PN Lakohi Redus Orsamentu Privativu

PN Lakohi Redus Orsamentu Privativu

- in Politics
90
0
download (22)

DILI-Deputadu lakonsisten ho desizaun, tanba ezije redus Orsamentu Jeral Estadu (OJE) 2020 neebe boot, maibe ba orsamentu privativu Parlamentu Nasional nian, sira  maioria lakohi redus.

Antes nee iha horbainrua lokraik (kuarta red), deputadu sira iha Parlamentu Nasional halo plenariu debate, atu deside redusaun orsamentu privativu PN nian, neebe liu husi enkontru konsellu administrasaun redus orsamentu PN nian husi tokon $16.486.896 ba tokon $15.671.125, tuir envelope fiskal governu haruka ba PN.

Maibe iha plenariu liu husi eleisaun deputadu sira vota afavor 18, kontra 30, abstensaun 10, ho nunee redusaun ba orsamentu privativa PN laaprova.

Vise bankada FRETILIN Francisco Branco hatete iha ona desizaun politika husi PN katak proposta OJE 2020 biliaun $1.95 esensivu demais, ka boot, neebe tenke kumpri desizaun neebe hasai. Maibe PN lakonsistente ho desizaun, ezije mudansa ba OJE nee atu ba deit governu, maibe depois PN oin seluk fali.

Kontradis boot ida, tanba Parlamentu rasik, ezije ba governu atu redus OJE 2020, maibe PN rasik lakohi hatun nia orsamentu privativa, ida nee ita tenke haree kontekstu PN nia orsamentu mos tama iha OJE 2020, hatete Vise bankada FRETILIN nee ba jornalista sira, iha PN, Dili, Kinta (19/12/2019)

Parlamentu Nasional tuir Branco katak, lakonsisetente ho desizaun, razaun hanesan ho ministeriu sira barak katak sira planu halo ona programa, no define ona orsamentu tuir sira nia programa, maibe alterasaun nee mai prejudika ba sira nia bom funsionamentu ezekusaun, nee PN mos razaun hanesan ho ministeriu sira.

Deputadu nee hatete, hakarak redus, maibe depois labele reklama fali nia perdiam, nee hanesan labarik kiik sira duun malu, orgaun soberanu tenke hatuur aan hanesan orgaun soberanu, no desizaun hasai tenke konsisten, no responsabilidade ba desizaun neebe hasai ona, atu redus nee ba hotu-hotu, tanba hola parte iha estadu.

Prezidente Republika  mos hatun nia orsamentu tanba sa mak PN labele hatun nia orsamentu, redus tan para buat nee tratamentu igual ba orgaun soberanu hotu, Branco kestiona.

Nia dehan,sira hanoin presiza redus iha item ka rubrika balu, neebe presiza redus, maibe ikus mai maoria hotu konkorda katak atu mantein, ida nee mak desizaun maioria.

Mezmu ke ami lakonkorda maibe maioria deside ona hanesan nee atu halo nusa, i kontradis fali ho desizaun neebe antes nee hasai ona katak atu redus, maibe ikus mai PN laredus, tenik Branco.

Hatan ba kestaun nee Prezidente PN Arão Noe hatete, ida nee atu dehan katak desizasaun plenariu nian.

Nia esplika, prosesu redusaun momentu neeba PN halo kedas redusaun, iha debate jeneralidade, hatun ba tokon 16, maibe depois  governu halo fali nota ida atu halo redusaun tan.

Maibe Arão dehan , depois governun husu atu redus tan nee, liu husi Konsellu Administrasaun (KA) PN nian redus ba tokon 15, maibe lori ba iha plenariu, deside katak labele redus tan. Tanba redus impaktu ba atividade PN nian, ho razaun nee mak mantein nafatin numeru nee ho montante tokon 16, resin husi numeru nee hanesan ho tinan kotuk.

Desizaun PN lakonsege redus nee lakonsisten, maibe ida nee desizaun plenariu mak deside, hau lakohi fo komentariu, tanba maioria mak deside mantein labele redus tan, hatete PPN.

Entretantu iha tempu lahanesan hafoin rona tiha rezultadu votasaun PPN Arão hatete, orsamentu privativa PN nian desde inisiu tokon 22, depois enkontru konsellu administrasaun redus ba tokon 17,9. Maibe depois debate iha plenariu  iha jeneralidade momentu neeba, deputadu sira halo proposta redus tan ba tokon 16,400.

 Ikus mia husu atu redus tan maioria lakonkorda, razaun tanba impaktu ba funsionamentu PN nian iha 2020. Neebe mantein deit ho tokon 16. 400 ba orsamentu privativu PN nian. Guilhermina Franco

 

Komentariu

Facebook Comments

Leave a Reply

Your email address will not be published. Required fields are marked *