Palasiu PR Ajuda Vitima Inundasaun

Palasiu PR Ajuda Vitima Inundasaun

- in Metro, Nasional
183
0
FOTO/STLFOTO/STL

Editora:Carme Ximenes

DILI– Palasiu Prezidensia Republika, ajuda nesesidade baziku ba vitima inundasaun, iha suku Manleuana, Postu Administrativa Don Aleixo, Munisipiu Dili.

Diretor Jeral Prezidensial Republika Domingos Romualdo dos Santos Carmo Amaral,  neebe reprezenta Prezidente Republika Francisco Guterres Lú Olo  hodi entrega direita nesesidade baziku ba vitima inundasaun uma kain 54 iha Manleuana.

Bainhira entrega nesesidade baziku hirak nee Domingos dehan, Prezidente Republika ba povu tomak tanba nee bainhira oan sira hetan susar  hanesan afeita ba dezastre ruma, hanesan aman labele husik oan sira terus.

Prezidente aman nasaun ba povu tomak nia la husik leet deit bainhira nia povu hetan dezastre ruma,tanba nee Prezidente haruka kedas instrusaun ba iha kasa sivil atu halo kordenasaun ho ministeriu neebe mak relevante atu fo ajuda lalais ba vitima sira, dehan Diretor nee ba jornalista sira, iha Suku Manleuana, Dili, Tersa (07/01/2020)

Nia hatete, sasan neebe mak  Prezidensial Republika fo ba vitima sira mak hanesan foos, mina, supermi, balde no seluk seluk tan.

Nee governu ninia knar, Prezidente apoiu iha tempu urjensia deit, hodi hein governu apoiu apropriadu ba vitima sira, Domingos hatete.

Ajuda hirak nee nia hatete, laos premeiru ves, maibe Prezidente mos ajuda vitima sira iha Hatulia, Ermera Liquisa, Atsabe, Aileu, Kelekai no Ainaro.

Maibe Domingos dehan, buat neebe mak PR fo tuir kapasidade no ajuda hirak nee PR koordena ho kompanna CCI-TL liu husi Prezidente Oscar Lima, neebe mak kordena ho elementu sira, mak kanaliza apoiu husi Pezidente Republika hodi offrese fila fali ba vitima sira.

Iha fatin hanesan Xefe Suku Manleuana Jacob Tilman Soares  hatoo agradese ba Prezidente Republika, neebe mak fo ona apoiu urjensia ba vitima dezastre hirak nee.

Agradese ba Prezidente Republika ho nia laran luak tomak, neebe mak apoiu ona hahan hodi tahan ba loron ida ka rua nian, maski la boot maibe bele salva vida moris, dehan Xefe Suku nee.

Lider komunitaria nee dehan, vitima balun uma grave no la aproveita, maibe balun hetan ona apoiu husi ministeriu balun no balun foin hetan apoiu husi Prezidensial Republika.

Nia hatutan, vitima neebe mak hetan dezastre naturais hamutuk uma kain 54, kompostu husi aldeia tolu hanesan Lau Lora,  Lisbutac, No Mauc.

Hau husu vitima sira diak liu buka moris oinsa mak hadia fali uma no hola sasan neebe mak estragus, labele hein deit ba estadu se buat kiik no boot hein ba estadu entaun ida nee susar, hatete lider komunitaria nee.

Entretantu Vitima Agusto Freitas da Costa dehan, dezestre neebe mak sira hasoru ida nee la espera, tanba derepente deit udan lori fatuk no ai mai sobu sira nia uma. Nia rasik mos labele salva vitima sira seluk neebe mak besik nia no labele salva sasan neebe mak iha uma laran.

Hau labele salva ama ferik neebe mak vizinu, tanba uma haleu mota tanba nee mak hau hakilar ba vizinu sira iha estrada mak mai ajuda ferik sai , dehan nia.

Nia dehan,  kona ba apoiu neebe mak apoiu husi Prezidensia Republika atu sufisente ka lae nia labele koalia, maibe ejize ba nain ulun ou ukun nain sira tau matan ba bareira neebe mak monu.

Ida nee ajuda emerjensia hadia iha tempu badak nia laran, se hein too fulan ida rua mak hadia mak estadu sei hadia uza osan neebe mak barak, nia hatete.

Agostu mos hatoo agradese ba Prezidente Republika neebe mak apoiu ona aihan ba sira, hodi sustenta ba sira nia moris iha loron rua ka tolu nia laran. Emerenciana Pinto  

 

 

Komentariu

Facebook Comments

Leave a Reply

Your email address will not be published. Required fields are marked *