PN Pro Kontra Interpelasaun Governu

PN Pro Kontra Interpelasaun Governu

- in Politics
60
0
21392480_1032358820235272_1056240587_o

DILI — Bankada Fretilin kontinua ejize pedidu interpelasaun ba governu hodi esplika planu de negosiu entre Ministeriu Petroliu neebe involvimentu husi Timor Gap no ANP. Maibe pedidu nee diskorda husi bankada maioria.

Liu husi sesaun plenaria Segunda (25/03/2019) iha PN, Deputada Bankada Fretilin Lidia Norberta husu esplikasaun meza hanesan iha lider bankada katak kona ba pedidu bankada Fretilin nian atu halo interpelasaun ba planu negosiu neebe mak governu halo, meza nafatin la ajenda.

Nunee mos Xefe Bankada Fretilin Aniceto Guteres dehan bankada Fretilin hakarak rona lider bankada sira lakonkorda nee razaun fundamental saida, lider bankada lahola desizaun laiha maioria no laiha minoria, karik maioria asuntu nee direitu deputadu ida-idak nian, maibe maioria halo fali maioria ba ditadura, laiha razaun. “Uza maioria nee mos iha regra, hanesan iha kampu jogu nee tenke tuir regras, labele kontra fali regras, nee laloos,” tenik Aniceto.

Nia hatutan meza loos sai juri, labele halimar joga hotu iha laran, tanba nee nia parte husu esplikasaun razaun fundamental saida mak lakonkorda, tanba nee kestaun regras, lei no direitu deputadu sira nian.

Entretantu Segundu Vise PN, Luis Roberto dehan bazeia ba enkontru lider bankada iha semana kotuk katak iha bankada 3 mak lakonkorda tau ba ajenda, maibe desizaun diak liu a fo plenariu mak deside atu tau ba ajenda ka la tau entrega ba lider bankada nia desizaun.

Enkuantu Xefe Bankada CNRT, Duarte Nunes dehan, bankada CNRT nia pozisaun bainhira deskute iha lider bankada hare ba asuntu nee dala 2 ona no halo esplikasaun ida iha merkadu antigu, no mos iha PN, maibe tanba opozisaun la fiar no lakohi rona, depois opozisaunn deklara iha plenaria katak ANPN  ho Timor Gap laiha kapasidade. “Ikus mai hakarak rona, tanba nee ami bingung ita dehan lafiar agora husu atu sira mai nee atu oinsa, tanba nee mak ami nia pozisaun ami defende sira tanba sira nia servisu, maibe opozisaun sira lafiar maun Xanana rasik mai opozisaun larona. Neebe opozisaun sira lafiar dehan ema nee beik ten no naok osan lalori ba tribunal agora bolu fali sira mai, sira mai para trata tan ema sira nee ka oinsa,” kestiona Duarte.

Iha enkontru lider bankada sujere atu halo komvite ba tekniku sira mai esplika iha komisaun, hakarak mai iha plenariu julga, tanba nee mak husik sira servisu ba depois hare rezultadu.

Nunee Vise Bankada PLP,  Francisco Vasconcelos dehan, iha lider bankada hakarak  esplika asuntu  sira nee dala barak hakarak iha  plenariu husu atu sira nivel politika mai esplika, dala barak dehan diretor  sira labele, ida nee oinsa. “Iha komisaun para bolu sira atu mai koalia, tanba nee ami nia pozisaun sei lakonkorda interpelasaun atu bolu nivel diretor sira mai esplika iha plenariu,” tenik Deputadu PLP.

Entretantu Xefe Bankada Khunto Deputadu Antonio Nobre  dehan bankada CNRT ho PLP nia hanoin, ida nee mak razaun fundamental, hakarak  fo oportunidade governu  halo servisu, iha planu asaun lubun ida iha tinan ida nee too 2025 planu nebe iha fo tempu atu servisu. “Presiza atu sira hadia kontratu sira neebe mak iha tratadu iha tasi timor atu kompleta tanba nee ami atu fo oportundade halo sira halo servisu,” argumenta Francisco.

Tuir Vise Bankada PD Adriano do Nascimento, PD konsisten hakarak kaer rejimentu, tanba rejimentu hatete katak deputadu sira husu atu halo interpelasaun PD apoiu maske laos rekerente, tenke komprende interpelasaun ho audensia, tanba interpelasaun nee husu ba  primeiru ministru ho ministru  laos diretor. “Uluk debate iha orsamentu no iha Merkadu Lama nee konseitu politiku koalia ba revizaun lei  atu halo akordu FM no akordu sosa asaun no politika dada kadoras mai, maibe atu halo interpelasaun bankada Fretilin  husu nee koalia kona ba kestaun teknika, hanesan Bisnis Plan bainhira mak atu halao, osan tau hira, ou oinsa,” dehan Adriano.

PD katak Adriano apoiu interpelasaun tanba rejimentu haruka katak direitu deputadu sira atu halo interpelasaun.

Nunee mos Xefe Bankada UDT/FM Gilman Exposto dehan, iha semana 3 ba kotuk  liu husi enkontru lider bankada koalia ba interpelasaun neebe Fretilin hatoo, maioria lider bankada husu  fo tempu ba membru governu hodi halao nia knaar no mos ba ANPM ho Timor Gap. Depois servisu foin husu interpelasaun hodi husu sira nia responsabilidade.

 Buat hotu halo aprova,  PR mos promulga ona lei nee, maibe deputadu sira halo interpelasaun hodi ezije atu sira mai nee hau hanoin ita lafiar ona governu no PR fiar mak aan deit, too abinhira mai atu bele fiar ita nia maluk Timor oan sira, ita fiar ema seluk maibe lafiar ita nia ema rasik,” hatete Gilman.

Nia husu bankada Fretilin atu hanoin diak no fo tempu depois sira servisu tiha mak hsuu sira nia responsabilidade, maibe seidauk halao servisu husu ona responsabilidade oinsa.

Entretantu Xefe bankada PUUD Depuadu Antonio Benevides katak, semana kotuk PUUD lapartisipa iha lider bankada maibe iha semana 2 liu ba deskute ona asuntu nee. Maibe PUUD nia pozisaun katak fo tempu ba governu atu fokus lai halo pagamentu ba Conoco ho Shell depois hakarak ka lakohi rejimentu fo dalan ba governu tuir pedidu Fretilin nian, tanba nee PUDD mantein ho pozisaun nee. Maibe PUUD mos sujere kaeik ida nee urjente duni ba bankada Fretilin atu hatene liu tan planu negosiu nee PN bele fasilita atu governu noa ANPM i Timor Gap atu mai esplika ba bankada Fretilin.

Nunee mos Vice Bankada Fretilin Deputadu Francisco Branco dehan Fretilin   laos husu maibe ejize direitu hanesan opozisaun tuir konstituisaun fo, direitu nee preve iha konstituisaun artigu 70, pontu 2 partidu politiku sira iha direitu atu halo pozisaun demokratiku i PN nee parlamentu demokratiku atu hetan informasaun regularmente no diretamente kona ba lalos husi asuntu prinsipal interese nasional.

Nia hatutan koalia ba planu de negosiu kios mos planu de negosiu tenke iha, tan nee nia admira, bankada hotu hetan ona planu de negosiu maibe Fretilin lae. “Interpelasaun ba asuntu planu de negosiu ba interese estadu ita hotu tenke asesu atu hetan informasaun, tanba nee mai mai laos husu maibe ami ezije ami nia direitu hanesan partidu opozisaun neebe durante ne laasesu ba informasaun neebe ami   uza ami nia direitu tuir rejimentu internu PN,” hatete Branco.

Hatan be kestaun nee Segundu Vice PN, Atual Prezidente Em Ezersisiu PN Luis Roberto dehan bazeia ba rejimentu PN lafo limitasaun ba kada deputadu sira nia direitu, deputadu hotu iha direitu atu fo hanoin ruma ba saida deit, maibe desizaun hotu sub-mete ba plenariu mak aas liu ia orgaun soberanu, bazeia ba enkontru lider bankada semana kotuk rekore ba plenaria, maibe maioria bankada seidauk konkorda atu tau iha ajenda. Guilhermina Franco / Madalena Horta

 

Komentariu

Facebook Comments

Leave a Reply

Your email address will not be published. Required fields are marked *