Partidu 5 Tau Forsa Hamutuk Hasoru EA

Partidu 5 Tau Forsa Hamutuk Hasoru EA

- in Politics
5517
0
POlitku

DILI-Partidu Politiku lima (5) kompostu  husi  PUDD (Partidu Unidade Dezenvolvimentu Demokratiku),  ho votus validu 15.887 (2,8%), UDT (Uniao Demokratiku Timorense) 11.255 (2,0%), FM (Frente Mudanca) 8.849 (1,6%), PR (Partidu Republikanu) 3.951 (0,7%) no PDN (Partidu Dezenvolvimentu Nasional) 3.846 (0,7%), tau forsa hamutuk hodi prepara an ba festa demokrasia 2022, ka hodi enfrenta kualker situasaun politika saida deit neebe bele mosu iha tempu badak, inklui Eleisaun Antesipada (EA), tanba  iha eleisaun parlamentar 22 Julhu 2017, total votus validu husi partidu lima refere hamutuk 43.788.

Tanba nee, iha loron Sesta (22/12/2017), Frente Dezenvolvimentu Demokratiku (FDD) neebe konsiste husi partidu tolu hanesan, PUDD (Partidu Unidade Dezenvolvimentu Demokratiku), Uniao Demokratiku Timorense (UDT), no Frente Mudanca (FM) hamutuk hodi simu Partidu Dezenvolvimentu Nasional (PDN) no Partidu Republikanu (PR) neebe hakarak mai adere hamutuk iha uma mahun FDD hodi preparaan ba festa demokrasia 2022, ka hodi enfrenta kualker situasaun politika saida deit neebe bele mosu iha tempu badak.

Aderesaun Partidu PDN no PR nee halao liu husi serimonia asina akta resezaun no adezaun neebe halao iha Fomento, Timor Block Oin, Dili. Sira neebe mak asina akta nee hanesan, Prezidente Partidu PDN, Dr. Fernando Dias Gusmão, Prezidente PR, Dr. João Mariano Saldanha, Sekretariu Jeral PDN, Dr. Lucas Soares, Sekretariu PR, Vise Prezidente, Venancio Sarmento, M.Ed.  Asina akta husi parte neebe simu PDN no PR mak hanesan Prezidente Interinu FDD, Dr. Antonio Desa Benevides, Vise Prezidente FDD, Gilman A. Exposto, Vise Prezidente FDD, Dr. Jose Luis Guterres, Sekretariu Jeral FDD, Jose Monteiro, Adjunto Sekretariu Jeral FDD, Francisco David Carlos, no Adjunto Sekretariu Jeral FDD, Ricardo Cardoso Nheu.

Iha biban nee, Prezidente Interinu FDD, Dr. Antonio Desa Benevides hatete katak nuudar Prezidente FDD, nia reprezenta Partidu UDT no FM hato’o boas vindas ba Partidu PDN no Partidu PR neebe hakarak hamutuk ho FDD.

Ita boot sira hili hodi mai hamutuk ho FDD signifika katak ita boot sira hili ka desidi ho konsiensia tomak hodi hadomi ita nia povu, tau povu nia interese ass liu ita nia interese partidu nian. Ita bele radikal iha ita nia prinsipiu, maibe tenke moderadu iha ita nia asaun,” dehan Antonio.

Nia hatutan tan katak prinsipiu no asaun neebe FDD halo mak hakarak demonstra attitude no ispiritu humildade hodi hakuak ema hotu, hakuak partidu hotu hodi hari paz no dame no haburas dezenvolvimentu.

Ita boot sira hili atu tane ass ita nia valores kulturais, sosiais no morais neebe ita nia beiala sira hanorin hela mai ita. Ita nia beiala sira hanorin ita atu respeitu malu, hanorin ita nahe biti boot hodi resolve problemas, hanorin ita atu simu ema seluk nia diferensas, hanorin ita atu lok bua ho malus ba malu laos atu mama mesak, laos atu han hahan mesak, maibe hanorin atu fahe hahan ba malu, hanorin ita atu silu batar nebe mak ita rasik kuda laos ba silu fali ema seluk nia batar nebe laos ita mak kuda. Foti buat neebe ita nian laos hadau deit buat neebe ema nian,” Antonio haktuir.

Tuir nia, ho prinsipiu hirak nee ita presiza servisu hamutuk hodi sai forsa altenativa ida. Dinamika politika iha TL eziji duni forsa alternativa.Forsa alternativa neebe fundamenta husi valores neebe mensiona iha leten. Tan nee, nia apela ba militantes, simpatizantes no apoiantes husi Partidu PUUD, UDT, FM, PDN no PR atu hahu buka malu, konsolida malu hodi prepara an, hasoru dinamika politika neebe mosu iha ita nia rain. Hamutuk ida deit sai forte no susesu. Husu mos ba ita lideransa husi partidu lima nee, atu kontinua fo apoiu moral ba ita nia Nai Prezidente Republika, hodi bele halo desizaun neebe livre, justu no kredivel bazeia ba konstituisaun hodi solusiona situasaun politika neebe ita enfrenta.

Nia mos hakarak kontinua konvida maluk sira seluk, husi partidu seluk, individu ka organizasaun defisiensia no organizasaun juventude tomak, atu mai adere iha FDD, odamatan FDD kontinua nakloke ba maluk sira hotu hodi mai halo adesaun.

Resesaun no adezaun Partidu PDN no PR mai hamutuk iha FDD bazeia ba Konstituisaun RDTL artigu 7, 46 no 47  neebe fo dalan ba sidadaun hotu-hotu atu partisipa, harii no forma partidu politiku, assosiasaun, aliansa ou koligasaun. Nunee hare ba dinamika politika neebe oras nee dadaun lao iha rai doben TL, nuudar sidadaun neebe halibur malu, iha partidu politiku iha dever, obrigasaun hodi kontribui ba paz no estabilidade, ba prosesu dezenvolvimentu nasional.

Ho nunee, partidu PDN no PR reprezentante votantes tomak husi partidu tolu nee nian, iha eleisaun parlamentar 22 Julhu 2017, ho votus validu PDN ho votus 3,846 no PR 3,951 total hamutuk 7,797.

Nunee ohin ami deklara katak Partidu PDN no PR iha ona intendimentu prinsipiu politika no komitmentu, hakarak halo adezaun ba FDD hodi servisu hamutuk hahu ohin ba futuru. Partidu politiku PDN no PR iha ona prinsipiu neebe hanesan forsa politika ida deit hamutuk ho FDD sai alternativa ba povu no nasaun nia moris hakmatek no moris diak. Respeitu no komprimisa mutual iha konseitu politika ho karakter, dezenvolvimentu no demokrasia iha TL. Ami husi Partidu PDN no PR sei halo tuir deit intendimentu prinsipiu politika neebe FDD estabelese ona. Ami Direksaun husi Partidu PDN no PR lori naran partidu rua nian aprezenta proposta inkondisional hakarak lao hamutuk ho FDD nuudar dalan diak liu hodi fortifika kontribuisaun PDN no PR nian iha prosesu politika iha tempu agora no ba futuru,” deklara Partidu PDN no PR.

Iha biban ida nee mos sira apela ba simpatizantes, apoiantes, militantes, kuadrus politiku no fundadores husi PDN no PR hahu husi nivel nasional too baze atu hahu buka malu daudaun, ona ho partidu PUDD, UDT no FM hodi hametin unidade no servisu hamutuk ho diak hodi hasoru situasaun saida deit iha tempu agora no ba futuru. Augusto da Costa/Mikael Mali Mau

 

Facebook Comments

Leave a Reply

Your email address will not be published. Required fields are marked *