PADRE GABRIEL SUBAN KOTEN SVD

PADRE GABRIEL SUBAN KOTEN SVD

- in Perfil
676
0
Profil Amo Gaby

IHA Loron Sesta, 8 Setembru 2017, Kongregasaun SVD iha mundu inklui Timor Leste selebra tinan 142. Kongregasaun SVD iha Timor Leste, selebra mos tinan 25 Vida Secerdotal ba Pe. Gabriel Suban Koten, SVD no Pe. Paulus Polur Udjan, SVD.

Liu husi rubrika profil ida nee, fo koñesementu kona ba vida moris, Pe. Gabriel Suban Koten, SVD, neebe tinan 25 ona sai amu lulik.

Padre Gabriel Suban Koten, SVD, laos foun ba sarani katolika iha Timor Leste, liu-liu sarani katolika iha Paroku Uato Lari no Paroku Uato Carbau, Munisipiu Viqueque. Amu lulik husi Flores nee halao nia knar iha Paroku Uato-Lari (1993) no husi 1994-2000 halao knar nailulik iha Paroku Uato-Carbau.

Pe. Gabriel Suban Koten, SVD, moris iha Pamakayo, Solor-Flores, 22 Marsu 1965, aifuan domin husi Martha Ongo Payong ho Theodorus Kuda Koten. Gabriel nuudar oan daruak  husi maun alin nain 7  kompostu husi feto nain lima (5) no mane nain rua (2).

Hau moris iha rai ida naran Pamakayo Solor. Hau halo hau nia formasaun hotu-hotu iha Flores, ensinu basiku, ensinu pre-sekundariu, ensinu sekundaria iha Seminariu Menor São Domingos Hokeng iha Distritu Laran Tuka.  Hau tama noviciado SVD iha Ledalero,  halao mos hau nia filosofia,  teologia hotu-hotu iha Seminario Menor  São Paulo Ledalero. Hau simu ordenasaun iha 29 Setembru 1992,” dehan Pe. Gabriel Suban Koten ba STL iha Uma SVD Soverdi, Kuluhun, Dili.

Hahu eskola primaria Ensino Basiku Katolika (SDK) Tuakepa-Flores Timur (1971-1976), Eskola Pre-Sekunadriu SMPK Swadaya Tuakepa (1977-1980), Eskola Sekundariu SMA Seminariu São Domingo Hokeng (1980-1984) no tama iha Novisiadu SVD Ledalero (1984-1986). Premeiru votus iha Ledalero iha loron 1 Agustu 1986, no halao filosofia e teologia iha STFTK Ledalerio (1985-1991), halao votus perpetua Ledalero, 1 Agostu 1991. Ordenasaun diakonato iha Ledalero, 8 dezembru 1991. Halao ordenasaun Sacerdotal iha Ledalero, 29 Setembru 1992, husi Bispu (Uskup Agung) Ende, Mgr. Donatus Djagom, SVD.

Husi tinan 1992-1993, nudar padre foun halao nia knar iha Paroku Langa, Bajawa, Dioseze (Keuskupang Agung) Ende. Iha tinan 1993 halao nia knar nuudar Pastoral iha Vigario Coperador de Parokia de Uatulari no Uatu-Carbau, Dioseze Baucau.

Iha tinan 2001 tuir kursu Portugis iha Portugal. Iha tinan 2002-2003, estudu Misiologi iha São Paulo Brazil. Iha tinan 2005-2011 sai Premeiru Reitor Istitutu De Ciencias De Religiosas Dili. Iha tinan 2011-2017 sai nuudar Superior Regional SVD Timor Leste. Iha fulan Maiu 2017, kargu Superior Regional SVD Timor Leste nee entrega ba Pe. Johanes Suban Gapun, SVD.

Iha tinan 2007-2016 sai nuudar Vigario Episcopal Para O Servisu Social Deocese De Dili. Iha tinan 2014-2017, nuudar Presidenti Da Komfrensia Dos Superiors Maiores Timor –Leste.

Halao Knar iha Parokia Uato-Lari

Depois sai tiha amu lulik simu knaar primeiru nee sai Vigario Koperador iha Parokia Uatu-Lari iha tinan 1993. Iha tinan 1994 nafatin Vigario Koperador iha Uatu-Lari, maibe muda ba Uatu-Carbau hela metin iha neeba tanba hare situasaun no reasaun militaar iha momentu nebaa, se postu administrativu mamuk amululik laiha nee militar bele halo buat oioin tuir sira nia hakarak. Maibe wainhira amu ida marka nia presensa fo asegura povu sira nia lara metin no bapa sira mos la halo arbiru tuir sira nia hakarak tanba amu iha ninia fatin, tanba nee mak padre hela metin iha Uatu-Carbau too 2001.

Hau sai husi uatucarbau, ba tiha eskola hau fila fali mai halao hau nia knaar nudar Reitor institute de ciencias religiosas iha Lahane iha tinan 2004 too 2011. Iha tinan 2011 ema hili hau sai hanesan superior regional SVD tanba ami hahu haketak aan husi Indonesia no SVD Timor Leste sai regiao ida, entaun hau sai primeiru superior regional SVD Timor Leste (2011-2017) durante periodu rua. Durante hau halao hau nia knaar iha Timor, hau mos halao knaar simu kargu ida husi dioseze hanesan Vigario Episcopal Asuntu Sosial husi 2007- 2016. Agora hau nafatin hanesan dosente iha ICR. I kongregasaun mos sai hanesan Diretur Fundasaun Verbo Divinu nebe mak ami foin hahu,”katak Pe. Gabriel.

Hahu Tama Seminariu

Hau hanoin katak atu hahu tama iha seminariu nee laos hahu tama iha motivasaun simples, tanba saida hakarak tama ka lao tuir dalan ida nee, tanba desde kriansa amu lulik misionarios sira, padre malae mutin neebe mak mai ami nia paroki. iha momentu neeba sempre mai visita iha parokia ka estasaun nebe mak iha ba, sempre toba iha uma no hela iha uma neba, nudar labarik kiik nee ita iha kuriusidade hakarak atu hare malae sira ne oinsa, no hau mos sente katak hakarak sai mos hanesan amu ida nee, simplesmente hanesan nee remata estudu ensinu basiku, ensinu pre-sekundariu hotu, hau tama iha seminariu menor iha Hokeng laiha difikuldade barak iha seminariu menor iha  Hokeng, hahan mak ladun diak iha asrama, maibe ida nee laos obstakulu  boot, iha santu akademiku hau laiha difikuldade atu ba estudu nee liu ho diak I tama Noviciado mos ladun iha dezafius, liu noviciado tinan rua, halo votus I kontinua eskola filosofia teologia to remata, ladun iha difikuldade boot hanesan grave neebe atrapalla liu ita iha dalan ida nee ladun iha, depois de simu knar misionario nee primeiru simu hau nia mandatu misionario  nee  ba timor,” katak Padre Gabriel.

Simu tiha Votus Perpeitu Pe Gabriel reseita tebes atu mai iha timor, maibe maromak nian hakarak lahanesan pe nian, ikus fatin neebe maka tolak ikus sai fatin neebe maka diak ba amo hodi hili lakoi fila ba Australia no servisu metin hodi haklake maromak nian liafuan ba sarani sira iha tinan 25 vida sacerdotal iha timor no selebra mos iha timor.

Fatin ida neebe hau reseita tebes iha inisiu tanba hau nunka hili, tuir ami nia kongregasaun nee antes halo votus perpetuas ita tenki prense formulariu ida naran petiksiomisionis neebe ita hili provinsia SVD tolu neebe iha mundu nee, neebe ita prefere atu ba, se ita hetan buat ida neebe laos ida husi tolu, ida nebe ita hakerek ba superior sira tenki fo hatene. Hau la hili timor tanba momentu nebaa Indonesia ho timor sai provinsia ida, hau la hili maibe liu tiha sira fo mai katak hau mai timor, I hau la satisfeitu ho ida nee, hau koalia ho hau nia diretur espiritual padre alemaun ida, nia dehan katak sira fo hatene o ka lae, reitor seminario menor, perfeitu sira amu sira fo hatene o katak sira fo buat nebe mak o la hili nee, hau dehan sira nunka fo hatene hau, hau hakerek surat ida komplain konaba oinsa mak hau la hili, imi haruka hau mai iha timor, no superior jeral haruka surat mai hau kopia ba provinsia, no provinsia mai dehan ba hau katak, Gabriel o labele hakerek tan surat ida nee, no provinsia fo resposta ba karta nee I  superior jeral haruka mai katak,Gabriel ba timor tinan haat (4) deit, depois ba provinsia Australia. Nunee hau mos mai halao knaar iha timor,” dehan nia.

Padre Gaby preimeiru mai iha timor nia halao knaar iha Uatu-Lari no Uato-Carbau durante tinan 4 nia laran, liu tiha tinan 4 nia laran nia laiha ona intrese atu fila ba iha Australia tanba povo timor persiza tebes padre iha sira nia moris, no amu hakerek surat ba iha Roma katak lakoi ba Australia hakarak metin iha timor.

“Hau mai iha timor fo hau ba iha Uatulari no Uatu-Carbau hela tinan haat, hau la iha ona interese atu ba fali Australia, tanba hau hare povo timor presiza tebes hau, hau hamutuk ho sira iha tempu terus no susar nian laran, moris iha tauk nia laran presaun nia laran, hau hamutuk ho sira agora hakmatek hau fila ba Australia halo saida, diak liu hau hela iha timor no hau haruka surat ida ba Roma hau lakohi ba Australia hau hakarak metin iha timor no sira mos hatan,” dehan Gabriel.

Padre hatutan buat neebe maka nia hakarak laos Maromak nia hakarak, no ikus padre deskobre katak Maromak nia hakarak mai Timor atu haksolok hamutuk ho timor oan sira. Iha tempu neebe maka difisil padre nunka husik sarani sira hamutuk nafatin ho sarani iha Parokia Uatu-Lari no Uatu-Carbau too iha 1999.

Ida nee ba hau esperensia ida neebe koko teb-tebes hau, I hau hatene katak buat nebe hau hakarak nee laos maromak nia hakarak,maibe buat nebe maromak nia hakarak nee hau deskobre ikus katak los duni nia hakarak hau mai iha timor, hau haksolok bele akompnha hamutuk ho sarani sira, hau nia sarani sira iha Uatu-Lari- Uatu-Carbau iha tempu resistensia nian, terus nia laran too 1999 hau nunka sai husi Uatu-Lari- Uatu-Carbau, hau nafatin hamutuk ho sira iha nebaa to ukun an, agora iha situasaun foun hanesan nee hau mos sei iha timor I haksolok ho situasaun tomak hamutuk ho povo no sarani sira iha nee,” tenik Pe. Gabriel.

Dezafiu neebe maka padre Gabriel hasoru wainhira iha tinan 2001 sai husi timor atu halao estudu iha Portugal, hodi kursu lian portugeus no foti espesializasaun iha area teologia da misaun, misiologia, iha dufukuldade boot atu trata visa.

Iha tinan 2001 hau sai husi timor atu ba eskola iha Portugal kursu uluk lian portugues, depois buka atu hola espesializasaun iha area teologia da misao, misiologia, hau difikuldade boot atu trata hau nia visa ba Jakarta, fulan lima trata iha Jakarta tanba momentu nee Ana Gomes representante governu Portugal ninian iha Jakarta. Hau semana ida ba dala tolu iha neba urus buat sira nee ba mai sira nia office ba mai, too fulan lima hau lahetan visa ida hau mai fali iha timor provinsia dehan o koko dala ida tan liu husi timor, I hau koko iha nee liu loron tolu hau hetan visa. Hau ba, maibe antes nee hau lori hau nia dokumentus nee ba tau  iha altar leten, hau husu JESUS se ba estudu  nee hau nia hakarak rasik no ambisaun pesoal taka dalan hau la ba eskola, hau nafatin serbisu iha timor no hela iha timor  maibe ida nee mos o hakarak atu hau bele fila fali serbi diak liu tan iha timor  loke dalan agora hau ba embaixada Portugal, foti dokumentus sira nee ba neba hau hetan kedas visa ba Portugal, no hau fiar katak Maromak hakarak buat ruma mai hau atu hau bele didika hau nia moris ho buat nebe hau iha limitasoens nebe hau iha, maibe iha Nain Maromak nia liman laran nia bele transforma ba buat diak ema barak nian iha timor nee.

Tanba nee mak wainhira hau selebra hau (25) Vida Sacerdotal hau haksolok tanba hau sei selebra hamutuk ho povo ida neebe hau hadomi, iha inisiu hanesan hau reseita maibe depois hau deskobre katak Maromak haruka hau iha fatin ida nee ho domin ho povo sira nia realidade tomak ida nee mak ksolok boot tebes mai hau to ohin loron hau mos sei nafatin iha nee.

Lia menon oinsa sai amululik ida nee vokasaun husi nain maromak nian bolu, ita halao ita knaar lao iha dalan lao tuir maromak, nee laos ita mesak maibe sempre liga ho ema seluk ho maluk padre sira ho sarani sira,ho eleitu sira nebe mak serbisu hamutuk ho ita,entaun hau hanoin katak sebisu hamutuk nafatin ho diak se buat ruma lao lalos  hakbesik aan ba malu fo  hatene, atu ita bele hadia,tanba dalaruma iha difikuldade boot nee mosu wainhira ita la hakbesik an ba malu atu tulun malu hadia buat nebe lalos,  husi kotuk-kotuk itabele estraga malu, no halo buat neebe maka ladiak,tanba nee liamenon atu apoio malu iha vida sacerdotal,vida relisiosa. iha familia ka iha sosiedade hotu-hotu presija iha honestidade disponobilidade atu bele hakbesik aan ba malu kurizi malu buat nebe mak ladiak nudar maun alin,atu nunee buat nebe ladiak bele sai diak ida nee mak importante, I nudar misionarius igreja tomak ita mak misionarius ita presija serbisu hamutuk metin I tulun malu atu lao ba oin nafatin. Emerenciana Pinto/est untl4

Facebook Comments

Leave a Reply

Your email address will not be published. Required fields are marked *