PR Apoiu Kualker Koligasaun Foun *CNRT Aliansa Foun

PR Apoiu Kualker Koligasaun Foun *CNRT Aliansa Foun

- in Headline, Politics
312
0
FOTO : STL/ DONACIANO MAGALHAES ASINA AKTA KOLIGASAUN – Partidu lima, PD, KHUNTO, UDT, PUDD, FM, hamutuk CNRT, asina akta ba deklarasaun konjuta kooligasaun foun ba Governu da-sia, iha Sede Partidu CNRT Bairru dos Grilus Dili, Sabadu (22/2/2020).

Editora:Carme Ximenes

DILI – Prezidente Republika  Francisco Guterres Lú Olo, prontu fo apoiu ba kualker koligasaun foun neebe forma husi partidu politiku sira,  atu nunee bele hakotu impase politika iha rai laran.

Dehan Xefe Estadu ba jornalista sira, hafoin serimonia resesaun ho diplomata internasional, iha Palasiu Nobre, Lahane, Dili, Sesta (21/02/2020).

Hau hanoin importante mak partidu politiku sira buka malu ba, depois mak bele fo hatene ba Prezidente Republika, kona ba Governu ida neebe mak sente ba diak atu bele lori ita-nia rai nee ba-oin. Prontu, Prezidente Republika sempre fo apoiu nafatin, atu ita bele ultrapasa krize ida-nee, atu bele hadia fali ita-nia Governu, Xefe Estadu hatete.

Lú Olo haktuir tan katak, ema hotu hakarak iha governasaun ida neebe sustentavel durante tinan rua ka tolu nia laran, hodi iha fali orsamentu, iha fali programa, atu nunee bele halao dezenvolvimentu.

Ita hakarak iha governasaun ida neebe sustentavel durante tinan rua ka tolu nia laran, hodi iha fali orsamentu, iha fali programa atu bele halao dezenvolvimentu, PR Lú Olo hatete.

Prezidente Republika mos hakarak atu fo tempu ba partidu politiku sira, liu liu lider sira, atu konsulta ba malu hodi hetan rezultadu ruma.

Ita fo tempu ba partidu politiku sira, liu liu ba ita nia lider sira, lider partidariu sira atu tuur hamutuk hodi koalia ba malu, Xefe Estadu salienta.

Iha fatin ketak Diretor Ezekutivu Luta Hamutuk Jose Alves da Costa dehan, kualker partidu politiko ida neebe deit mak halo koligasaun  kaer governasaun da-9, importante mak garante ba tinan tolu, labele devorsiu tan iha dalan klaran.

Kualker koligasaun husi partidu neebe deit, mak atu kaer  governu da-9 importante mak garante tinan tolu, labele iha tinan ida ka rua la gosta malu devorsiu fali, halo estadu ulun moras, hau hanoin ida nee ladun diak, hanesan foin lalais nee hatudu katak, sira inkapasidade no laiha komitmentu neebe mak AMP halo, hatete Diretor LH nee.

Nia dehan, AMP neebe segundu hasai koligasaun husi AMP, forma fali AMP seluk, ida nee ladun diak, tanba nee  tenke mai ho komitmentu, labele ho tendensia politika.

 Jose hatutan, sei bainhira governu agora mak lidera husi CNRT, partidu mantein nia ema nain hitu, neebe PR posse ida nee iha problema oituan.

Hau hanoin ida nee iha problema oituan, karik AMP kontinua nafatin nia membru neebe mak la posse husi Prezidente Republika, iha governu da-8, depois ikus forma husi governu da-9 mak posse ida nee iha problema oituan, maibe depende ita haree tok tanba politika nee ohin bele koalia A no aban bele koalia B, Jose hatete.

 Luta Hamutuk husu lider sira labele lasu malu, maibe koko harii governasaun da-9 nee, metin prosprio, atu nunee governasaun  dura too tinan tolu.

Nunee mos Koordenasaun Redi Observasaun Nasional Eleisaun Timor Leste, Laurentino Alves hatutan,lider partidu politiko sira nee mesak mai husi ema rezistensia deit, tanba nee  presiza tuur hamutuk ho ulun malirin, atu hakotu impase politika nee.

Nia hatutan,forma governu husi partidu ida neebe deit importante mak, tau intrese nasional nee aas liu dukue intrese partidu nian, atu nunee bele halo dezenvolvimentu ba povu nia moris diak, labele halo koligasaun ohin aban devorsiu ida nee hatudu ezemplu neebe mak ladun diak.

CNRT Aliansa Foun

Partidu neen (6) entre  CNRT, PD, KHUNTO, UDT, PUDD no Frenti-Mudança (FM), asina ona akta koligasaun,hodi forma  governu da-9.

Deklarasaun asina akta Partidu Consello Nacional Reconstrução de Timor (CNRT) Kay Rala Xanana Gusmão, informa liu husi konferensia imprensa, iha sede CNRT, Bairros dos Grilhos, Dili, sabadu,(22/02/2020)

Partidu neen (6) ami hamutuk sei hakotu impase polítika no ami asina ona akta. Ami fiar katak kadeira 34 sei garante estabilidade governativa, dehan Xanana.

Iha fatin hanesan eis Prezidente Republika Jose Ramos Horta hato parabens ba Xanana, Prezidente no Sekretariu Jeral  partidu politiku sira, neebe integra iha koligasaun foun, hodi forma governu da-9.

Nia dehan, partidu plotiku sira rona mensajen neebe apela husi Prezidente Republika, atu partidu politiku sira buka malu, hodi buka solusaun, no dalan sira hetan mak nee maioria iha parlamentu no bele garantia kadeira 34.

Hau fiar Governu nee bele kumpri nia mandatu to tinan 2023, hodi kontinua hadia buat hotu neebe dadaun nee lao dadaun, nia esplika.

Nia hatutan, hanesan eis Prezidente Republika no  sidadaun  babain  no la iha papel ofisial no instituisional, maibe hakarak buka tulun lider partidu politiku buka solusaun, hodi hadia nasaun nee hodi lao ba oin.

Nia admite, 34 nee signifika iha maioria, aleinde ida nee, koligasaun tenke iha matenek ho diplomasia neebe diak bele hetan apoiu, liu-liu orsamentu nian nee no orsamentu nee rasik lider partidu FRETILIN  Mari Alkatitri hatete katak, Partidu politiku sira halo dialogu ida, nunee bele kontribui orsamentu para bele hetan unamilidade iha PN.

Entretantu Sekretariu Jeral Partidu Democratico Antonio da  Conseicao hatete, dadaun nee komunidade  tomak preokupa hela ho situasaun neebe dadaun Timor hasoru katak, posivelmente sei iha tan Eleisaun Antesipada.

Ami nia resposabilidade ida mak fo mensajen ba povu katak Eleisaun Antesipada sei la iha, tanba koligasaun ida neebe dadauk  nee bele viabiliza governu ida ( Governu-9), nia hatate.

Nia deha aktu pokitika neebe partidu sira iha koligasau halo nee hodi normaliza situasaun, nunee povu bele iha konfiansa katak buat foun sei mai tan.

Konkordansia ida nee mak ami halo liu husi akordu neebe mak ami asina ona, hodi dehan partidu iha ona koligasaun  foun, nia realsa.

Nia dehan, asina akta nee laos iha intesaun ida neebe atu kolia kona ba estrutura  governu da-9,maibe nee hansan hatudu ba povu tomak katak, Eleisaun Antesipa sei la akontese tan, hodi kompleta governasaun neebe ema hotu fo ona nia votus ba.

Maioria Parlamentar mak ida nee, portantu estabilidade governu nee mai husi Parlamentu nee rasik, hanesan 34 votus signifika iha ona maioria, nia hateten.

Akta koligasaun nee asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente En-ezersísiu UDT, Rodolfo Aparício Guterres, Prezidente Interinu FM, Egídio de Jesus, Prezidente PUDD, António de Sá Benevides.

Akta koligasaun nee asina hosi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente En-ezersísiu UDT, Rodolfo Aparício Guterres, Prezidente Interinu FM, Egídio de Jesus, Prezidente PUDD, António de Sá Benevides. Rep:Emerenciana Pinto/ESTI-01

 

Komentariu

Facebook Comments

Leave a Reply

Your email address will not be published. Required fields are marked *