Manuel Florencio da Cannosa Vong

Manuel Florencio da Cannosa Vong

- in Perfil
2911
0
Profil Vong

IHA loron Sesta, 13 Outubru 2017, Prezidente Repúblika (PR) Francisco Guterres Lú Olo liu husi Dekretu Prezidente no 71 /2017 ho data 12 Outubru  nomeia, Drs. Manuel Florêncio da Canossa Vong, MSi, Ph.D (Reitor Dili Institute Of Technology) asumi kargu Ministru Turismu, Dra. Maria Ângela Guterres Viegas Carrascalão, dekana hosi Direitu iha Universidade Nasional Timor Lorosa’e (UNTL) asumi kargu Ministra Justisa,  Sara Lobo Brites, Vise Kordenadora ida hosi Banku Sentral asumi kargu Vise Ministra Planu no Finansas no  Rui Meneses da Costa husi Partidu Demokratiku (PD)  asumi kargu Vise Ministru Turismu.

Nomeasaun PR Lu Olo ba Ministru no Vise Ministru nee tuir nia kompeténsia tuir artigu 106 no 2 Konstituisaun Repúblika Demokrátika Timor-Leste (RDTL) hodi kompleta kadeira VII Governu Konstitusional neebe sei mamuk. Ho nunee, VII Governu Konstitusional neebe lidera husi Dr. Mari Bin Amude Alkatiri kompleta ona.

Iha loron Tersa, 17 Outubru 2017, membru VII Governu Konstitusional ikus nian nee simu pose husi Prezidente Republika Francisco Guterres Lu Olo iha Palásiu Prezidente Nicolau Lobato, Bairro Pite, Dili, Tersa (17/10/2017) tuku 18.00 OTL.  Alein de membru Governu nain haat nee, PR Lu Olo mos fo pose ba Vise Ministru Negósiu Estranjeiru nian, atual Embaixadora Timor-Leste nian iha Singapura, Adaljiza Magno.

Depois simu posse nuudar Ministru Turismu, Manuel Lito Vong, iha loron Sesta, 20 Outubru 2017, halo despedida ho familia boot  DIT nian,  nomos serimonia tomada de posse  ba Reitor DIT foun ba periode 20 Outubru 2017-15 Janeiru 2019, Alvaro Menezes Amaral, Ph.D.

***

MANUEL Florencio da Cannosa Vong, Ph.D,  neebe babain bolu ‘Lito Vong’, laos mai husi familia riku. Nia mai husi familia agrikultor. Ninia inan aman halao servisu nudar to’os nain no la eskola. Maibe sempre orienta oan sira ba eskola para sai ema matenek. Sempre eduka oan sira tenke servisu maka’as. “Servisu hanesan atan, han hanesan liurai”. Nomos matenek neebe iha, konsidera nudar riku soin ida neebe susar ba ema atu naok. Maibe la vale buat ida, sekuandu la fahe ba ema seluk.

Lito Vong hetan distinu diak. Nia hetan opurtunidade ba eskola. Ho liafuan inan aman nian nee, halo nia estudu maka’as. Ohin loron nia sai matenek nain ida ho predikat licensiatura doctor (S-3). Kapasidade matenek nebe nia iha, la halo nia lao iha anin leten. Ninia hahalok hanesan babain. Sempre hanoin haraik an. Sempre hanoin hakarak fahe ninia matenek ba maun alin sira ka ema seluk, para sai matenek hanesan mos ho nia.

Nia fiar katak, matenek neebe nia iha, sei la vale buat ida, sekuandu tau nonok deit iha ninia hanoin. Valor vale liu ba nia mak,  presiza fahe ba ema seluk. Hanoin hirak nee, sai hanesan prinsipiu ba nia hodi haree ninia vida no distinu ema seluk.

Lito Vong iha maun alin nain 10 kompostu husi mane 5 no feto 5. Tempo idade sei ki’ik sira moris hanesan babain.

Hau nia inan aman haruka ami ba eskola buka matenek no osan neebe maka iha laos buat neebe maka folin bo’ot, maibe ema maka folin liu tanba nee maka moris hanesan ema iha familia ida nian sempre fo liu valor ba ema duke ba sasan. Tanba belun diak liu maka ema tanba nee buat neebe ita hetan ohin iha aban laiha, maibe ita belun ho ema rohan la kotu no ita servi ema nia folin mos la kotu tanba nee sai hanesan ema bain-bain deit,” dehan Lito Vong.

Tamba nee, diak liu servi ba ema hotu-hotu. Prinsipiu ida nee fundamental ba sira. Nia pai sempre dehan ba sira tenke hadomi malu. ”Entaun ami buka atu halo ida nee iha ami nia moris loron-loron. Hanesan hau neebe maka eskola servisu ida hanesan dosente nee avo sira uluk mos mesak mestri hotu deit tanba nee ohin loron hatudu mai ami bei’oan sira mos sai mestri hanesan sira. Profisaun nee ami simu ho kontenti. Ho profisaun nee bele halo ema seluk sai matenek. Sai ema neebe servi ba nasaun no povu. Nee mos sai hanesan fisolofia moris nian,” dehan Lito Vong.

Reitor sesante Manuel Vong neebe nomeadu nuudar Ministru Turismu VII Governu Konstitusional RDTL, moris iha Dili 7 Novembru 1962. Hahu eskola primaria Nuno Alvares Pereira iha Misaun Katolika Soibada husi tinan 1969-1974, depois kontinua eskola iha teknika Dili Timor Leste iha tinan 1974-1975.  Kontinua fila fali tan eskola primaria VIII iha Dili husi tinan 1976-1977, depois mos kontinua fila fali eskola Pre-Sekundariu 1 iha Dili husi tinan 1977-1981, no husi tinan 1981- 1984 remata ona eskola sekundariu iha eskola São Jose Dili.

Nia kontinua fila fali Bacharel de artes administrasaun publiku iha akademia administrasaun interna iha Kalimatan Sul  (Indonesia) husi tinan 1994-1988, depois kontinua fila fali lisensiatura ba fakulidade de siensiais ba administrasaun governamental espesialidade iha areas politika no instituto siensia governu ba nasaun Indonesia nian iha Jakarta husi tinan 1988-1991.

Depois kontinua fila fali mastradu iha areas siensia administrasaun publiku iha Universidade Gadjah Mada (UGM) Yogyakarta (Indonesia) tinan 2000-2002. Kontinua fila fali tan Doutoramentu iha areas Turismu iha Fakuldade Ekonomia, Universidade Algrave Portugal husi tinan 2010-2014.

Kona ba esperiensia servisu, Manuel Lito Vong halao servisu durante tinan 33 ona hahu fulan Abril 1984-Outubru 2017. Knar ohin loron antes nomeadu nuudar Ministru Turismu mak sai hanesan Reitor DIT no sai mos hanesan Membru Korpu Dosente iha DIT no sai mos hanesan investigador ba DIT rasik.

Iha tinan 2007-2009 sai hanesan Vise Reitor Asuntu Akademiku inklui mos sai hanesan membru ka grupu dosente no peskizador iha DIT.  Husi fulan Setembru tinan 2002-2007 sai mos hanesan Xefe Departementu Politika ba Jestaun Publiku iha DIT.  Fulan Setembru tinan 2002 sai mos hanesan membrus fundador DIT.

Iha fulan Abril 1994-Setembru 1998, sai mos hanesan Xefe Assuntus Administrasaun Publik iha Munisipiu Manatuto iha areas jestor ba governu lokal sira iha area rural Munisipiu Manatuto nomos sai hanesan membrus Korpu ba Assuntu Terras Propidade Munisipiu Manatuto iha tempu neeba, inklui halo rejistu sivil iha Munisipiu Manatuto.

Alende nee mos iha fulan Marsu 1993-Abril 1984, sai mos hanesan Xefe  Postu Administrativu Barique, Munisipiu Manatuto, hodi hare mos jestor ba iha governu sira iha areas rural, liu-liu hare komunidade lokal sira iha area rural hanesan supervision ba dezenvolvimentu infrastutura ba projetu ba komunidade lokal sira.

Iha tinan 1992-1993 sai mos hanesan Xefe Seksaun ba Assuntu Dezenvolvimentu ba kapasidade hanesan edukasaun, kultura, relijiaun, ba Provinsia Dili nian. Sai mos hanesan Xefe ba projetu bolsu Estudu ninian ba estudante lisiensiatura Timor Leste iha universidade sira, hanesan Ensinu superior iha Indonesia neebe Provinsia Dili. Sai Xefe ba selesaun bolsu estudu iha Timor Leste. Iha tinan 1991-1992 sai mos hanesan funsionariu iha seksaun ba assuntu edukasaun treinamentu ba funsionariu publiku sira.

Iha tinan 1984-1991 hetan nomea sai hanesan funsionariu publik atu hare ba iha bolsu estudu ba Baserelatu iha artes ba areas administrasaun public  iha akademia administrasaun interna ninian iha Kalimatan sul, Indonesia. Hanesan Lisensiatura sira nee hare liu ba iha fakuldade siensia ba administrasaun governu nian, espesial liu iha area politika no instituto de siensia iha governu no hanesan ba iha nasaun sira iha Jakarta, Indonesia.

Nia mos hetan diploma iha training iha Assesment iha Vitoria University Australia iha tinan 2009, no hetan sertifikadu iha tinan 2008. Nunee mos hetan kursu kona ba jestaun  ninian hanesan National Instituto of Administrasaun iha Portugal inklui politika. Iha tinan 2003 sai mos hanesan training ba kursu manajementu finansa ninian iha The Asia Fundation. Halo mos survey no analisis, seminariu internasional iha Yogyakarta iha tinan 2000. Carmen Ximenes

Facebook Comments

Leave a Reply

Your email address will not be published. Required fields are marked *