PNTL Presiza Asegura Seguransa Kalan, MEUJTL Prontu Kontribui

PNTL Presiza Asegura Seguransa Kalan, MEUJTL Prontu Kontribui

- in Politics
3537
0
PNTLll

DILI—Parte akademia husi Universidade Dili (UNDIL) husu ba Polisia Nasional Timor Leste (PNTL) atu aumenta tan sira nia patroliamentu iha tenpu kalan atu bele minimiza grupu deskunhesidu sira neebe uja rama Ambon husi estraga ema seluk nia vida.

Lia fuan hirak nee hatoo husi Reitor Universidade Dili (UNDIL) Estevao da Costa Belo ba STL iha nia servisu fatin Maskarinhas Dili Kinta, (19/10/2017). Reitor nee reforsa tan katak, polisia iha obrigasaun atu asegura seguransa interna tuir lei haruka. Nunee moos tenki halao sira nia knar tuir lei no orden neebe iha.

Tensaun politika sae oras nee dadaun mosu grupu balun halo movimentu iha tenpu kalan tiru rama ambon. Tanba nee maka husu atu polisia halo nia patroliamentu rutina loron too kalan no kalan too loron atu bele asegura estabilidade ba komunidade neebe halo movimentu iha tenpu kalan.

Parte seluk kuandu seguransa no estabilidade rai laran ladiak maka sei taka dalan ba ema investidores husi estranjeirus sira atu mai investe sira nia osan iha Timor. Nunee mos inplika ba povu Timor ida nee sei lasai husi kiak no mukit tanba laiha estabilidade, tanba nee maka presiza ema hotu nia kontribuisaun atu garante estabilidade.

Polisia nee sira tuir lei seguransa interna tenke hasae seguransa nee iha tenpu kalan tanba ami haree iha grupu balun halo movimentu iha tenpu kalan tiru rama ambon. Joven tur iha kios no varanda ida nee ladun diak neebe seguransa makaas liu 24 horas. Se seguransa rai laran laiha maka ema investedores internasional sei la mai investe iha ita nia rain no ita Timor maka sei moris nafatin iha kiak no mutik nia laran,”nia koalia.

Iha fatin hanesan Diretor Ezekutivu Fongtil Arsenio Pereira da Silva dehan seguransa nee parte Polisia nia servisu tuir lei haruka maibe polisia moos ema komunidade babain, tanba nee maka dalan diak maka husu ema hotu nia kontribuisaun atu garante pas no estabilidade. Sira halao nia servisu iha tenpu kalan hanesan halo auto stop ou pasa revista ba motorizadas neebe movimentu iha kalan nee diak tebes.

Polisia halao nia knar diak ita moos labele fo sala ba polisia tanba sira Timor oan sira presiza deskansa no haree ba familia. Ita hotu kontribui sira bele deskansa iha saude diak nia aktividades lao diak nafatin,”nia dehan.

Diretor Ezekutivu HAK Manuel Monteiro Fernandes dehan nuudar sosiedade sivil sente tristi oituan haree ba akontesementu neebe akontese iha Kinta (12/10/2017) semana liu ba neebe mosu konfliktus neebe mosu iha Taibesi Dili maibe familia vitima telefone ba polisia maibe la bele atende. Tanba nee maka telefone fali ba Diretor ONG HAK nia too iha fatin no ajuda telefone ba Segundu Komandante PNTL Dili no komandante nee telefone tutan ba polisia patroliamentu atu too iha fatin neeba.

Manuel esplika, depois polisia patroliamentu lori duni vitima no suspeitu ba postu polisia iha Balide maibe familia telefoni fali ba Diretor HAK dehan polisia dehan hein deit rejultadu investigasaun. Tuir lolos problema sira hanesan nee iha polisia suku OPS no autoridades suku laos ONG nia parte tanbasa maka labele responde problema nee.

 Hau hakfodak kaundu rona komunidade liliu familia vitima iha Taibesi liga ba polisia maibe laba atende. Tanba nee familia telefone ba hau no hau ba iha fatin neeba hau liga telefone ba segundu komandante no segundu komandante nee liga tutan ba polisia patroliamentu maka ba fali atende,”nia salenta tan.

MEUJTL Prontu Kontribui

Koordenador Movimentu Estudante Universitariu Juventude Timor Leste (MEUJTL) Adino Samalulik promote katak movimentu ida nee prontu atu kontribui ba pas no estabilidade iha rai laran. Maibe, ba lideransa sira maka halo politika matan delek no tilun diuk tanba nee husu atu fo ejemplu diak ba jerasaun foun.

Ami prontu atu kontribui ba estabilidade maibe parpol sira mos tenke tau importansia ba povu nia moris. Realidade lider sira taman delek no tilun diuk atu haree ba povu nia moris no husu ba sira atu fo ejemplun diak ba jerasaun foun,” tenik nia.

Iha fatin hanesan Retor Universidade Dili (UNDIL) Estevao da Costa Belo dehan bajeia ba realidade politika neebe mosu iha PN liu husi debate programa VII Governu konstituisional nian signifika katak partidu opozisaun sira nia hakarak governu nee monu. Tanba nee bele moos ba elisaun antisipada karik akontese ona ida nee povu sei fo fiar mali ba partidu neebe maka serve ukun.

Iha konstituisaun RDTL dehan karik governu ida nee monu prezidenti republika fo oportunidade ba partidu segundu mais votadus atu halo nia koligasaun atu forma VIII governu konstituisional. Ida nee dalan diak maibe realidade seluk neebe lider parpol hatudu iha PN nee laedukativu tanba konta istoria deit saida mak sira halo iha pasadu maibe lahare ba saida maka akontese ba povu nia moris agora.

“Tuir ami akademiku nia haree oras nee dadaun iha PN neeba deputadus sira konta sira nia istoria pasadu maka barak liu. Maibe laharee ba povu nia moris maibe inportansia liu ba sira nia aan rasik tanba nee tuir ami nia hanoin katak politika sira nee la edukativu,”nia dehan. Justinho Manuel

Facebook Comments

Leave a Reply

Your email address will not be published. Required fields are marked *