OMS Lori Aimanas Rega Laen

OMS Lori Aimanas Rega Laen

- in Krime
263
0
Tribunal.................

DILI- Liu husi alegasaun final Ministeriu Publiku (MP) solisita ba tribunal atu aplika pena multa $30 ba arguida OMS, tanba faktus neebe imputa ba arguida MP konsidera aprovadu.

Iha audensia julgamentu, liu husi alegasaun ministeriu publiku solisita ba tribunal atu aplika pena multa ba arguida, razaun tanba arguida lori duni aimanas neebe tau iha akua kiik hodi rega ba iha lezadu nia matan halo lezadu, too baixa iha Hospital Vera Cruz tuir atestadu mediku neebe junta iha autus.

Ministeriu publiku mos konsidera arguida komete duni krime ofensas integridade fizika simples iha artigu 145 kodigu penal, , konjuga ho Krimi Violensia Domestika, tanba nee ministeriu publiku husu ba tribunal atu aplika pena multa 30 dias, kada dia 1 Dolar, durante 30 dias.

Alende nee husi parte defeza husu ba tribunal atu aplika pena admoestasaun ba arguida. Aplika pena multa defeza husu ba tribunal atu haree mos ba arguida nia moris, tanba nia moris depende deit ba fila liman iha merkadu.

Iha audensia julgamentu arguida mos deklara, faktus los hotu, durante nee nia mak buka rasik osan hodi sustenta nia oan ba eskola ate agora.

Nia dehan, nia lori aimanas rega duni lezadu, tanba durante nee lezadu nunka tau matan ba sira nia oan, maske sira fahe malu ona.

Nia mos rekonese, nia ba duni lezadu nia servisu fatin atu husu deskulpa ba lezadu nia xefi, tanba nia telefone ba lezadu nia xefi iha kalan bot.

Alende nee lezadu mos konfesa ba tribunal katak, iha momentu akontesimentu arguida ba duni iha lezadu nia servisu fatin no fo hatene ba lezadu nia xefi katak, hasai lezadu husi servisu, xefi dehan ba nia katak, imi nia problema imi ba rezolve hau la hatene.

Lezadu dehan, depois iha meudia lezadu ho nia kolega sira atu ba han, lezadu sai mai estrada sei konversa hela ho nia kolega polisia ida, arguida lao husi kotuk lori aimanas neebe prepara hela iha akua rega ba lezadu nia matan laran, halo lezadu monu kedas iha fatin, lezadu nia kolega polisia nee maka lori halai ba hospital Vera Cruz.

Lezadu mos deklara tan, nia ho arguida fahe malu ona, sira iha oan ida. Razaun arguida rega aimanas ba nia matan, tanba arguida hakarak entrega sira nia oan ba lezadu mak haree maibe lezadu rekuza. Rekuza tanba bainhira sira nia oan ba hela ho lezadu, arguida sempre ba buka problema ho nia.

Nia afirma tan, durante nee nia mos sustenta labarik nee, no fo bebeik osan hodi selu labarik nia eskola. Rona tiha husi parte sira, tribunal suspende tiha julgamentu nee ba iha loron 6 Novembru tuku 5:00 otl hodi rona desizaun final.

Tuir akuzasaun husi Ministeriu Publiku katak, arguida OMS ho lezadu LCA moris hamutuk nudar feen lae iha tinan 1993 oan nain ida. Iha loron 26 fulan Janeiru tinan 2017, mais ou menus oras tuku 15h30 iha edifisiu komisaun veteranus nian iha Caikoli, lezadu hamrik hela ho lezadu nia xefi ho naran Joao Niki derepenti deit arguida hakbesik aan ba hodi koalia ba lezadu nia xefi dehan, hapara lezadu husi servisu.

Depois lezadu nia xefi hatete ba arguida katak,“ imi nia problema hotu tiha ona” nunee lezadu nia xefi mos lao ses tiha husi fatin refere no lezadu mos komesa lao ses atu evita labele mosu problema iha edifisiu laran.

Lezadu lao sai atu ba estrada maka arguida lao tuir husi lezadu nia kotuk hodi rega aimanas tama ba iha lezadu nia matan laran rua, tanba lezadu senti nia matan manas makas no tahan labele hodi husu ajuda ba polisia ho naran Lorenco hodi lori lezadu ba klinika Vera Cruz.

Ho nunee arguida OMS hanesan autor Material ho forma konsumadu ba krimi violensia domestika ho forma ofensas integridade fizika simples neebe previstu no funidu tuir artigu 145 kodigo penal, no artigu 35 husi lei kontra vilolensia domestika, lei No, 7/2010 de 07 de Junho.

Audensia julgamentu nee prezide  husi juis singular, Ivan Antonio Suritay, ministeriu publiku reprezenta husi prokurador Bartolomeo de Araujo, arguida hetan asistensia legal husi defensor publiku Cancio Xavier. Terezinha de Deus

Facebook Comments

Leave a Reply

Your email address will not be published. Required fields are marked *