MP Alega Oknum MOP Pena Suspensaun

MP Alega Oknum MOP Pena Suspensaun

- in Krime
249
0
download (41)

Editor: Germano de Sousa

DILI– Iha alegasaun final ba kazu uza motor xapa estadu ba intrese privadu, vizita alin moras iha Tribunal Ditrital Dili (TDD), Kuarta (12/2/2020).  Ministeriu Publiku (MP), liu husi Prokuradora, Lidia Soares rekere ba TDD, aplika pena prizaun tinan 2, suspende ba tinan 4, no mos pena asesorial ba arguidu VCX durante fulan 3 labele lori kareta-motor.

Tanba tuir, MP haree katak, faktus neebe iha provadus hotu, liga mos ba deklarasaun arguidu nian. Tanba nee MP mantein ho nia akuzasuan. Iha alegasaun final MP rekere ba tribunal atu aplika pena uniku mak pena prizaun tinan 2 suspende ba tinan 4. Nunee mos, husu ba tribunal atu aplika pena asesorial ba arguidu, durante fulan 3 labele lori kareta ka motor.

Nunee mos, parte defeza husu ba tribunal aplika pena neebe adekuadu mak pena de multa.

Tanba arguidu konfesa ba faktus ho imparsial ba tribunal katak, arguidu lori duni motor iha loron domingu no sein karta kondusaun, no mos laiha autorizasaun husi superior.

Tribunal rona tiha husi parte rua nee, tribunal adia julgamentu nee ba fali loron 25 Fevereiru tuku 11:00 hodi rona desizaun.

Tuir faktus katak, arguidu VCX hanesan funsionariu publiku iha gabinete DJAF Ministeriu Obras Publiku (MOP).

Iha loron 2 Fulan Junho 2019, iha Dili arguidu utiliza motorizada ho marka Honda ho numeru matrikula 1398. G, sai husi uma atu ba Hospital Nasional Guido Valadares (HNGV) hodi vizita nia alin moras.

Bainhira too iha kruzamentu Kuluhun, Polisia ho CAC, pasa revista ba motorizada neebe maka konduz husi arguidu VCX. Liu husi, pasa revista nee identifika katak, arguidu laiha autorizasaun husi governu kona-ba utlizasaun veikulu iha loron feriadu iha loron Sabadu no Domingu. Tuir regulamentu neebe vigora, ao mesmu tempu arguidu mos lajustifika kona-ba nia karta kondusaun neebe maka lavalidu.

Arguidu halo ho forma livre, deliberada no koinesementu hatene momos katak, uza motorizada estadu nian iha loron Sabadu ho Domingu estadu bandu ona. Nunee mos, arguidu laiha autorizasaun uza motorizada nee, maibe arguidu halo nafatin hahalok nee hodi benefisia ba nia-aan hodi fo prejuizu ba estadu, hanesan meus ou instrumentu ida neebe adekuadu.

Arguidu hatene hela katak, hahalok ou konduta neebe nia halo proibu tuir lei penal.

Tanba nee, konsidera arguidu hanesan autoria material ba pratika krime pekulatu ba uzu, iha  artigu 296  husi kodigu penal, no krime kondusaun sem karta kondusaun iha  artigu 207 husi kodigu penal.

Audensia julgamentu nee prezide husi Juiz Estajiada Patricia de Fatima, Ministeriu Publiku reprezenta husi Prokuradora Lidea Soares, arguidu hetan asistensia legal husi Defensor Publiku.* Reportajen: Terezinha De Deus

 

 

 

Komentariu

Facebook Comments

Leave a Reply

Your email address will not be published. Required fields are marked *