Pe. Nivio Lebre, FdCC

Pe. Nivio Lebre, FdCC

- in Perfil
1295
0
Amo Nivio

“Folin Laek maibe Nai Hili” ka ho lian Italia dehan Miserando Atque Eligendo, ida nee maka moto neebe Pe. Nivio Lebre hili hodi saran aan ba Maromak, liu husi ordenasaun Sacerdotal, neebe halao iha igreja Katedral, Dili, Sabadu, 4 Novembru 2017.

Pe. Nivio Correia Lebre moris iha loron 13 Dezembru 1984. Oan husi Pedro Correia Lebre no Joana da Silva Granadeiro Lebre neebe nai Maromak bolu tiha ona ba Nia Kadunan Santu iha loron 21 Maiu 2014.

Dona Joãna nia profissaun nudar professor no nia aman Pedro nudar tradutor kontratadu privadu. Sira iha maun alin nain 9 nomos prima nain 2 neebe istima hanesan sira nia bin boot hotu. Ho nunee sira hamutuk nain 11. Pe. Nivio mak oan ba dala 7 husi nia maun alin sira.

Nia maun alin sira mak hanesan (1) Célia Veneranda Lebre (Casada), (2) Flora Lebre (Casada), (3) Fernao Lebre (Casado), (4) Hugo Lebre (Casado), (5) Nancy Lebre (Seidauk Kaben), (6) Platão Lebre (Casado), (7) Pe. Nivio Correira Lebre, FdCC, (8) Manasez Lebre (Casado), (9) Arquimedes Lebre (Seidauk Kaben), (10) Me. Maria Imaculada Silva, HCarm (Prima), (11) Santina Cardoso, (Prima, Casada).

Iha loron 28 Junhu 1985, Simu Sakramentu Baptismu iha Parokia Sagrado Coracao de Jesus, Becora, husi Pe. Jose Alvaro Nolasco Santimano Menezes e Monteiro, no halo primeira Comunhao iha loron 13 Junhu 1994, iha Becora husi Pe. Monteiro.

Hafoin simu mos Sakramentu Krisma iha loron 31 Janeiru 1998 iha Paroquia S. João Bosco Laga-Baucau, husi Bispo Dioseze Baucau, Dom Basilio do Nascimento.

Estudus no Formasaun

Pe. Nivio remata nia estudu ensinu basiku iha eskola Katolika S. João Bosco-Laga, iha tinan 1998. Tinan 1998 too 2001 halao nia estudu iha ensinu Pre-Sekundaria St. Madalena de Canossa Comoro, Has-Laran-Dili.

Hafoin kontinua ba ensinu sekundaria St. Madalena de Canossa Comoro no remata iha tinan 2004. Hotu tiha nia estudu iha ensinu sekundaria, Pe. Nivio deside hodi hola parte iha grupu vokasional neebe momentu neba Me. Merlinde Cecilia Sousa, FdCC mak nudar responsavel.

Iha loron 7 Novembru 2004, Pe. Nivio tama ba etapa formative hanesan aspirante Canossiano iha Kuluhun, neebe Madre Canossiana sira mak tau matan, tanba tempu neeba Padre Canossiano sira seidauk hela permanente iha Timor.

Nia hahu sente fini Vocação nee, wainhira nia sei kiik (4° ano Ensinu Basiku) husi Edukasaun fiar nia inan Joãna neebe sempre anima sira ho orasaun simples iha uma laran hanesan reza tersu hamutuk iha familia, no liu-liu edukasaun fiar husi nia tiu Antonio Maria Aparicio Guterres, neebe tau matan ba nia wainhira Pe. Nivio halao nia estudu ensinu Basiku iha S. João Bosco-Laga-Baucau.

Nunee mos ho atividade Grupu Sao Tiago Paroquia Sagrado Coracao de Jesus, Becora nian neebe nia hola parte wainhira sei tempu adolescente, tulun no halo nia sente realiza liu tan nia mehi hakarak sai nailulik.

Hotu tiha preparasaun fulan balun iha Aspirante Canossiano Kuluhun, iha loron 7 Janeiru 2006, Pe. Nivio hahu kontinua nia formasaun iha Manila-Filipina hamutuk ho nia kolega Zofimo Hanjam Corbafo. Iha Fevereiru, Pe. Nivio hahu estuda lingua Ingles durante fulan lima nia laran nudar preparasaun atu tama Filosofia.

Iha inisiu fulan Junhu 2006, nia hahu halao estudu Filosofia nian, iha eskola Colegio São Camilio de Lelis iha Marikina no remata iha tinan 2008. Hotu tiha Filosofia, Pe. Nivio kontinua nia formasaun ba postulandato iha loron 25 Jullu 2008 iha festa São Tiago nian, hamutuk ho nia kolega nain 3, Pe. Allan, Pe. Samuel no Diacono Jeephy iha Marikina-Filipina.

Iha loron 8 Maiu 2009, iha solenidade Fundadora Santa Madalena de Canossa nian, Pe. Nivio tama ba etapa Noviciado iha Marikina-Filipina liu husi formador Pe. Clemente Moreira (Delegadu Actual). Pe. Nivio halao nia primeiru votus iha loron 8 Maiu 2010 hodi kontinua kedas ho estudu Teologia iha Maryhill School of Theology, Quezon City Filipina.

Iha tinan 2012-2013, Pe. Nivio halao Experensia Pastoral iha Brasil iha Comunidade St. Rita do Passa Quatro S. Paulo no Comunidade Piabeta iha Estado do Rio de Janeiro-Brazil.

Pe. Nivio kontinua nia kursu Maestrado Pastoral Teologia nian iha Maryhill Scholl of Theology Quezon City Manila hamutuk ho nia kolega Diacono Jeephy FdCC iha tinan 2013-2015. Hafoin kontinua nia formasaun Carismatica iha Casa Formasaun Canossiano Verona-Italia no halao nia esperensia Pastoral iha Patronato Canossiano nian iha Trento-Italia ba tinan ida.

Iha loron 15 Setembru 2016, Pe. Nivio hatan nia “Sim Total” ba Maromak hodi konsagra nia an sai Canossiano too Mate, liu husi Profissao Perpetua neebe halao iha Casa Madre, Verona-Italia.

Nia simu Ordenação Diaconado iha loron 10 Desembru 2016, husi Dom Teodoro Bacani, Bispo Emerito Diocese Novalices-Filipina, no iha loron 4 fulan Novembru 2017 simu Ordenação Sacerdotal husi Bispo Dioseze Dili, Dom Virgilio do Carmo da Silva, SDB, iha Igreja Katedral-Dili.

Misa nova Pe. Nivio Lebre halao iha Parokia Sagrado Coração de Jesus Becora, iha Loron 5 Novembru 2017. Iha oportunidade nee, familia husi Pe. Nivio mos agradese ba parte hotu, neebe maka servisu makas hodi fo apoiu tomak hahu husi preparasaun too ordenasaun Pe. Nivio Lebre nian. Josefa Parada/Madalena Horta

 

Facebook Comments

Leave a Reply

Your email address will not be published. Required fields are marked *