PD Hakarak Hakohak FRETILIN-CNRT

PD Hakarak Hakohak FRETILIN-CNRT

- in Politics
230
0
image003

Editora:Carme Ximenes

DILI – Partidu Demokratiku hakarak hakohak Partidu CNRT ho FRETILIN, hodi forma governu grande inkluzaun, iha governu da-9, maibe karik partidu rua nee lakohi labele fo sala ba PD.

Prezidente Partidu Demokratiku, Mariano Assanami Sabino hatete, PD hatoo proposta ba PR no mos hatoo ba Partidu Politiku (Parpol) sira, tanba nee mak loke dialogu ho Parpol sira no PR. PD sempre aposta ba dialogu nasional hanesan dalan ida atu ema hotu bele koalia ba malu, maski iha opozisaun ka governu koalia ba malu liga ba interese nasional.

Assanami dehan, PD nia proposta ba PR husu atu hakarak grande inkluzaun, nunee involve Parpol boot 2 hanesan CNRT, FRETILIN no Parpol hotu  hodi inklui mos lider sira hotu, maibe se ida nee Parpol sira lakohi PD hein, Parpol se mak bolu PD sira prontu hamriik iha sorin.

Ami fo hatene ona ba Parpol, hanesan FRETILIN ho CNRT hakarak hakohak sira forma governu grande inkluzaun, maibe depende ba parpol sira atu tetu, karik mai ho proposta foun, PD prontu kontribui atu asegura, neebe karik proposta se deit mak husu, ami tenke hamriik ho ida, maibe laos PD nia sala ou kulpa, hatete Assanami ba Jornalista sira, iha nia Rezidensia Ai-Mutin, Dili, Kuarta (19/02/2020).

Enkuantu isu viral iha midia sosial katak, PD atu forma governu ho  CNRT, KHUNTO no partidu kiik forma governu, maibe mos PD atu ho FRETILIN ho sira seluk forma governu mais PD lahili ida, PD hakarak hili hotu 2 nee, tanba dalan mekanizmu forma governu foun tuir konstituisaun legal atu hakotu impase.

PR atu foti desizaun ba ida neebe, se PR atu fo gozu livre Parpol buka malu, ka PR fo tan tempu ba AMP, ou fo ba segundu mais votadu hanesan FRETILIN. Tanba nee sira labele hili atu ho si A ka, si B forma governu,” hatete Assanami.

Nia dehan, sira halo ida nee  tanba impase husi 2017 fo impaktu sosial, impaktu politika boot ba rai ida nee. Tanba nee agora povu lakon konfiansa ba dezenvolvimentu rai ida nee. Laos nee deit maibe oinsa atu instituisaun demokratiku ida nebe mak funsiona ho diak, aposta ba dezenvolvimentu sidadania atu Timor oan hotu sai numeru 1.

Prezidente partidu PD nee hatete, PD hakarak iha grande inkluzaun ida neebe governu bele lidera husi FRETILIN, ka CNRT ou bele mos PLP, se labele, bele mos maun Ramos ou ema independente, ou bele mos iha konsensus fo jerasaun foun sira husi Parpol seluk.

 Maibe too agora Parpol sira seidauk hanoin atu haree ida nee, partidu sira balu hatete labele ho CNRT, labele ho FRETILIN labele ho PLP atu lao. PD atu dehan karik nee mak akontese, grande inkluzaun entre partidu boot 2 CNRT, FRETILIN bolu ho PD,  sira 2 lakohi maibe PD  prontu atu oferese aan. Ida nee tanba bezeia ba sira nia esperensia PD kleur hamutuk ho maun Xanana no mos hamutuk ho FRETILIN, inklui besik ho maun Taur.

Ho dialogu entre Parpol sira nee mak ikus mai Parpol sira karik labele hotu, mak iha CNRT hanoin atu avansa ho PD, ka FRETILIN hanoin atu ho PD, ami PD prontu servi nasaun laiha rezerva, ami lahili sira 2 nee maibe atu dehan katak ho se deit ami prontu harii governasaun foun, maibe agora dadaun PR mak determina, tenik nia.

Eis Ministru Agrikultura no Peska iha governu da-5 nee sekunda, PD prontu sakrifika aan, tanba  PD asume responsabilidade ona durante nee, PD nia totalidade atu sakrifika aan nee dala barak ona. Tanba sira prinsipiu ukun hanesan hahu agora risku barak, mazemu iha lei sira ideal, atu halo tuir, maibe hanesan situasaun post konflitu dala ruma mos la ideal.

Nia afirma, kuaze Parpol hotu sira hatoo ona hanoin, maibe Parpol balu seidauk responde, balu responde  katak laaseita, maibe sira fo  hanoin atu bele hakotu impase, i impase nee atu dazafia ema hotu.

Nia esplika tan katak, ema barak lakomprende PD nia prinsipiu koalia buat oin-oin ba PD nia leten, maibe ema iha kuadru PD hatene prinsipiu PD nia  totalidade interese estadu no nasaun nian. “Moto katak ba o Timor maubere oan ami prontu servi”.

Assanami konta, iha momentu sira lao ho FRETILIN, sira hatene atu monu, maibe sira lahusik estadu ida laiha governu, maibe depois lao mai too sira ba fali opozisaun PD fahe no sempre afavor ba buat neebe diak ba rai ida nee hanesan projetu tasi mane, fronteira.

Tanba nee nia dehan, hein deit interpretasaun husi PR,  maibe karik atu ba gozu livre depende Parpol neebe hakarak ho PD, tanba PD hatete ona katak ho FRETILIN deklara aliadu lakohi kotu amizade ho FRETILIN.

Prezidente Partidu  Demokratiku nee haktuir tan katak, ho maun Xanana husi CNRT,  sira sempre prontu, mezmu sakrifika PD, tanba bainhira CNRT hamriik sira fera PD fahe ba rua. Neebe PD foti risku ba responsabilidade,  laarepende depois hamriik ho FRETILIN mezmu kadeira lakon

Ho istoria sira neebe mak ami hasoru, hanesan lisaun atu PD hamrik hanesan Parpol   amuneta sira nia maduru, hatete Prezidente PD nee.

Iha parte seluk Adjuntu Sekretariu Jeral Partidu FRETILIN Jose Reis antes nee hatete, Fretilin nia pozisaun lakohi sai blokeia, trava solusaun ba impase, tanba ida nee sira sempre hatete katak FRETILIN iha estratejia ida, depois de retiru iha Viqueque sira nia estratejia servisu ba iha 2023, maibe saida mak akontese iha dia 17 Janeiru 2020.  Depois problema mosu iha uma laran, governu monu, tanba nee FRETILIN haree hanesan problema boot, asume mos hanesan mos responsabilidade FRETILIN lakohi sakrifika 1.2 millaun de pesoas nia vida neebe lao,tanba deit interese partidu, tanba nee mak FRETILIN hakarak buka solusaun, tanba importante ba vida populasaun no estadu.

Nia afirma, FRETILIN lakohi kontribui ba blokeia impase, maibe atu fo kontribuisaun ba buka solusaun ba impase. Tanba nee ohin dader PD ho Fretilin mos sira fo hanoin oinsa atu ultrapasa situasaun. Enkuantu agora dadaun ho PLP sira mai iha nee atu buka solusaun ba oin.

Nia afirma tan katak, sira sei iha enkontru dala hira tan ba oin, para atu bele tau hamutuk hanoin oinsa atu bele buka solusaun, tanba nee fiar katak ho komunikasaun sira nee tenke hetan solusaun atu rezolve, impase.

Pozisaun FRETILIN lakohi ba EA, iha mos razaun rua hanesan lakohi atu hametin kultura EA, tanba rai nee depende liu ba OJE, maibe nafatin ba EA nee problema boot ba estadu, tanba nee mak justu no demokratiklu liu labele iha EA, katak Jose Reis.

Tuir nia, deadline enkontru entre Parpol sira nee, agora dadaun , sira preokupa mos maibe sira hanoin katak tempu badak Parpol sira bele halo relatoriu ba PR katak solusaun iha ona.

Entretantu  jornalista koko konfirma ho partidu CNRT iha sede CNRT,Bairrus Grillus, Dili, maibe Sekretariu Jeral Partidu ho Prezidente Partidu CNRT laiha fatin. Rep : Guilhermina Franco / Jeniche da Costa

Komentariu

Facebook Comments

Leave a Reply

Your email address will not be published. Required fields are marked *