Povu Sub-Rejiaun Tolu RAEOA, Preokupadu Tebes Ba Kondisaun Estrada

Povu Sub-Rejiaun Tolu RAEOA, Preokupadu Tebes Ba Kondisaun Estrada

- in Distritu
85
0
Estrada

AMBENO-Kondisaun estrada husi Ambeno Vila, Sub Rejiaun Pante Makasar, liga ba Merkadu Pune, Usitasae (Sub Rejiaun Oesilo, Passabe (Sub Rejiaun Passabe) no Suku Ban-afi (Sub Rejiaun Nitibe) tristi tebes ba estrada.

Kondisaun estrada ba rejiaun tolu nee araska tebes. Lapermiti tebes ba movimentu transporte publiku. Problema nee defikulta tebes komunidade iha sub rejiaun tolu nee atu lori sira nia produtu ruma ba merkadu.

Preokupasaun nee hatoo husi Xefe Suku Ban-afi, Jose Tefa bainhira viajen ba Ambeno, foin lalais nee. Komunidade iha sub rejiaun tolu nee triste tebes tamba tinan barak nia laran, sira labele lori sira nia produtu ruma ba merkadu tamba kestaun kondisaun dalan lapermiti ba transporte publiku. Transporte publiku araska tebes atu tama sai area sub rejiaun tolu nee. Komunidade sente hanesan hela iha area izoladu, dok tebes husi merkadu.

Tinan barak nia laran nee, ami hatoo bebeik ba nai ulun sira atu hadia estrada ba ami nia area maibe too agora governu laresponde. Ami la presiza tau alkatraun, pelumenus hadia netik ba. Atu nunee komunidade bele lori sira nia produtu ruma ba merkadu,” hateten Jose Tefa iha Merkadu Pune, Suku Usitasae, Oesilo, Segunda (17/4/2017).

Hanesan ba area Sub Rejiaun Nitibe, sira tenki hakat liu mota 5. Estrada mos tenki hakat liu mota 5 nee. Maibe tinan barak nia laran, desde ukun aan too agora, governu seidauk atende. Sira hatoo bebeik ona ba nai ulun sira maibe too laresponde.

Nudar xefe suku, hau simu kritika barak tebes husi komunidade. Balu dehan, kondisaun estrada aat i too agora governu lahadia, tamba xefi suku mak lahalo proposta ba governu para hadia estrada no ponte. Maibe proposta hau hatoo bebeik ona ba governu lokal. Partisipa enkontru ruma, hau sempre koalia problema nee maibe too agora seidauk iha informasaun ruma atu atende problema kondisaun estrada liga ba Mercadu Pune Usitasae tun ba Merkadu Tono. Nee tenki hakat liu mota 5, kuando tempu udan, ami labele lori produtu ba mercadu,” hateten Jose Tefa.

Kestaun hanesan hatoo husi Xefe Suku Usitasae, Tomas Ulan. Nia dehan, problema estrada husi Ambeno ba foho, nia rasik aprezenta ona ba Prezidente Taur Matan Ruak bainhira vizita sira nia suku, inklui vizita Mercadu Pune.

Iha vizita nee, Prezidente Taur ho nia komitiva konsege hakat liu Mota Na-ose, neebe distansia ba mota nee kuaze 3 kilometrus. Kondisaun dalan nakonu ho fatuk bobot.  Kuandu sae motor labele tula tan ema ida. Kuandu nain rua bele monu, no motor mos bele aat tamba kondisaun estrada nakonu ho kuak, mesak fatuk bobot.

“Prezidenti Taur nia mandatu besik hotu ona. Fulan oin remata. Ami husu ba prezidente foun, se bele tulun ami. Hadia netik ami nia estrada husi Ambeno ba ami nia sub rejiaun. Atu nunee, ami nia komunidade bele lori produtu ruma ba faan iha merkadu,” hateten Tomas Ulan. Est-5

Facebook Comments

Leave a Reply

Your email address will not be published. Required fields are marked *