Mate-Moris Iha Maromak Nia Liman

Mate-Moris Iha Maromak Nia Liman

- in Perfil
257
0
Profil Aquilino

EMA hotu hakarak vida naruk atu goza buat hotu neebe nia iha. Maibe ema nia hakarak la liu Maromak nia hakarak. Maromak mak bele hatene ema ida-idak nia moris to’o neebe. Hanesan matebian Aquilino Santos Caeiro. Iha nia moris husi kiik to’o nia servisu iha Ministeriu Turismu no Kultura nudar Direitur Jeral Turismu, la imajina katak ninia moris nee to’o iha nee deit ona. Bainhira nia halao nia knar derepente Maromak bolu nia ho nia kolega Daniel J.Groshong e Ruth Klaasje iha dalan klaran husi Dili-Manatuto.

Sira hetan asidenti trajiku ida iha Estrada. Governu Timor-Leste hato’o sentidu kondolénsia ba matebian Aquilino Santos Caeiro, Daniel J.Groshong e Ruth Klaasje. Sira na’in hirak ne’e ida-idak fó ona sira-nia kontributu ba Timor-Leste ho kbiit tomak no laran di’ak. Aquilino Santos Caeiro, Daniel J.Groshong no Ruth Klaasje serbisu ho dedikasaun, domin no haka’as sira nia an tomak, hodi husik hela kontributu importante ida ba Timor-Leste.

Timoroan Aquilino Santos Caeiro, bainhira sei moris, hala’o kna’ar hanesan Diretór-Jerál Ministériu Turizmu, Arte no Kultura nian. Daniel J.Groshong, mai husi Oregon, EUA, nu’udar jornalista veteranu ida, fotógrafu profisionál no fundadór Fundasaun Hummingfish. Ruth Klaasje, mai husi Olanda, nu’udar hakerek na’in, espesializada iha edukasaun.

Aquilino Santos Caeiro, bainhira sei moris no halao knar iha Ministeriu Turismu no Kultura, nia iha ideas neebe konstrutivu kona ba dezenvolve turismu. Nia dehan dezenvolve Turismu  laos ohin halo, aban hetan kedas rezultadu.

Balibo oan, Aquilino Santos Caeiro, moris iha Aldeia Duaderoc, Balibo, Munisipiu Bobonaro, 24 Setembru 1971. Oan mane husi Lucia da Purificação no Celestino Caeiro nee, moris simples maske ninia esperiensia no background edukasaun as teb-tebes. “Hau nia inan  ho aman hanesan agrikultor no moris  hanesan agrikultor neebe simplis. Hau  lakon hau nia inan desde hau sei kiik no lakon tan hau nia aman iha 1999,” dehan Aquilino ba diariu nee iha ninia servisu fatin, MTK, Dili, tinan ida liu ba.

Aquilino mos hatun lia katak nia iha maun alin nain hat neebe maioria sira moris hanesan agrikultor. Iha uma laran sira moris hanesan ema simples no hakraik ann atu servi ba malu.

Koalia kona-ba turismu, Aquilino dehan katak atu dezenvolve turismu iha rai laran, MTK labele lao mesak, maibe tenke iha planu integradu. Bainhira atu halao dezenvolvimentu turismu nian iha fatin ida presiza servisu integradu entre ministeriu relevante.

Ita dezenvolve fatin ida, presiza estrada, ahi, telekomunikasaun, bee mos no sel-seluk tan. Dezenvolve turismu ninia durasaun naruk, laos ohin ita dezenvolve aban hetan kedas rezultadu. Ohin ita halo promosaun, aban ema mai kedas, lae.  Agora ita dezenvolve turismu, ninia rezultadu  nee ita nia  bei oan sira mak hetan ninia rezultadu nee,” tenik Aquilino.

Edukasaun Formal

Aquilino  eskola primaria iha Aldea Duaderoc 1979  no remata 1984. Remata Pre Sekundariu iha Balibo iha 1987 no remata Sekundariu iha Maliana iha 1991. Depois kontinua eskola iha Area Turismo iha espesialidade ba Tour and Travel management remata iha 1993. Depois Timor Leste ukun ann nia kontinua estudu iha Universidade da Paz iha area Relasaun Internasional no remata Masteradu iha Universidade da Paz iha area Publik Administration.

Ba hau edukasaun, hanesan savi importante atu desemvolve ita nia ann no esperensia hanesan mestre neebe maka diak hodi servi diak liu tan. Husi edukasaun neebe maka diak ita bele alkansa ita nia mehi. Edukasaun neebe maka importante mos tengki mai husi uma laran,” dehan nia.

Esperencia servisu no Cargo Xefia

Koalia kona-ba esperensia servisu, nia iha esperiensia servisu neebe husi nivel neebe maka baziku tebes hanesan buruh kasar ba too nivel hanesan direitur jeral agora.  Iha tempu Indonesia 1997-1999 nia servisu hanesan funsionariu iha Koperasi Telekomunikasi. Depois Timor Leste ukun ann nia servisu iha Central Maritime Floating hotel. Depois hetan rekrutadu husi tempu UNTAET hanesan Funsionariu Publiku iha Divisaun Turismu, Sekretari Estadu Komersiu Industria e Investimentu neebe depois transforma ba Ministeriu Ekonomia e Desemvolvimentu. Iha tempu IV Governu konstitusional transfoma ba Ministeriu Turismu, Comersiu e Industria.

Desde MTCI nia tempu nia hanesan Chefe Depertamentu ba area Promosaun e Marketing durante tinan hat nia laran no depois MTCI alarga ninia strutura nia  hetan nomesaun hanesan Direitur Nasional Marketing e Relasaun Internasional.

Depois governu forma V Governu Konstitusional nia hetan tan fiar hanesan Diretor Nasional Marketing e Relasaun Internasional too fulan Fevereiru 2016. Depois hetan tan fiar hodi asumi kargu hanesan Direitur Jeral Turismu iha fulan Marsu too agora.

Ba hau kargo chefia, hanesan fiar no responsabilidade neebe maka tula hela mai ita atu servi no koko ita nia ann hodi bele jere instituisaun neebe maka ita partensia ba hodi servi ba interese nasional. Iha parte seluk Chefia ba hau hanesan jestor neebe persiza iha stratejia hodi bele jere internalmente no mos eksternalmente.  Ida nee mos hanesan artes neebe interesante atu bele demonstra iha ita nia lalaok servisu lorloron,” afirma Aquilino.

Nia dehan katak koalia kona-ba esperensia servisu la halai ses husi kapasitasaun neebe maka governu Timor Leste prepara mai nia durante servisu. Iha kursu bar- barak maka nia atende tiha ona iha rai laran no mos rai liur. Iha 2001 nia ba atende kursu ekonomia iha UIBE iha China. Tinan  2004 nia  ba atende kursu Promotion  and marketing iha Japaun  no iha 2006 nia  hetan oportunidade on the Job Training iha Diresaun Nasional Turismu de Macau durante fulan nen, no iha 2008 hetan scholarship husi Governu Tasmania, Australia hodi ganha esperensia servisu iha Turismo Tasmania, no Intensive ingles Course iha TAFE Tasmania, Australia.

Ikus liu hau mos ba tuir Treinamentu Excecutive nebe maka organiza husi UNWTO ASIA/ PACIFIC liu liu iha area Tourism Policy and Strategy iha Seoul, Korea Selatan. Ho kapasidade neebe maka hau iha, hau hakarak kontribui ba desemvolvimentu turismu iha Timor Leste. Hau sente ita persiza hakraik ann nafatin no servisu hamutuk ho entidadi tomak iha Timor Leste no mos parseiru desemvolvimentu sira seluk,” katak nia.

Aquilino hanesan kaben nain neebe hakarak dedikaann ba ninia familia neebe maka sai hanesan lalenok ba nia moris tomak. Nia iha oan nain tolu kompostu husi oan mane nain ida no oan feto nain rua. */Natalino Belo

 

Facebook Comments

Leave a Reply

Your email address will not be published. Required fields are marked *