PNTL Identifika Autor Taa Alexandre

PNTL Identifika Autor Taa Alexandre

- in Krime
15
0
c66733db6fd9c6779ab24f57f69f5201_XL

DILI-Komandu Polisia Nasional Timor Leste (PNTL),  Munispiu Dili,  halo hela prosesu identifikasaun ba autor neebe deskonfia envolve kazu  hakanek vitima  Alexandre de Jesus Costa iha Pertamina Bebora.

Agora ami halo hela prosesu identifikasaun ba pesoal ida, no prosesu nee PNTL halo depois rekolla informasaun balun, nunee bele deskobre tan suspeitu balun neebe deskonfia envolve iha kazu nee, dehan Superentendente Asistente Polisia, Euclides  Belo ba Jornalista sira iha nia knar fatin, Komandu Munisipiu Dili, Caicoli, Segunda, (2/12/2019).

Nia informa  dehan, iha Domingu  madrugada (1/12/2019),  iha tentativa omesidiu ba vitima Alexandre iha pertamina Bebora,  pesoal balu konsidera  sai suspeitu no bele iha tan suspeitu seluk.

Euclides hatutan, hafoin rona informasaun kona ba tentantiva omesidiu nee orienta kedas pesoal serbisu investigasaun kriminal no serbisu informasaun  rekolla kedas informasaun. Maske kazu sira hanesan nee la fasil ba PNTL atu halo prosesu investigasaun, inklui buka tuir suspeitu sira ho lais, tan nee presiza haree analiza neebe klean  no rigorozu  hodi fo satifasaun  parte vitima.

Euclides konsidera kronolojia akontesimentu tentativa omesidiu nee segredu prosesual PNTL nian, tan nee husik    ba iha serbisu investigasaun kriminal mak halao nia serbisu.

Nia informa Timor Leste iha ajente rua mak garante seguransa ba povu no nasaun,  ajente ida polisia no ida seluk mak forsa, ajente rua nee jagoan iha Timor laran tomak, no  laiha tan grupu  seluk mak atu jagoan liu fali PNTL ho F-FDTL hodi garante seguransa iha teritoriu Timor laran.

Iha parte  ketak  tuir Peskizador Fundasaun Mahein Sancho Xavier, patrullamentu PNTL iha terenu nee importante tebes , tanba ikus-ikus nee numeru konflitu nee sae makas, liu-liu asaltu malu, sona malu no hama malu  entre joven sira makas tebes.

Nia hatutan natal no tinan foun besik dadaun ona, ema hotu sei konsentra atu selebra Natal ho Tinan foun, tan nee husu ba PNTL atu servisu masimu, tanba iha loron boat sira hanesan nee sempre mosu problema.

Hau hanoin PNTL tenke iha estratejia oinsa atu bele halo prevensaun ba problema sira neebe durante nee sai preokupasaun bot, tanba iha tempu feriadu hanesan ema feriadu nee sempre mosu problema, tanba iha movimentu  ema ba munisipiu barak liu entaun problema nee mos aumenta, dehan Sancho

Vizibilidade PNTL nian katak  labele tuir oras deit, maibe tenki 24 oras nia laran nee tenke iha patrullamentu, laos loron balun deit hanesan oras ualo deit, tanba polisia laos funsionariu publiku neebe serbisu oras ualo deit.

Nia husu PNTL  hadia  oras serbisu iha terenu, liu-liu patrullamentu ka operasaun regular sira tanba nee estratejia ba operasaun sira  nee mak la muda, no hein deit sei la reduz probema iha rai laran.

Ami nia rekomendasaun mak tenke iha vizibilidade no prense fatin ka postu sira neebe monta ona iha estrada sira nee, hanesan postu sira iha suku no munisipiu sira, sujere Sancho.

Nunee mos  Kordenador Media Observador Nasional Eleisaun Timor-Leste Ronetil, Laurentino Alves dehan problema neebe akontese iha kapital Dili, kestaun konsensia juventude sira nian nomos kestaun seguransa hahu husi aldeia ba to iha suku ladun funsiona ho diak.

Ami sujere diak liu funsionamentu  Polisia Komunitaria iha suku laran hametin liu husi operasaun no sosializasaun ho autoridade lokal kordenador juventude xefe seguransa iha bairo laran, tanba ho maneira sira hanesan nee mak sai hanesan opsaun alternativu atu koko minimiza akontesimentu neebe sai hanesan preokupasaun ema hotu nian iha  rai laran, esplika  Sancho.

Juventude sira nia iha bairo laran dalaruma ladun intende malu ho diak, tanba ida-idak ho nia karater neebe la hanesan, ida-idak defende nia maluk no grupu ou kor, tan nee sempre mosu problema. ESTI-01

Komentariu

Facebook Comments

Leave a Reply

Your email address will not be published. Required fields are marked *