PR Ajuda Vítima Insendiu Ermera

PR Ajuda Vítima Insendiu Ermera

- in Nasional
196
0
download (1)

ERMERA– Prezidente Republika ajuda sasan nesesidade baziku ba vitima afeitadu insendiu no dezastre naturais, iha postu administrativu Hatolia zona B, munisípiu Ermera.

Sasan hirak nee oferese direta husi Xefe Kasa Sivil Prezidensia Republika Francisco Maria de Vasconcelos, ba vitima sira iha eskola ensinu baziku, aldeia Hatupá, suku Lisapat.

Bainhira entrega sasan ba vitima sira Xefe Casa Sivíl liu husi diskursu hatete, Prezidensia Republika oferese sasan hirak nee ba maluk Vítima sira tanba koopera  ho emprezariu Timor oan sira  hodi bele fo apoiu nesesidade baziku ba sidadaun Timor Leste neebe afeta ba dezastre naturais no insendiu.

Maibe nia dehan, material nesesidade baziku hirak nee, Prezidente Republika Francisco Guterres Lú Olo koalia ho emprezariu Timor oan hanesan Oscar Lima nuudar Ermera oan hamutuk ho maluk sira tau hamutuk sasan no finanseiru ho Prezidensia Republika.Hodi apoiu sasan nesesidade baziku ba ita nia maluk sira, neebe  hetan dezastre naturais no insendiu iha fulan hirak liu ba, dehan Xefe Casa Sivíl Prezidensia Republika nee, iha Ermera Sabado (13/12/2019).

Nia dehan, antes nee Prezidente Republika konvida emprezariu Timor oan sira nee ba Palasiu Prezidensial no husu sira, nia meiu no mekanizmu kontribuisaun neebe bele tulun komunidade vitima dezastre naturais no insendiu.

Husi konsulta Prezidente Republika nian nee, Vasconcelos hatete, ikus mai sira prontu hodi kontribui sasan, finanseiru no Prezidensia Republika mos aloka osan, hodi sosa sasan nesesidade baziku hirak nee.

Entretantu mensajen Prezidente Republika ba vitima sira katak,  sasan hirak neebe  parte Prezidensia oferese laos tanba Prezidente  kasian vitima  sira, maibe Prezidente Republika iha nia responsabilidade ba nia sidadaun sira tanba  Prezidente preukupa duni ho sidadaun ida-idak nia  moris.

Tuir Xefe Kasa Sivil nee katak, Prezidente Republika  hatene hela komunidade sira hasoru todan, tanba afeita ba insendiu neebe mak akontese iha fulan hirak liu ba.Prezidente lahaluha, Prezidente hanoin hetan nafatin tanba nee mak Prezidente hatoo nia komprementus.

Hau mai hatoo mensajen balun ba ita boot sira no Prezidente mos sente laran susar bainhira rona novidade katak, ita boot sira hetan susar tanba ita boot sira nia uma hetan ahi han laos deit uma, maibe sasan sira iha uma laran, Xefe Kasa Sivil nee hatete.

Vasconcelos dehan, Prezidente laos orgaun ezekutiva atu halo buat hotu, maibe Prezidente hanesan Xefe Estadu hakarak tau matan nafatin no koalia ho orgaun sira hotu, atu bele kria kondisaun atu nunee populasaun sira bele fila fali ba situasaun ida neebe mak normal

Iha fatin hanesan, Xefe Suku Maubu Domingos Noronha reprezenta vitima Insendiu no dezastre naturais agradese ba PrezidensiaRepublika, neebe oferese ona sasan nesesidade baziku ba vitima sira, maibe nia kontinua preokupa mos ho maioria vítima neebe sei hela iha lona okos.

Hanesan autoridade lokal, hakarak agradese ba apoiu husi Prezidensia Republika, no ami rekomenda nafatin atu Prezidente Republika hatoo ba governu hodi tau matan ba vítima sira neebe sei hela iha lona okos, tanba agora mos udan monu rai ona, nia dehan.

Sasan nesesidade baziku neebe Prezidensia Republika oferese ba vitima sira mak hanesan, fos, mina, bikan, kanuru, sanan, masin, super mie, balde, gayung, sakola, tolla, manta, klin, kanedok, trina etu, eskova, pastadente, no sabaun haris.

Dezastre naturais no insendiu iha munisipiu Ermera akontese iha Postu Administrativu Hatolia Zona B espesifikamente iha suku tolu hanesan suku Ura-Hou, Lisapat no Mau-Ubu. Total uma neebe hetan estragus hamutuk 434, tipu estragus mak hanesan ahin han uma (insendiu) hamutuk 98, anin sobu 336 no plantasaun kafe ektares 350. Emerenciana Pinto

Komentariu

Facebook Comments

Leave a Reply

Your email address will not be published. Required fields are marked *