Naimeco Trauma Ho Aktividades GAM

Naimeco Trauma Ho Aktividades GAM

- in Distritu
1158
0
monumento_lifau

AMBENO–Komunidade Suku Naimeco senti trauma ho buatus aktividades grupu arte marciais (GAM). Buatus GAM nee mosu ligadu ho problema konfrontasaun membru GAM no kazu Frederico Loka semana hirak liuba.

Komunidade Naimeco husu polisia atu toma atensaun. Informasaun refere hatoo husi Xefe Suku Naimeco, Marcos Liu bainhira hasoru iha Naimeco, Postu Administrativu Pante Makasar, Oecusse, Segunda (16/10/2017).

Issue refere halo komunidade sira tauk iha tempo kalan. Sira tauk hetan atakasaun husi membru GAM maibe sei rumoris deit. I Xefe Suku Naimeco, Marcos Liu apela ba ninia komunidade labele fiar demais ba buatus. Tenke hatene didiak, labele arbiru.

Nunee mos konaba kazu Frederico Loka neebe semana hira liuba oho mate feto ida husi Manatutu iha Ambeno, Oecusse. Nia husu komunidade labele preokupa tanba, ida nee kompetensia tribunal nian atu haree krimi refere.

Buatus aktividade membru GAM mosu makaas iha area Suku Naimeco, tanba konfrontasaun entre membru GAM iha area Merkadu Maumate. Tuir buatus neebe espailha, ema balu duun sira nia suku maka autor ba kazu rua nee (konfrontasaun entre membru GAM iha area Merkadu Maumate no krimi neebe Frederico Liu halo). Nee mak halo komunidade Suku Naimeco trauma.

Responde informasaun katak, sira nia suku mak sai autor ba konfrontasaun iha area Merkadu Maumate, Xefe Suku Naimeco, Marcos Liu desmente.

Laos hau nia komunidade maka hatudu fiziku hasoru membru GAM maibe komunidade sira mak atua no halo prevensaun bainhira ema barak baku Komandante PNTL Eskuarda Oesilo. Hau nia komunidade mak sai hodi atua. Se momentu neba, hau nia komunidade la atua, sira bele baku mate komandante nee. Tanba kazu nee, agora mosu issue, ema atu asalta ami. Nee lalos. Ema sira mak hanoin hanesan nee, sira hanoin sala ona,” hateten Marco Liu.

I nia husu polisia atu toma atensaun, liliu iha tempo kalan.

Situasaun hanesan nee presiza polisi fo apoiu seguransa hodi hakalma ema ruma mak hakarak mai estraga hau nia komunidade,” nia dehan.

Responde buatus refere, Adjuntu Segundo Komandante PNTL RAEOA Superintendente Polisia, Paulino do Carmo Pereira hateten, nia rekonhese buatus nee mosu iha Suku Naimeco maibe polisia fo nafatin seguransa nafatin, laos deit ba komunidade Naimeco maibe ba komunidade  iha suku hot-hotu.

“Sim. Issue nee mosu duni iha Bairu Baqui, Suku Naimeco, maibe polisia la tuur nonok. Polisia kontinua halo movel patrolha rutina iha area Naimeco. Too agora seidauk akontese buat ruma.

Entretantu, Subtitui PA RAEOA no ZEESM TL iha Oecusse, Arsenio Paixao Bano husu komunidade moris hakmatek, mantein kontaktu ho PNTL iha Oecusse. Iha buat ruma kontaktu lalais polisia. Hau mos rona buatus nee. Maibe ita nia polisia halao nafatin patrulha ba area neebe atu mosu konfrontasaun.

“Hau husu komunidade labele paniku ho buatus. Dala ruma ema lansa buatus deit. Labele fiar,” apelu Bano. Abilio Elo Nini

 

Komentariu

Facebook Comments

Leave a Reply

Your email address will not be published. Required fields are marked *