Mango Fernandes Ho Negosiu Azuleju Kualidade

Mango Fernandes Ho Negosiu Azuleju Kualidade

- in Perfil
3442
0
Profil Mango

IHA Loron Sabadu, 14 Outubru 2017, Kompañia foun ida ho naran Casa de Tiles loke abertura ba  promosaun  negosiu azuleju (kramik) neebe mak agora halao iha Timor Leste. Negosiu azuleju iha Timor Leste foin premeira vez  halao husi Timor oan nain 4 (maun alin) kompostu husi Sisto, Mango, Ermenio no Ersel, inklui sira nia kolega ida hosi Irak ho naran Bill. Antes abertura, atividade refere mos Kompañia Casa de Tiles aprezenta ona ba Governu Timor Leste.

Produtu azuleju neebe agora daudaun faan iha Timor Leste sei haruka hosi nasaun Australia, Italia, India, Xina, Malaysia no nasaun seluk tan.

Abertura ida nee hodi loke Casa de Tiles iha Timor Leste kona ba  negosiu azuleju (kramik) neebe  mai  hosi Italia, Australia, India, Xina  ho rai barbarak,” dehan Diretor Casa de Tiles, Mango Fernandes ba STL iha ninia servisu fatin, Casa de Tiles, Merkadu Komoro, Dili, Kuarta (18/7/2017).

Mane bonito neebe moris iha Portugal, 6 Setembru 1978 nee, hateten antes atu loke Kompañia Casa de Tiles iha Timor Leste hodi halao negosiu azuleju, Kompañia refere durante fulan neen halo ona promosaun.

“Azuleju neebe ami faan iha nee importa hosi nasaun barak ho kualidade diak liu no baratu. Ba komunidade sira neebe hakarak sosa kramik kualidade mai deit iha Casa de Tiles. Ami pronto fo esplikasaun no hatudu video kona ba kualidade azuleju no sel-seluk tan,” dehan Mango Fernandes.

 Oan dahaat hosi maun alin nain hitu nee dehan objetivu prinsipal loke negosiu ida nee hanesan Timor oan neebe aprende buat barak liu-liu kona ba azuleju neebe ho kualidade diak no ãs tebes. Aliende halao negosiu azuleju, posibilidademente kompañia refere mos sei fahe espriensia ba Timor oan sira neebe iha interese atu apriende kona ba oinsa nahe azuleju ho kualidade.

Kramik neebe ami faan nee kualidade diak liu kompara ho azuleju hirak seluk neebe mak faan iha Timor Leste,”tenik oan mane hosi Pascoela Abrantes Andrade no Tome Andrade nee.

“Hau nia pai ho mae mate hotu ona. Hau nia pai (Eis Tropas no Polisia Portugal) mate iha tinan 2015 bainhira vizita nia avo sira iha Timor Leste. Hau nia pai hakoi iha semiteriu Kakalidun,”nia sublina.

Kompañia  Casa de Tiles, agora daudaun fo servisu ba Timor oan hamutuk nain 10.  Ba oin sei rekrutamentu Timor oan barak atu servisu iha kompañia refere.

***

MANGO Fernandes ho nia mau alin nain nen, durante tinan barak moris iha rai liur (Portugal no Australia). “Hau nia maun boot Ermenio moris iha Palapaso no hau nia maun Ersel moris iha Atambua. Ami nain lima seluk (mane tolu no feto rua) moris iha Melbourne, Australia,” katak Mango.

Bainhira akontese Revolusaun Aifunan (Revolusi Bunga) iha Portugal 25 Abril 1974, situasaun politika iha Timor Portugis komesa manas. Tanba nee, atu hases an husi situasaun politika refere, Mango Fernandes nia inan aman, Tome Andrade ho Pascoela Abrantes Andrade ho sira nia oan mane Ermenio halai ba Atambua.  Iha Atambua, Tome Andrade ho Pascoela Abrantes Andrade hetan tan oan mane ida ho naran Ersel.

Hosi Atambua hau nia mai no pai hamutuk ho nia oan mane nain rua halai ba Portugal. Hosi Portugal mai iha Melbourne, Australia, hela permanente to’o ami nain lima moris tan iha Australia. Nunee ami hamutuk nain hitu kompostu husi Ermenio, Ersel, Tomazia, Mango, Donzilia, Filomena no João Bosco,” dehan Mango Fernandes.

Maske moris iha rai liur, maibe, Mango Fernandes ho nia maun alin sira akompania nafatin situasaun Timor Leste   durante tinan 24 nia laran iha okupasaun Indonesia nia liman. Depois tinan 11 Timor ukun an (2013), Mango Fernandes vizita Timor Leste. Iha Australia Mango Fernandes ho nia maun alin sira moris ho servisu konstrusaun.

Hau hela iha Timor durante tinan rua (2013-2015). Fila hosi Timor hau bolu hau nia maun sira tuur hamutuk hodi koalia kona ba planu atu loke negosiu iha Timor Leste. Foufoun ami hakarak halo Hotel iha Same-Betano, tanba ami nia rai iha Betano. Maibe, planu atu halo hotel iha Same-Betano la realidade. Ikus mai halo negosiu azuleju iha Dili,” katak Mango Fernandes.

Mango Fernandes kaben ho ema Italiano ho naran Diana. Agora daudaun sira iha ona oan feto ida ho naran Miraaq ho idade tinan 5. “Hau nia oan feto ho nia inan hela iha Melbourne, Australia,” tenik Mango. Lucia Ximenes/Mikael M.Mau

Facebook Comments

Leave a Reply

Your email address will not be published. Required fields are marked *