Paixao Apresia Servisu PNTL

Paixao Apresia Servisu PNTL

- in Nasional, Politics
24
0
41620614_522787238172887_2426479784335769600_n-300x200

Editor: Godinho Barros

DILI– Ministru Defeza no Ministru Interior Interinu (MDII) Filomeno Paixão de Jesus, apresia servisu Komandu Polisia Munisipiu Dili (KPMD), tanba seguransa durante  Natal no Tinan Foun 2020, lao hakmatek.

Iha ona dirativa foun ba Polísia hodi fo seguransa ba loron natal no tinan foun, maibe iha konflitu balun akontese, polisía nafatin hatudu sira nian prontidaun hodi apoiu seguransa ho diak, hatete Paixão a Jornalista sira, iha Edifisiu Ministeriu Interior, Villa Verde-Dili, foin lalais nee.

Nia hatutan iha buat diak polisia halo ona, tanba  hare laos hanesan Natal  iha tinan kotuk sabraut, agora komesa kapas ona. Tan nee louva Komandante Munisipiu Dili Armando ni servisu.

Nia afirma  maski krime balu kontinua akontese, tanba polisia laos halo seguransa ba uma ida idak, maibe polisia kontinua intensifika sira nian vizilansia hodi prevene iha neebe deit mak mosu krime.

Paixao husu sidadaun hotu hotu atu prevene krime sira liu liu xefe suku, xefe aldeia, no mos xefe familia sira tenke responsabiliza eduka oan sira, no povu atu labele hemu tua iha dalan ninin.

Ita hotu hotu tenke kontrola, labele polísia deit mak kontrola, tanba ita servisu hamutuk hodi prevene no harkibi krime, tanba nee husu ba juventude sira atu evita hahalok hemu tua iha luron ninin, se imi la rona mak imi rasik sei hamosu risku ba imi nia an rasik, tenik Paixao.

Iha biban nee Ministru Defeza no Interior Interinu nee informa enkontru neebe realiza tanba inisiativa husi komandu PNTL no F-FDTL neebe hetan mos apoiu husi  Minsteriu Defeza no Interior Interinu.

Ita hanoin halo nusa  tinan-tinan ita koalia bebeik  Natal, Tinan Foun, tan nee tinan nee ita tenke koalia forma seluk, no konteudu mos seluk oituan. Forma  mak nee ita hotu mak nee ofisial no superior sira mai hotu iha tur koalia para depois halo avaliasasun total ba seguransa nasaun, esplika Paixao.

 Ministeriu Defeza no Interior katak Paixao, sei halo rezumu hodi halo avaliasaun, hare kona ba medidas konkreta iha  2020.

Iha 2019 katak Paixao problema lubuk ida akontese, maibe polisia konsege kontrola no atua. Tan nee enkontru nee atu koalia hamutuk oinsa ba oin hadia diak liu  seguransa integradu entre forsa rua ba iha komunidade sira nia leet no teritoriu Timor Leste.

Maske nee tuir  Paixao buat hotu- hotu labele hanesan fila liman, neneik maibe halo.

Buat barak neebe imi la hare mak saida, por ezemplu hau haruka halo ona konsellu estratejiku militar, hodi hare foun fila fali militar nee atu ba oin nee halunusa.  Hakerek  karta ida lori ba konsellu ministru no lori mos to ba iha prezidente hare ona,  iha konkorda ona mak, hau aprova hodi halo, relata Paixao.

Nia akresenta dadaun forma hela lejislasaun no dokumentus estruturas ba iha forsa sira, nunee bele hatene lolos forsa nee nia misaun nee oinsa, hanesan nia disputivu oinsa, sistema forsa nee lao oinsa nomos formasaun  treinu. Tan  nee presiza hare fila fali no halo revizaun hodi responde ba realidade neebe Timor Leste  hasoru.

Iha fatin hanesan, Xefe Estadu Maior das F-FDTL, Maijor Jeneral Lere Anan Timur dehan, ema moris iha mundu nee laiha ida perfeitu liu, balun moris mai ho kondisaun difisiensia, laos ho difiensia,  derota deit, nee laiha, maibe derota mos iha vitoria mos iha.

PNTL-F-FDTL, liu-liu ofsiais hamutuk ho ministru defeza, katak Lere, hare no halo refleksaun no balansu oituan kona ba atividade no agora tama ona ba 2020. Tan nee iha 2019 laos buat hotu-hotu lao ho diak,  maibe sala mos iha,  diak mos iha, tan nee sala neebe iha despede ho tinan tuan, tama ba tinan foun ho buat foun.

Jeneral fitun rua nee relata katak, iha evaluasaun nee  apela ba membru sira hotu atu muda mentalidade no karakter, nunee bele sai forsa neebe luta ba nasaun neebe lolos. Hanesan koalia kona ba arte marsiais no deslokasaun ba iha nasaun vizinu iha Indonsia, tanba membru balun  husi PNTL-F-FDTL hola parte iha arte marsiais, presiza neutralidade.

Hau loron ida nee hau ba fatin ida nee hau fila iha fatin ida nee, ba trata asuntu ida nee para ita bele kontrola, esplika Lere

Lere afirma membru PNTL no F-FDTL neebe hakarak envolve iha arte marsiais, diak liu fila ba vida sivil, duke iku hodi estraga instituisaun nia naran. Tan nee apela ba membru sira, no ofisiais sira hotu tenke kontrola nia ema sira, liu-liu kuandu desloka ba liur, desloka ba liur bele dehan vizitas privadu, mas nuudar instituisaun nia naran tenke fo hatene ba nia komandante. * Alberto Menezes 

 

Komentariu

Facebook Comments

Leave a Reply

Your email address will not be published. Required fields are marked *