Osan TL Semo Hotu Ba Estranjeru

Osan TL Semo Hotu Ba Estranjeru

- in Economics
309
0
osan-pv

DILI – Relasiona ho Ekonomia Timor Leste (TL) depende ba sasan importasaun, osan semo hotu ba rai liur, tanba nee CCI-TL sei kolabora ho governu buka zona industrial loke fabriku produs aihan iha TL, atu prevene osan labele semo hotu ba rai liur.

Tuir Vise Prezidente CCI-TL Joao Alves hatete, durante nee sasan hotu husi kiik too boot, hanesan supermi, material konstrusaun, manu no bee agua, mantolu importa husi nasaun Indonesia.

Se ita tinan –tinan depende sasan importasaun, signifika katak, osan semo hotu ba rai liur, la sirkula iha rai laran, hanoin CCI-TL muda politika investe ba setor produtivu, produs aihan iha rai laran, ba oin sei kolabora ho governu buka  zona industria halo investimentu Fabriku, atu produs sasan iha rai laran,’ ’dehan Joao ba STL,Tersa (14/03/2017) iha Timor Plaza hafoin partisipa Serimonia Lansamentu program Improve employability income generating opportunities no workshop ba formulasaun planiamentu operasional ba projetu indigo.

Nia hatete, CCI-TL iha politika dezenvolve setor produtivu duke depende ba projetu governu nian, hanesan Manutolu no manu, bee agua, tuir lolos produs iha rai laran, lapresiza importa husi rai liur, husu ba setor privadu hotu, tenke iha inisiativa no komitmentu atu dezenvolve ekonomia rai laran, labele hein projetu governu nian.

Nia hatete, presiza fo trenamentu ba setor privadu sira, oinsa hasae kapasidade, joven sira nian, para sira iha  hanoin naruk kopera ho governu buka zona industria halo fabriku iha rai laran.

Agora dadaun CCI-TL kopera ho governu asesu kreditu finanseiru iha banku ho jurus kiik, hodi apoiu setor privadu sira halo industria kiik bele sustenta ekonomia rai laran lao diak.

Iha parte Seluk Diretor Nasional Regulacao Comersial Domingos Guterres hatete, Ekonomia TL sei depende ba sasan importasaun, kuaze sasan nesecidade baziku, material konstrusaun no roupa depende sasan importasaun  95% Sasan depende ba importasaun maibe exportasaun menus 5% hare ekonomia laiha balansu tanba importasaun boot liu exportasaun.

Hau hanoin politika governu nian liu husi Ministeriu Comersiu Industria e Ambiente (MCIA) apoiu industria kiik no koperativa sira, hahu loke fabriku produs aihan iha rai laran, hanesan kafe, bee, no masin, hodi substitui produtu importasaun,’’dehan Nia.

Nia hatete, Produtu kafe no produtu bee, masin kuantidade sufsiente responde ba konsumi rai laran, bele minimiza produtu masin importasaun, atu halo investimentu laos governu deit, maibe setor privadu sai parseiru governu nian, tenke halo investimentu loke fabriku, governu apoiu fasilita sira dudu sira halo investimentu lao ba oin.

Nunee mos Representante povu iha Uma Fukun Parlamentu Nasional Eladdio Faculto de Jesus Bankada Fretelin hatete, ekonomia TL depende ba sasan importasaun neebe, Orsamentu Jeral Estadu tinan –tinan PN aprova barak sai hotu ba rai liur, la sirkula iha rai laran, tanba gasta sosa material konstrusaun, nesecidade baziku ho sasan seluk, TL laiha fabriku, hare setor privadu barak depende ba konstrusaun sivil, lahalo investimentu.

Hau hanoin setor privadu, tenke konsentra halo investimentu, hodi dudu ekonomia lao ba oin, se depende ba projetu governu nian, sei la hadia ekonomia povu kiik sira nian, hanoin Setor privadu sai pilar dezenvolvimentu ekonomia tenke halo investimentu loke fabriku hodi produs aihan iha rai laran, distribui ba merkadu domestika, bele  redus sasan importasaun,’’dehan Nia.

Nia hatete, Governu tenke apoiu setor privadu sira, asesu kreditu finanseiru iha banku hodi halo investimentu iha setor produtivu. Josefa dos Santos

 

Facebook Comments

Leave a Reply

Your email address will not be published. Required fields are marked *