OJE 2020 Biliaun 1.668

OJE 2020 Biliaun 1.668

- in Politics
137
0

DILI-Governu liu husi reuniaun Konsellu Ministru (KM), aprova ona proposta lei lei Orsamentu Jeral Estadu (OJE) ba tinan 2020, ho montante biliaun $1.668.

Iha loron 2 fulan Dezembru tinan 2019 Parlamentu Nasional ho governu halo debate OJE 2020 ba jeneralidade, maibe loron 3 fulan nee governu deside retira proposta OJE husi Parlamentu Nasional (PN), tanba deputadu sira konsidera orsamentu nee la prenxe estrutura no inkonstitusional.

Bainhira iha Parlamentu Nasional Primeiru Ministru Taur Matan Ruak kompromete katak, governu sei lori fila fali proposta OJE 2020 iha loron 13 Dezembru tinan 2019, maibe lakonsege no governu husu tan tempu too loron 19 fulan nee, hodi halo reajusta.

Ho nunee iha horseik (kinta red), governu liu husi Konsellu Ministru, (KM) aprova proposta Orsamentu Jeral Estadu (OJE) 2020, neebe antes nee ho montante biliaun $1.95 no hatun  ba biliaun $ 1.668, hodi sub-mete ba Parlamentu Nasional.

Tuir Ministra Finansas Interina, Sara Lobo Brites katak,  liu husi enkontru  Konsellu Ministru aprova OJE tinan 2020,  maibe esklui tiha RAEOA e ZEEMS, Uniao Europea no mos emprestimu, atu  kobre nesesidade tomak programa no prioridade nasional neebe  governu da-8 defini.

Montante nee KM deside biliaun $ 1.668, maibe ida nee bainhira ita esklui tiha alokasaun rai RAEOA e ZEEMS neebe, ami konsidera katak RAEOA e ZEEMS uteliza duni sira nia osan sei la afeita ba levantementu fundu mina rai, entaun sei redus mos montante neebe mak sei aprezenta, dehan Sara ba jornalista sira hafoin remata enkontru KM, iha palasiu governu, Dili, Kinta (19/12/2019).

Orsamentu Jeral Estadu  nee tuir governante nee katak, sei sujeitu uitoan iha alterasaun, maibe governu sei halo  servisu para kompleta, nunee  lei proposta orsamentu sei submete ba Parlamentu Nasional  Kinta (19/12) mais aumenus  05.00 lokraik.

Ami sei submete kedas ba iha Parlamentu Nasional orsida (kinta red) lokraik, hatete Sara.

Enkuantu montante  OJE 2020 ho montante biliaun $ 1.668  sei aloka  ba salariu no vensimentu tokon $ 235,610, bens no servisu tokon  $ 583,800,  transferensia publika tokon $ 328,206,  kapital dezenvolvimentu tokon $ 31,488.837.

PN Simu OJE 

Hafoin simu Proposta  lei OJE  2020, Prezidente Parlamentu Nasional Arão Noe hatete, governu sub-mete ofisialmente proposta da lei OJE 2020 hodi substitui proposta anterior, neebe governu retira foin liu ba.

“Governu sub-mete mai nee ho pedidu karater urjensia, neebe tuir rejimentu tenke baixa ba komisaun C halo apresiasaun depois aprezenta ba plenariu hodi halo deliberasaun konkorda kalae , pedidu de urjensia, se pedidu urjensia mak plenariu konsidera hodi aprova, ami bele halo kalendariu ba debate ,” hatete PPN nee ba jornalista sira, iha PN, Dili, Kinta (19/12/2019).

Maibe nia dehan, plenariu aprova karater urjensia entaun audensia sira bele limita tempu, maibe debate ba debate jeneralidade mantein loorn 3, no espesialidade loron 10. Neebe agora prosesu ohin (sesta red) haruka ba komisaun C, depois komisaun aprezenta paraser iha Segunda mak bele halo apresiasaun ba relatoriu komisaun C nian.

Tanba tuir Arão  katak, orsamentu nee alokasaun nafatin hanesan orsamentu estadu, hanesan ba kategoria salariu bensimentu, bens de servisu, kapital menor, transferensia publika no kapital dezenvolvimentu, husi kategoria 5 nee mak sai proriedade ba OJE 2020. Neebe ho total biliaun $1.668 dolares.

Nia afirma, husi montante nee mai husi mos saldo orsamentu RAEOA nian neebe durante nee rai hela iha konta RAEOA nian ho montante tokon $127. Tanba nee governu konsidera hatama tiha iha OJE hanesan reseitas para justifika, inklui mos osan emprestimu tokon $ 73 no  apoiu  husi banku mundial por volta tokon $ 7. Tanba nee mak numeru sae too biliaun $1.668, maibe numeru orsamentu loo-loos nee biliaun $1.450.

Ida nee mak orsamentu loos, maibe tanba tau tan RAEOA  emprestimu, inklui ajuda husi banku mundial mak sae ba biliaun $1.668, dehan nia.

Prezidente Parlamentu Nasional nee haktuir tan katak, ho redusaun nee pozisaun PN, sei bazeia ba debate, tanba proposta OJE foin liu ba nee, iha plenariu mak sujere atu governu retira fali hodi reformula, tanba nee governu konsidera hodi halo reformulasaun hatun orsamentu.

Nia dehan, nunee konsidera mos rekomendasaun husi komisaun sira no plenariu nian, neebe kabe ba plenariu nia apresiasaun iha debate fali, bele hatama fali proposta ba aumenta no redus tan nee dalan nakloke.

Proposta ho karater urjensia nee hau hanoin iha relevante duni, tanba agora ita besik tama ona ba Janeiru  foin debate, entaun bele implika ba uza duo-desimu tempu naruk, Tenik PPN Arão.

Arão mos konkorda ho pozisaun governu nian, tanba ba interese estadu, labele husik estadu nee moris ho  orsamentu duo-desimu, iha tempu naruk, neebe presiza duni ho pedidu karater urjensia. Maibe atu konsidera pedidu nee desizaun iha plenariu nia liman.

Iha fatin hanesan Ministra Finansas Interina Sara Lobo hatete, “Ita hotu akompana ohin dader Konsellu Ministru halo reuniaun no aprova ona nia montante global ba proposta orsamentu 2020 ho total billaun 1.668, ida nee inklui RAEOA e ZEESM, emprestimu no mos doasaun husi uniaun Eropeia,” hatete nia.

Sara haktuir, husi total nee kuandu hasai tiha RAEOA, tanba RAEOA utiliza fila fali nia saldu durante nee nia akomula hela iha tinan hirak nia laran, no mos reseitas  neebe mak nia rekolla iha RAEOA no nia jurus ba iha depozitus rai iha banku komersial sira, utiliza fali por volta tokon $ 127, para re-aloka fali nia orsamentu.

Maibe nia dehan, kuandu exklui tiha RAEOA ho emprestimu nian ho montante tokon $73, no doasaun tokon $7.5 entaun orsamentu lo-loos neebr afeta ba iha levantamentu mak biliaun $1.460.

Ida nee kompara ho tinan agora 2019 biliaun $1.482 entaun iha diferansa tokon $21. Maibe wainhira kompara biliaun $1.668 ho orsamentu 2019 emtermus pursentuais iha 3 pursentu.

Nia afirma, ba programa no planu konsertaza halo orsamentu bazeia ba programa, neebe nia implikasaun iha, tanba halo redusaun. Maibe governu tenta atu iha redusaun nee nafatin preoridade ba investimentu no mos tenta atu jere nafatin obrigasaun kontratuais neebe governu iha atu nunee kontinua tinan oin bele selu ba iha obrigasaun sira neebe iha.

Entretantu kona ba dokumentu proposta OJE, seidauk kompletu, tanba tempu nee mos iha loos momentu neeba loron boot no feriadu lubuk ida, neebe ohin governu entrega deit proposta de lei, maibe nia dokumentus suplementares sira nee sei mai tuir iha inisiu de Janeiru 2020.

Tuir governante nee katak, ministeriu no instituisaun neebe kontribui ba sofre redusaun orsamentu nee kuaze kontribui husi ministeriu hotu kona, sofre barak liu, ladun propriu, tanba orsamentu biliaun $1.95 nee iha proposta hela laos fiksu. Neebe agora haree fali proposta foun nee deit kompara ho tinan 2019 haluha ona foin dadaun retira ona nee. 37. Luciana Ximenes/Guilhermina Franco/ESTI03

 

Komentariu

Facebook Comments

Leave a Reply

Your email address will not be published. Required fields are marked *