Opozisaun Rejeita Programa Governu, Alkatiri: “Hau Lakohi Tan Mai PN”

Opozisaun Rejeita Programa Governu, Alkatiri: “Hau Lakohi Tan Mai PN”

- in Politics
725
0
Debate PM

DILI — Bankada opozisaun CNRT, PLP no Khunto iha Parlamentu Nasional halo mosaun rejeisaun ba programa VII governu konstitusional neebe aprezensaiha uma fukun Parlamentu Nasional.

Mosaun rejeisaun bankada opozisaun nian pasa ho votus afavor 35 no kontra votus 30, nunee programa VII governu konstitusional nian neebe aprezenta husi Primeiru Ministru, Mari Alkatiri sumba. Tanba maioria deputadu iha parlamentu nasional rejeita programa VII governu nian no sei iha oportunidade atu aprezenta dalaida tan. Maibe kuandu deputadu sira rejeita tan, setimu governu monu, prepara ba eleisaun antisipada.

Dokumentu mosaun rejeisaun programa VII Governu Konstitusional nian hatama husi partidu oposizaun CNRT, PLP no Khunto ho razaun programa VII Governu nian  laklaru.

Molok deputadu hahu vota ba mosaun rejeisaun bankada opozisaun nian, Primeiru Ministru Mari Alkatiri dehan, nia hakarak sui fuk kaber lai.  Bainhira Primeiru Ministru Mari Alkatiri remata sui fuk deputadu bankada Fretilin, PD no membru Governu VII Governu Konstitusional hamrik hotu hodi fo upplause ba Xefi Governu.

Nunee tama votasaun ho hit kartaun deputadu sira nian, mosaun rejeisaun bankada opozisaun nian pasa, Primeiru Ministru Mari Alkatiri, hamrik lao ba hakuak malu ho nia oan feto Nurima Ribeiro Alkatiri ho matawen, nunee mos hakuak malu ho deputadu husi bankada Fretilin, PD no membru Governu VII Governu Konstitusional Xefi Governu tanis.

Entretantu opozisaun sira remata votasaun sira ida- idak hamrik sai ba konsentra hotu iha bankada CNRT kuaze 30 minutu, hafoin nee sira sai mai eskoltu sira halo seguransa metin ba sira hodi ba sae ba  kareta.

Bainhira jornalista sira tenta intervista ho oposizaun CNRT, PLP, no Khunto, sira lakohi fo komentari no ba sae liu sira nia kareta hodi fila ba uma.

Enkuantu Primeiru Ministru Mari Alkatiri hatetesei iha forsa sei kontinua to manan, xefi Governu hatutan oposizaun CNRT, PLP ho Khunto hanesan beneno, tanba antes haree programa sira dehan ona rejeita.

Alkatiri konsidera neebe nia lidera hanesan bebe oan ida, hetan liu husi kazamentu mane ho feto oan ida, liu husi sira nia kazamentu hetan labarik oan ida seidauk hatene oan nee moris mai feto ka mane, ema oho kedan.

Hau hein Xanana maimaka ami nain rua koalia,” dehan Xefi Governu ba Jornalista sira  iha PN, Kinta (19/10/2017).

Primeiru Ministru hatutan komesa segunda governu kontinua halao ninia servisu hanesan bain bain, maibe Xefi Governu sei entrega servisu ba Ministru Estadu ruma.

Agora hau entrega ba Ministru Estadu ruma, tanba hau tenke tun un ba baze hodi programa nee ba deskute ho povu,” tenik Alkatiri.

Primeiru Ministru informa programa hot-hotu neebe mak apresenta hamutuk ho membru governu seluk iha Parlamentu Nasional relasiona ho vida povu no dezenvolvimentu iha rai laran. Maibe, iha Parlamentu Nasional la fo resposta diak ba programa nee hodi hatan nesesiadades bazikapovu nian.

Alkatiri konsideranee hanesan odiu no vigansa ba governu nee atu labele ukun.“Hau husu ba povu tomak atu hakmatek nafatin akompana prosesu nee ita foin mak komesa no seidauk too iha fim no prosesu nee foin mak komesa no hau dehan hau nia Irmaun Xanana mai hau sei koalia atu ami nain rua tuur hamutuk atu koalia kona ba governu nee,”tenik Alkatiri.

Nia parte mos latauk atu lakon nia serbisu no husu lalika laran taridu. Ninia parte mos laran kontente tebes no rekunese ukun nee katak todan tebes. No depois bankada opozisaun sira rejeita nia fila ba uma ho kman tebes atu lao haleu Timor Leste laran tomak, lori dokumentu nee atu halo referendum no laiha ema ida neebe mak bandu no lider partidariu iha obrigasaun atu esplika ba povu neebe mak akontese iha Parlamentu.

Alkatiri hatutan nia sei hahu fila fali husi Oecusse iha semana ida nee duni no ba Lautem no haree buat nee. Nunee nia seirai tiha ona kareta PM nian no lori fali hau nia kareta eis Primeiru Ministru. No hau hanesan primeiru Ministru minoritariu hau sei kumpri too Janeiru no hau sei la fila fali mai iha Parlamentu atu lori programa nee hau koalia ho konviksaun, tanba nee hau husu ba joven sira atu fila ba uma hakmatek hemu imi nia xa no kafé tanba prosesu foun nee mak hahu ohin,”dehan Alkatiri.

Primeiru Ministru Mari Alkatiri liu husi debate programa governu VII governu konstitusional, deklara nia nafatin fokonfiansa lider karismatiku Kay Rala Xanana Gusmao.“Hau hein nafatin hau nia irmaun Xanana atu mai, tanba ami nain rua sei presiza koalia buat barak, hau rona dehan iha ona kontaktu ba mai tau FB nee bar barak los, konta informasaun mos bar barak los, mais hau sei konfia nafatin Xanana i hau fiar nia mos nia sei iha konfiansa mai hau agora hau hein nia maimaka ami nain rua sei koalia,” dehan PM Mari Alkatiri

Xefi governu mos hein tempu ida sira sei tama iha dalan klot ida inia koalia Taur Matan Ruak, nunee mos sei hein mos loron ida lapresiza dalan klot udan boot mai, mota sei tun i sira nain rua Naimori sei koalia fila fali.

Hau nia alin ami hamutuk lapresiza koalia tan, maibe nee ho sira be lareprezentante iha nee bele konta ba governu nee hakarak reprezenta imi hotu nia preokupasaun, espetativa no halerik lor loron, tanba ami hahu 197-1975 nee luta ba povu tomak, tanba estadu nee maka dehan ita lubun oan ida deit maka reprezenta hotu hotu,” dehan Xefi Governu.

Iha biban nee koalia programa pontu orden bar-barak, defeza ondra bar-barak, hanoin hotu hotu hatene ona razaun iha neebe, falta de rajaun iha neebe, so dala barak ladeside, tanba iha razaun ka laiha razaun. “Ita deside tanba iha interese atu foti desizaun tuir sentidu ida, se deside baze ba interese ita hotu haree interese nee ita nian rasik ka ba interese nee povu nian, nee maka dala barak ita koalia iha nee ita deside baze maka interese ita konfundi interese se nian los,” tenik aman fundador nasaun.

Maske nunee xefi governu dehan, ohin dadaun nee loron tolu ba kotuk nee komesa iha krimi, iha neeba ema oho malu, hana rama ambon ba malu, apelu atu hotu hotu hakmatek, nunee mos fos folin sae, fehuk mos laiha ema buka iha merkadu laheten tanba rajaun saida, impaktu iha uma fukun ida nee maka halo buat sira nee sai hanesan nee.

Povu nia espetativas boot tebes, povu hakarak hotu hotu tur hamutuk, atu rezolve sira nia nesesidades maibe konfundi interese povu nian ho interese partidu. Interese povu nian maka politika sira nian rasik.

Hori kalan Hau tur hau hanoin ita tempu sai ezemplu ba mundu, ita ba hamutuk Guine Bisau, Guine bisau sai nakfila, agora hau hanoin lakleur tan husi Guine Bisau maka mai fo fali lisaun ba ita,” dehan PM Alkatiri.

Iha biban nee Xefi Governukomenta konaba governu  frajil, tuir nia governu mak frajil  ka estadu,  tan tenke haree didiak, governu nee ema maka harii,  hakarak governu nee lao ba oin ka lakohi governu lao ba oin, neebe saida maka frajil governu ka estadu nee maka importante.

Ita hanoin didiak hau laos dehan hau maka sai Primeiru Ministru, hau lapresiza, hau la buka atu sai riku i laos iha fatin ida nee deit PM sei la fo riku mai hau, maibe povu maka fo votu ita atu respeita povu nia votu ka ita atu kaer fali mekanismu kontitusinais legais para kontra fali povu nia votu, hau hatene katak nee demokrasia,” PM Alkatiri afirma.

Demokrasia tuir Xefi Governu katak, reprezentativa signifika PN maka uma fukun boot liu iha rai nee, mais dehan ona dala rua ka tolu iha lisaun ida nee, hotu hotu iha nee lareprezenta povu tomak hakarak ka lakohi nee maka realidade.Tanba hotu hotu reklama katak reprezenta povu tomak, tanba povu lafo nia votu sein pursentu ba partidu lima nee, sira neebe lahetan asentu iha PN nee mos iha espetativa sira hein hela, tanba lei maka fo dalan.

Ita mos reprezenta sira mos nee, espetativa nee laos sira be vota ba ita nee sira be lavota ba ita mos iha espetativa, tanba nee maka governu nee balulaos Fretilin laos PD mai husi partidu seluk, tanba atu responde ba espetativa jeral,” tenik PM komenta Alkatiri.

Xefi governu mos hatoo obrigadu ba deputada Armanda Berta, tanba hatete Fretilin sai aman inan no Khunto sai oan, hanesan aman bele ka lae koalia ba nia oa.

Hanesan aman hau fo obrigadu ba hau nia oan, tanba mai halo kritika ba aman biar laos aman nia sala, aman ho oan nee hanesan mota ho tasi tempu bai loron dok malu, tempu udan hamutuk fali nee maka aman ho oan,” dehan PM Mari.

Iha fatin hanesan Membru PN husi bankada Khunto Armanda Berta hateten “Hau hakarak hateten deit tanba sa maka partdu Khunto hodi retira husi partidu Fretilin, partidu Khunto simu rejultadu eleisaun iha 2017 husi povu TL, no partidu politika sira presiza servisu hamutuk no Khunto tau iha nia pratika ba kestaun ida nee, tanba nee maske partidu Khunto lahalo koligasaun ho Fretilin, maibe partidu Fretilin hanesan aman ba partidu Khunto,” dehan deputada Armanda.

Entretantu deputadu bankada Fretilin Mariana Belo hatete programa governu nian fo benefisiu ba povu, tanba nee bainhira opozisaun vota kontra ou lapasa maka dalan seluk fo fila ba povu maka sei deside.

Organizasaun Naun Govermental iha rai laran durante nee akompana iha aprezentasaun programa VII governu nian nota, katak partidu opozisaun neebe kompostu husi Partidu CNRT, PLP Khunto hakarak hatun VII Governu Konstitusional.

Diretor Ezekutivu Lao Hamutuk Juvinal Dias dehangovernu ida nakloke mak governu ida agora nee, hodi koko atu rona opozisaun maibe opozisaun mos tenke foti oportunidade ida nee hodi hatama programa sira neebé sustentavel liu tan no iha alternativa liu tan.

Nia dehan, opozisaun sei foti karakter ofensivu liu no ataka deit, se opozisaun la fo oportunidade nee sei halakon tiha oportunidade atu ba moris diak povu nian, karik iha interese atu ba ukun.

Hau hanoin diak liu foti oportunidade nee fo introdusaun kona-ba soberanu agrikultura sustentavel uma ba povu konklui lalais iha programa nee, nunee povu bele hetan benefisu lalais liu duke soke malu hela deit no la fo espasu ba governu nee,”dehan Juvinal.

Tuir nia ihatimor governu neebe forte liu dala barak la rona opozisaun, maibe governu ida agora hakarak rona opozisaun sira nia programa, tanba ne’e opozisaun tenke foti ida nee. Mezmu bele halo kritiku maibé tenke razuavel ba projetu bobot sira.

Benefisu sosiál benefisu ekonomiku husi projetu sira nee ba povu opozisaun tenke foti papel hodi dezafia nunee bainhira governu implementa projetu karik sira bele halo tuir regras konstituisaun neebe iha.Durante loron haat nia laran opozisaun sira la fo oportunidade ba governu, nee signifika sira hakarak atu hetan poder, karik sira hanoin demokrasia nia lalaok mak hanesan nee. Maibe demokrasia laos atu sura kadeira atu manan poder no demokrasaia nia hun nee mak povu nee katak demokrasia fo poder no kompetensia ba Parlamentu Nasionál para deside buat ruma ba povu, buat sira nee hotu tanba iha interese politiku boot liu fali duke interese atu hadia povu nia moris.

Juvinal komenta estabilidade sai hanesan responsablidade instituisaun tomak hotu–hotu no polítiku sira tenke hanoin ida nee no labele halo paniku ho sira nia pozisaun politika tanba nee tenke ajuda povu hakmatek liu husi nasaun neebe edukativu no konstrutivu.

Governu ida nee mak monu klaru ema sei buka meus fali ba governu neebe sai mos tenke monu no hamonu malu valor mak Timor laiha dezenvolvimentu neebe klaru husi liur ema seluk mak aproveita Timor. Kona-ba eleisaun antesipa nee konstitusional bele akontese nee konsekuensia husi politika halo iha Parlamentu Nasional bainhira partidu sira deside vota kontra, governu bele monu iha fulan neen nia laran bele mosu eleisaun antesipada.Eleisaun antesipada hanesan mekanizmu konstitusional nia iha konsekuensia politik ekonomi sosial tenke hetan konsiderasaun ba povu babain ida sae tun no la important ba sira estabilidade, ba sira atu buka moris.

Responsabilidade partidu politiku sira garante establidade atu garante buat diak id aba sira hanoin mak hatun mal maske ne’e politika vertikal maibe fo impaktu ba politika horizontal entaun halo povu kiik mak sai vitima.

Xefi Bankada partidu Khunto Luis Roberto hateten, Planu estratejiku partidu CNRT, PLP ho Khunto hari partidu nee ninia sentidu para hadia hadau ou kaer ukun, bainhira Governu VII Kontitusional monu.

Hau fiar katak ninia planu estratejia hari bloku nee ninia sentidu halai ba iha neeba atu kaer ukun, bainhira governu monu, maibe buat hotu ita akompania hela governu minoria nia programa ita hodi haree tok atu mosu konfiansa ba iha PN kada deputadu sira nia konfiansa hanesan neebe hakat liu ka la, tanba ita haree debate loron tolu situasaun ladun kontrolu hodi tur hamutuk para konvense malu,” dehan deputadu Luis.

Nia dehan, CNRT maka hanesan partidu segundu vensidor PLP ho Khunto kria bloku ida katak iha maioria, no iha nia programa no plataforma neebe preparadu ona.

CNRT maka hanesan partidu segundu vensidor PLP ho ami Khunto ami kria bloku ida katak ami iha maioria, ami mos iha ona programa no plataforma neebe preparadu ona,” deputadu Luis hateten.

Deputadu Luis mos haktuir tan katak, programa governu fo benefisiu ba povu, maibe tenke priensia rekezitus tuir lei maxumenus iha kadeira 33 iha asentu Parlamentu Nasional. Maibe bloku koligasaun nia programa nee diferensia, tanba governu foun iha programa neebe foun.

Entretantu membru PN husi bankada CNRT Carmelita Moniz hatete,se maka dalan laiha ona ita tenke ba duni eleisaun antisipada, hau senti laiha partidu ida maka hakfodak ba eleisaun antisipada, kuandu dan nee to iha neeba, mais tuir konstituisaun RDTL seidauk too iha neeba ida,” dehan Deputada Carmelita. Carme Ximenes/Domingos Piedade

Facebook Comments

Leave a Reply

Your email address will not be published. Required fields are marked *