Mota Liquica Ameasa Liquica Vila

Mota Liquica Ameasa Liquica Vila

- in Distritu
249
0
karauulun1

DILI-Tama tempo udan, kada tinan, komunidade Liquica Vilha, liliu hela besik mota ibun, sempre sente ameasa husi mota hira mak sulin tama iha area Liquica Vilha.

Kuandu udan boot, mota sulin makaas husi foho leten (husi mota ulun), dala ruma sobu komunidade balu nia uma no sira nia aihoris, dala ruma sobu estrada. Atu antisipa problema nee, MOP-TK presiza normaliza raihenek iha mota ibun.

Preokupasaun nee hatoo husi Cesar Valente de Jesus (membru Bankada CNRT) iha plenariu PN, Dili, Tersa (14/3/2017). Dala barak ona nia foti problema nee iha PN maibe MOP-TK seidauk fo atensaun.

Kada tinan, tama tempo udan, liliu udan boot, nia dehan, komunidade mak hela iha mota ninin, sempre sofre. Mota sulin ses husi leten (mota ulun), sobu komunidade balu nia uma. Nia husu MOP-TK presiza mobiliza Institutu Gestaun Ekipamentus (IGE) hodi normaliza raihenek sira iha mota laran. Atu nunee mota bot sulin tuir ninia dalan.

Husi fatin ketak, komunidade Suku Kaikasa, Postu Administrativa Fatuberliu, Agustino Fernandes mos hatoo preokupasaun konaba kondisaun Mota Klere iha sira nia area. Oras nee, nia dehan, bronjong neebe uluk monta hodi proteje bee mota labele tama ba komunidade Kaikasa, agora sorin balu rahun tiha ona. Raihenek husi parte leten, hanesan tiha ona ho raimaran. Bainhira udan boot, mota livre sulin tama ba komunidade Kaikasa sira nia hela fatin.

Eis Xefi  Aldeia Nanolo, Suku Klakok, Agustino Pinto mos informa kestaun hanesan iha Bitirai, Suku Klakok. Komunidade sira iha neba, preokupa tebes ho Mota Sahen tamba kada tinan sempre ameasa komunidade sira. Iha tinan 2016, Mota Sahen estraga komunidade nia uma balu, estraga aihan iha toos laran no animal hakiak sira hanesan fahi no manu.

Ho problema nee, sira husu MOP-TK atu fo importansia. Se bele, mobilize Institutu Gestau Ekipamentus (IGE) ba iha neba, hodi normaliza raihenek iha mota laran, tanba oras nee raihenek iha mota laran hanesan tiha ona ho raimaran. Tama tempu udan, bainhira akontese mota boot, bee mota sulin arbiru ba komunidade sira nia hela fatin. Augusto da Costa

Facebook Comments

Leave a Reply

Your email address will not be published. Required fields are marked *