítima sira sei atende  vitima sira buka rezolve  liuliu ba dokumentu importante sira neebe lakon.

Ami mai Xefe Estadu hatoo nia solidaridade no nia domin ba ita boot sira neebe mak sai hanesan vitima insendiu, ida nee apoiu ida nee bele dehan kiik liu ita boot, labele hare valor sasan nia, maibe hare ba vontade no domin husi Prezidente Republika nia, dehan nia.

Xefe Casa Sivil relata apoiu neebe mak mai husi Governu nunee mos partidu politiku nian tanba hanoin ba ema nia susar no prezidente republika mos espresa nia solidaridade.

Ami lakohi foti governu nia kompetensia maibe Prezidente Republika prontu atu koalia ho primeiru ministru governu atu serbisu hamutuk atu halo serbisu nee diak liu tan no desizaun Governu nia atu halo fatin muda ka nafatin iha nee  prezidente lakoi ba kahur no lamete maibe Prezidente nia hakarak mak ema hotu iha nia fatin atu hela, sustenta sira nia moris, tenik nia.

Nunee mos Espoza PR Cidalia Lopes Nobre Moujinho Guterres dehan, uma mak fatin no mahon ba ema ida idak atu hela no horik ba, maibe dezastre neebe mak akontese nee mosu derepente no teki teki deit ema hotu la espera.

Hau rona informasaun katak iha sirkutu mak rejulta dezastre, hau nuudar inan sentimentu triste no prezidente republika mos sente hotu hanesan ohin Xefe casa sivil dehan, dehan Espoza PR.

Espoza PR  informa apoiu solidaridade neebe aferese husi PR no maluk sira seluk ba vitima sira pelumenus bele lori netik haksolok iha tempu adventu nee, maske iha tristeza maibe fiar tinan oin mai situasaun bele muda tuir ema  hotu nia esperansa.

Nunee mos Reprezentante vitima, Anselmo Gusmão agradese ba espoza Prezidente Republika Cidalia Nobre Mouzinho Guterres no Xefe Casa Sivíl Prezidensia Republika neebe bele hakat ba too iha vítima sira nia fatin, hodi hare rasik situasaun vitima sira nian.

Anselmo informa katak Prezidensia Republika lataka matan ba vitima sira hodi oferese sasan hirak neebe vitima sira presiza, tanba too oras nee familia lubuk ida mak falta hahan nomos sasan nesesidade baziku sira seluk.

Ami labele esplika, maibe ita boot sira hare rasik ami nia situasaun.  Dezastre nee ita la espera, maibe, família barak agora ami la hatene sira han ka lae, sira hela iha neebe mos ami la hatene, tanba buat hotu ahi han hotu, dehan Anselmo.

Reprezentante vítima nee husu ba parte prezidensia republika atu koalia ho governu, bele fo apoiu ba maluk sira neebe lakon uma, no buat hotu, oras nee laiha kbiit atu hola fali kalen no materiál konstrusaun uma.

Iha fatin hanesan, Xefe Suku Fatuhada,  Marcelino Soares dehan hanesan autoridade lokal agradese ba apoiu husi PrezidensiaRepublika nian ba vítima insendio neebe presiza duni tulun husi parte hotu.

Xefe suku mos louva inisitiva vítima neebe hakaas aan ho kbiit rasik hodi konstrui hela fatin perante situasaun hirak nee. Emerenciana Pinto

Komentariu

Facebook Comments

Leave a Reply

Your email address will not be published. Required fields are marked *