Onestidade, Kompleta Governu

Onestidade, Kompleta Governu

- in Politics
34
0
images (3)

DILI-Lider sira presiza iha onestidade ba malu, atu nunee bele kompleta estrutura membru governu neebe seidauk kompletu.

Deputadu bankada PD Antonio da Conceicão hatete, atu kompleta estrutura membru governu  husi parte bankada AMP husu hanesan bolu atensaun ba Sekretariu Estadu, kona ba kontinuidade retira OJE no mos intensaun diak atu haree fali OJE neebe atu mai.

Nia dehan, Laos nee deit maibe kondisaun ida katak, atu kompleta estrutura nee importante tebes, embora bele dehan katak buat nee seidauk haree hanesan urjente.

Maibe nia parte haree hanesan la normal, tanba iha estrutura lei organiku preve situasaun ida, mais nia andamentu too ona tinan ida resin situasaun mak nafatin hanesan nee.

Publiku presiza rona informasaun kona ba estrutura governu atu kompleta hodi fasilita debate OJE no ezukuta OJE, tanba tinan besik 3 ona ita lao situasaun hanesan nee nafatin, neebe ita tenke onestidade ba malu katak situasaun nee la bele kontinua bei-beik, hatete Antonio liu husi sesaun plenariu, iha PN, Dili,Tersa (10/12/2019).

Povu tuir deputadu nee katak, presiza dezenvolvimentu, tanba ohin loron bai-loro naruk, iha fatin barak mak laiha bee-mos, populasaun sira lao loro manas dudu ai-maran, leba aifuan tun sae, ida nee ita tenke haree situasaun sira nee.

Labele estudu mikro ho makro katak modo folin nee larelevante, tanba realidade moris nee povu sira hatudu hela katak ita sei iha tristeza.

Kompleta estrutura para OJE mai fali PN ita hotu fo apoiu  tomak hodi halao dezenvolvimentu, tanba ida nee mak objetivu komu, deputadu nee hatete.

Nunee mos deputadu Antonio Verdial liu husi deklarasaun politika bankada KHUNTO dehan , hanesan reprezentante povu iha PN, liu husi bankada KHUNTO akompana situasaun estrutura governu bainhira loos mak bele kompleta.

Lor-loron ita dada malu no dudu malu kelur tebes, halo impase nee naruk ba bei-beik, too bainhira loos mak atu hakotu impase, tanba povu iha nasaun ida nee hein hela dezenvolvimentu, hatete Verdial.

Nia haktuir, istoria hatudu katak iha tinan 2019 governu iha semana kotuk lori proposta OJE 2020 mai iha uma fukun PN,  iha momentu nee orgaun soberanu 2 hamosu istoria.Bankada governu bain-bain suporta, maibe iha tinan ida nee oin seluk, tanba bankada governu mak lee no estuda ba proposta OJE 2020 nian.

Maski nunee Verdial dehan, buat nee hotu laloos katak asesores iha PN mak halo, maibe esforsu husi deputadu hotu, hahu husi prezidente komisaun ho nia meza neebe  ho membru deputadu tomak hola parte efektivu hodi servisu makas.

Tanba iha semana kotuk Primeiru Ministru (PM) promote ba sira deputadu 65,  katak dia 13 governu sei sub-mete fali proposta OJE 2020 mai, neebe sira husu atu hadia proposta lei OJE 2020 nian, hatuur orsamentu atu nunee orsamentu hotu tuir dalan loos.

Deputadu nee hatete, Karik orsamentu sira nee atu halao dezenvolvimentu, entaun presiza aloka iha kapital dezenvolvimentu, labele tau fali iha transferensia publiku.

Hatan ba kestaun nee reprezentante governu, Sekretariu Estadu Komunikasaun Sosial Mericio Akara hatete, kona ba estrutura governu la kompletu,  sira nebe seidauk pose, ida nee Primeiru Ministru halao servisu tuir nia kompetensia lei haruka.

Nia dehan, PM propoin ona  mantein lista hodi hein pose, maibe too agora seidauk iha resposta husi Prezidente Republika. Karik deputadu sira iha PN iha dalan seluk ruma bele koalia mos ho Prezidente Republika, tanba husi governu PM kontinua mantein lista neebe iha ona. Guilhermina Franco

Komentariu

Facebook Comments

Leave a Reply

Your email address will not be published. Required fields are marked *