Povu Triste Ho Situasaun Atual

Povu Triste Ho Situasaun Atual

- in Metro
2963
0
ponte-komor-iii

DILI-Nuudar povu kiik sente triste ho situasaun politika atual neebe  lao iha nasaun Timor-Leste (TL), tanba lider politiku sira lakonsidera povu kiik nia konfiansa neebe  tau iha sira nia kabas hodi servi ba povu iha nasaun ida nee.

Tuir Elias da Costa nuudar Akademika Uiversidade Nasional Timor Lorosae (UNTL) katak, tuir lolos membru Parlamentu Nasional sira neebe hetan konfiasa husi povu tuur iha Parlamentu tenki kualia kona-ba intrese povu no nasaun ida nee nia, laos lori konfiansa povu nian ba intrese individu no grupu.

Sente triste tebes ho situasaun politika neebe akontese iha rai doben ida nee, tanba ita nia lider sira lakonsidera povu nia sakrifisiu neebe oferese ona iha festa demokrasia liu husi konfiansa de votus,”katak Elias ba STL iha Kampus Faspol UNTL, Segunda (23/10/2017).

Tuir realidade lider politiku sira neebe hetan konfiansa husi povu, realidade laiha responsavel, tanba situasaun neebe lao larefleta ba nesesidade povu kiik nia preokupasaun neebe durante halerik hela.

Tanba deit ho intrese lider nia lao hela iha rai doben ida nee povu preokupa hela ba nesesidade oioin. Tuir lolos ukun nain sira tenki tau responsablidade ba konfiansa neebe povu fo ba sira atu nunee bele responde ba dezenvolvimentu iha rai doben ida nee.

Maske politika nee dinamika duni maibe oinsa bele fo benefisiu ba sosiedade hotu bele sente sakrifisiu sira neebe povu fo ona. Tanba nee lider politiku sira buka maneira oinsa para bele fo liman ba malu hodi bele servi ba povu doben timor,”katak Elias.

Konfiansa neebe ami fo ba ita boot sira nee hanesan fini ida neebe ami kuda hela iha rai, iha loron aban ami hein katak bele hetan koileta ho buat neebe diak. Maibe ho realidade neebe iha ami lahatene saida mak ami atu dehan fali ba ita boot sira, tanba liu husi festa demokrasia ami oferese ona ba imi,” katak Elias.

Iha fatin ketak estudante UNDIL Mariano V. Amaral katak, situasaun politika dadaun nee nuudar sidadaun Timor oan sente triste ho atetude lider politika sira nian nee nota katak menus intrese nasional, tanba lider sira laho ideis ida hodi hadia dezenvolvimentu.

Ita liga preokupasaun povu nian ba situasau politika dadaun nee sente laran taridu ituan, tanba lider sira launidu no menus familiar entre lider sira neebe reprezenta povu iha uma fukun parlamentar,” katak Mariano.

Tanba dadaun nee tuir observasaun ba situasaun politika nee bele fo implikasaun makas ba konstrusaun estadu. Tanba lider sira lafo liman ba malu hodi tane aas intrese nasional hodi hadia dezenvolvimentu, tanba nee ba lider sira presiza unidade servisu hamutuk hodi bele aselera prosesu dezenvolvimentu.

Tuir Juventude Farol Tomas dos Santos Soraes hateten, situasaun politika dadaun nee hanesan kestaun ida tanba lider sira laservisu hamutuk lafo ideia neebe konstrutivu ba malu atu nunee responsavel ba konfiansa neebe povu fo.

Lider politikus sira latau konsiderasaun ba fiar no votus neebe povu fo sira. Tuir lolos fiar neebe povu fo liu husi eleisaun nee esforsu povu nian neebe lakon tempu iha momentu eleisaun hanesan ema eleitor ida nee duni ukun nain sira mos tenki konsidera povu kiik nia votus,”katak Tomas.

Nunee mos Akademika UNTL Pedro A. Martins dehan, observasaun ba situasaun politiku halo povu sente triste tanba iha tempu kampaina parapol sira ho politika ba promesa konsege hadau povu nia hanoin hodi povu fo ona konfiansa ba sira.

Maibe realidade situasaun dadaun nee lakondis ho promesa neebe sira halao Durante iha faze kampana. Tanba konfiansa neebe povu fo lider sira komesa ona viola, iha balun katak ho ideia edukativu no konstrutivu maibe rezultadu diferente fali.

Partidu politika sira neebe sai hanesan opozisaun deklara katak ho edukativu no konstrutivu, maibe realidade povu hein hela edukativu no konstrutivu nee laiha.

 Tuir lolos, lider sira tenke haree lai nesesidade saida mak dadaun povu presiza. Maske parte ida sentimentu lider sira sente diak maibe povu sente triste boot, tanba nee husu ba lider sira fo fuan ba malu atu tau konsiderasaun ba konfiansa povu nian.Estajiadu UNTL 2 & Estajiada UNTL 4 & Estajiada UNTL5.*

Facebook Comments

Leave a Reply

Your email address will not be published. Required fields are marked *